Read lunyore OBUBALI 11 Bible Online

OBUBALI 11 - lunyore bible

OBUBALI 11

¹Abandu yabo bachiaka okhwekan'na OMWAMI khukeminyakhano echiabakaana n'natsio. Olwo OMWAMI yabahulila, yahambwa noburima ma narumila abandu omul'lo. Kwatukha hakari wabwe ma nikusamba elubeka l'lala lwekambi.

²Abandu nibamulakayila Musa mbu abakhonye; naye Musa nasaaya khu MWAMI, ma omul'lo nikuchiaka okhusima.

³Kho habundu tsana hakulikhwa eliira mbu Tabera[2]; sichila omul'lo kwo MWAMI kwasamba hakari wabwe.

⁴Baliho abacheni bandi abali khuluchendo l'lala nende Abaisiraeli. Bali nokhwonyonywa okhukali okhulia inyama, ma kata Abaisiraeli bosi nibachaaka okhwekaana, nibaboola mbu, “Siakhuha inyama khwalia!

⁵Khwitsul'langa tsisuche etsia khwalitsanga Emisiri etsia khurakulanga amapesa. Khandi khwitsul'langa nende tsinduuma, namahondo, netsiifwa, nebitungulu, neitania.

⁶Nebutswa luno tsingufu tsiefwe tsihweye. Sibulaho esindu siosi esiakhunyala okhulia, nikari amana kano konyene!”

⁷Ne amana tsana kafwananga imwo yamabele keikhumba; ne likondo liayo liali singa amayayi amalabil'lu.

⁸Abandu batsiitsanga nibakatoola, nibakasa khuluchina, nibakaswaka mubinu, nibakateekha mundabu, nibakakhola emikaati; ne esiuya siako sili singa emikaati achiatekhelwa amafura.

⁹Ne olwe liime liaamanga khukambi mubutukhu, amana nako nikakwa khukambi halala n'nalio.

¹⁰Musa yahulila abandu nibekaananga nibasinjiye mubituma buli mundu hamuliango weliheemalie. Yamala asinyikhe sichila oburima bwo MWAMI, bwali nibwakhile khubo.

¹¹Musa nabool'la OMWAMI mbu “Nisina esichil'le niukhol'la obubi? Nisina esichil'le norayanzisibwa n'nase? Nisina esichil'le niunduukha omusiko kwabandu bano bosi?

¹²Ise sindali okhulonga abandu bano nohomba okhubebula tawe. Kho nisina esiakhachila niumbool'la mbu mbe singa omulesi khubo ma mbachinge mumakhono kanje singa abaana batoro okhwola olwa namboosie musibala esiawesuhila abakuka babwe mbu wakhabaheelesie?

¹³Nase ndakhanyoola hena inyama eyokhuhelesia abandu bano bosi? Okhuba balindil'langa nibaboola mbu, ‘Okhuhelesie inyama khulie.’

¹⁴Sinyala okhusinjil'la abandu bano bosi sienyene tawe; nomulimo omusiro okhuusila khu ise.

¹⁵Noba niwenyanga okhukhol'la mbwo, khusaayanga mbu unzire bwangu, kho mbule okhutsilil'la okhwefwila amatinyu akaunder'ranga.”

¹⁶Kho OMWAMI nabool'la Musa mbu, “Umbunjelesisie abasaatsa boluyali amakhumi kane nakataru abamanyikhile mbu nabemeli babandu, witse n'nabo khwiheema liokhubaho khwanje, ma obabool'le basinjileho n'nawe halala.

¹⁷Nzia okhwikhaho nin'noma n'nawe habwene yaho; ne nambukule khumwoyo okuli mwiwe, nira mubo. Ma nabakhukhonyenje okhukhola omulimo kwokhusinjil'la abandu mumang'ana kabwe, olekhe okhubasinjil'langa wenyene.

