Read lunyore OBUBALI 12 Bible Online

OBUBALI 12 - lunyore bible

OBUBALI 12

¹Miriamu nende Haruni batsekula Musa khulwo okhuteesia omukhaana Omukushi[4].

²Nibaboola mbu, “Akhali Musa yenyene owo MWAMI yal'lomelamwo noho? Siyal'lomela mu ifwe khandi?” OMWAMI naye nahulila akababoola. (

³Ne Musa uyo yali omuhooma okhuyomba abandu bosi abali musibala.)

⁴Nonoho OMWAMI yabool'la Musa Haruni, na Miriamu mbu! “Inywe mwesi bataru rule mwitse Mwiheema liokhubaho khwanje.” Kho bosi bataru nibarula nibatsia,

⁵ma OMWAMI niyeekhela mwilumbesi eliesiilo okhwitsa hasi, nasinjila mubwinjil'lo bwe Liheema, nalanga Haruni nende Miriamu. Nabo babili nibesunda hambeli;

⁶ne OMWAMI nababool'la mbu, “Luno muhulile akanzia khuboola! Olwa abaroobi babetsanga mwinywe, Ise ndolekhanga khubo mumabisulo, ma n'noma n'nabo mumalooro.

⁷Kabukhan'ne singa obwe ise n'nomanga khumurumikhili wanje Musa! Ise ndamukhola okhuba omulindi wabandu banje bosi ba Isiraeli.

⁸Ye n'nomanga n'naye moni namoni habulafu, tawe mutsingano; ye kata walola likondo lianje. Mukhol'le mbwena nimutsekula omurumikhili wanje Musa?”

⁹OMWAMI yali nelirima n'nabo: ne olwa yarula khubo,

¹⁰lilumbesi nalio liarula hekulu we Liheema, nonoho Miriamu naba owobuchele, ne nalaba singa etsaluchi; olwa Haruni yahenga nalola mbu Miriamu yali nakwiye owobuchele,

¹¹Haruni nabool'la Musa mbu, “E omwami wanje orakhuha esinyasio khulwo obwoni buno tawe, okhuba khukhol'le tsimbi tsiobusilu.

¹²Khusaaya mbu oralekha Miriamu afwane singa omwana wibuywe nafwiye owomubili kukwe kubol'le elubeka tawe.”

¹³Ma Musa namulakayila OMWAMI naboola mbu, “E OMWAMI, khusaayanga omuhonie!”

¹⁴OMWAMI nabool'la Musa mbu, “Samwana alaba niyamufutsila amare mumoni, khane siyakhabeye nes'simba murwe khulwa amatukhu kane nakataru? Yekal'lwe esioba wekambi amatukhu kane nakataru; ma olunyuma lwako akabusibwe mukambi.”

¹⁵Kho Miriamu yeekal'lwa esioba wekambi amatukhu kane nakataru; abandu sibachitsachil'la noluchendo tawe, okhwola olwa Miriamu yali niyenjisibubwe mukambi.

¹⁶Ma olunyumakhwo abandu nibarula Haserotsi nibatsia nibakhupa ekambi musitsiimi sia Parani.