¹⁸Luno obool'le abandu mbu ‘Mwetsienule khulwe litukhu liamukamba, namunyoole inyama yokhulia. OMWAMI uhuliye okhwekaana khwenywe nende okhuboola mbu siakhuha inyama khwalia. Khandi mbu bwalinji bulahi olwa khwali Emisiri.’ Niko akachila OMWAMI namuhelesie inyama ma namulie.

¹⁹Simulalia litukhu elala, nohomba amatukhu kabili, nohomba amatukhu karano, nohomba amatukhu likhumi, kata amatukhu amakhumi kabili tawe,

²⁰nebutswa mulachilia khulwo omwesi omuchima, okhwola olwe emusinya, ma muchisal'le mumoolu. Yaka nakekhole sichila mwasuula OMWAMI oli hakari wenywe, ma nimumwekaan'na nimuboola mbu simwakharul'lekhwo Emisiri tawe.”

²¹Musa nabool'la OMWAMI mbu, “Abandu aba nzemel'langa bali etsielefu tsimia tsisasaba, nawe oboolanga mbu nobahelesie inyama balie omwesi omuchima?

²²Mbula banyala okhwir'rwa tsing'ombe etsihela nende amakondi akahela okhubakhola beekure? Mbula tsisuche tsiosi etsili mumaatsi tsiakhabahela noho?”

²³OMWAMI nabool'la Musa mbu, “Obunyali bwanje nobuleemu noho? Luno witsa okhulola ling'ana lianje niliba niliitsa okhwekhola nohomba okhubula okhwekhola.”

²⁴Musa naye narula, nabool'la abandu amang'ana ako OMWAMI yali nabooye. Yabunjikha abasaatsa amakhumi kane nakataru khubemeli babandu, nabara khutsimbeka tsiosi tsie Liheema.

²⁵Ma OMWAMI niyekhela mwilumbesi, nal'loma n'naye. Yabukulakhwo khumwoyo okwali nikuli muye, nakwinjisia mubemeli tsana amakhumi kane nakataru. Olwomwoyo kwayeela khubemeli yabo, barooba muliira lio MWAMI; nebutswa sibatsilil'la okhukhola mbwo khandi tawe.

²⁶Nebutswa abasaatsa babili bali nibasikaye mukambi; sibali okhutsia khwiheema tawe. Mulala yalangwa Elidadi, ne oundi Medadi. Nibali mukambi omwoyo kwenjila mubo; nabo nibaroobela mukambi.

²⁷Omusiani undi omubuukha niyelukha nabool'la Musa mbu, “Elidadi nende Medadi baroobelanga muliira lio MWAMI mukambi.”

²⁸Ne Yoshwa omwana wa Nuni omurumikhi wa Musa owali mulala khubalobolebe, naboola mbu, “Omwami Musa, obakaye.”

²⁹Musa namubool'la mbu, “Busina ohendelanga amang'ana kanje? Ndekombanga mbu OMWAMI are omwoyowe mubandube bosi ma kachile bosi babe abaroobi.”

³⁰Ma Musa nakalukha mukambi halala nabemeli ba Isiraeli.

³¹Nonoho OMWAMI yaruma omuyeka okwaleera ebisindu okhurula munyanza nibipulukhilanga hasi ahembi emita ndala okhurula hasi. Biayeela khukambi nende okhuchibotokhana okhuhela etsikilomita tsinyinji.

³²Kho litukhu yilio liosi nende obutukhu yibwo bwosi ma nende litukhu elialondakhwo abandu batoola ebisindu; abulaho owatoola ebisindu hasi wetsikilo elefu ndala. Babibakala nibabiomia mukambi yosi.

³³Ne olwe inyama iyio yali nesili inyinji, nibasili okhumila, OMWAMI yahambwa noburima ma naruma esibi esikali okhubuukha mubo.

³⁴Khulwe yako habundu tsana nihakulikhwa eliira mbu Kiburotsi Hataba[3] sichila niho ahabayabila abandu abali nobwekombi.

³⁵Abandu yabo nibarula Kiburotsi Hataba, nibatsia Haserotsi; nibamenya ebwene y'yo.