Read lunyore OBUBALI 13 Bible Online

OBUBALI 13 - lunyore bible

OBUBALI 13

¹OMWAMI yabool'la Musa mbu,

²“Ruma abandu batsie okhulambuula esibala sia Kanaani, esia nambelesie Abaisiraeli. Orume omundu okhurula mubuli olwibulo mutsinzibulo likhumi natsibili.”

³Kho Musa nabaruma okhurula musitsiimi sia Parani, singa OMWAMI yali namulachile. Bosi mbwo bali abemeli ba Baisiraeli.

⁴Ne amera kabwe ngakano; khulwibulo lwa Rubeni, yaruma Shamua omwana wa Sakuri.

⁵Khulwibulo lwa Simioni, yaruma Shafati omwana wa Hori.

⁶Khulwibulo lwa Yuda, yaruma Kalebu omwana wa Yefune.

⁷Khulwibulo lwa Isakari, yaruma Igali omwana wa Yosefu.

⁸Khulwibulo lwa Efuraimu, yaruma Hoshea omwana wa Nuni.

⁹Khulwibulo lwa Benjameni, yaruma Paliti omwana wa Rafu.

¹⁰Khulwibulo lwa Sabuloni, yaruma Gadieli omwana wa Sodi.

¹¹Khulwibulo lwa Yosefu, okhurula musilibwa sia Manase, yaruma Gadi omwana wa Susi.

¹²Khulwibulo lwa Dani, yaruma Amieli omwana wa Gemali.

¹³Khulwibulo lwa Asheri, yaruma Setsuri omwana wa Mikaeli.

¹⁴Khulwibulo lwa Nafutali, yaruma Nabi omwana wa Wofusi.

¹⁵Khulwibulo lwa Gadi, yaruma Geweli omwana wa Maki.

¹⁶Yako niko amera kabasaatsa yabo aba Musa yaruma okhulambuula esibala. Musa yasukhania eliira lia Hoshea omwana wa Nuni, namukulikha mbu Yoshwa.

¹⁷Olwa Musa yabaruma okhulambuula esibala sia Kanaani yababool'la mbu, “Mutsie esinyolu okhurula hano mwinjile enandete wesibala sia Kanaani ma mwinjile musibala siomubikulu.

¹⁸Mulole esibala singa obwa sili; khandi mulole abandu abamenyangamwo nibaba nibali abenji khandi abetsingufu.

¹⁹Kata nende esibala esia bamenyangamwo nisiba nisili esilahi nohomba esibi; nende amataala aka bamenyangamwo, nibaba nibamenyanga mumataala kasirwa nohomba mumataala akaraasirwa.

²⁰Kata nende liloba liene niliba nilili linolu nohomba elibulamwo ebiamo; emisaala nichiba nichilimwo. Ne muteeme akamunyala muleerekhwo khubiamo biesibala yisio.” (Ne amatukhu yako kali amatukhu kemisabibu okhuchiaka okhwenga.)

²¹Kho abasaatsa yabo nibatsia esinyolu nibalambuula esibala okhurula enandete khusitsiimi sia Sini okhwola Rehobu, nende okhwola esinyolu mulung'anyi lwa Hamatsi.

²²Mbelio benjila musibala sienandete ma niboola Heburoni omwa Ahimani, Sheshai nende Talimai, abetsukhulu bolwibulo lwemindu emikali olulangwanga Abanaki bali nibamenyanga. (Nalio litaala lia Heburoni liali niliombokhwa Emihika chine nachitaru, Soani elili Emisiri nisili okhwombokhwa.)

²³Niboola khwibanda lia Eshikoli, nibaremayo olusaka olwali nesisakanya silala siemisabibu, nibasichinga khumutichilo[5] hakari wabandu babili sichila siali es'siro okhusila. Khandi nibaleera khumakomoli nende amakhuyu kosi.

²⁴Habundu yaho halangwa mbu Libanda lia Eshikoli[6] khulwe esisakanya yisio esia Baisiraeli baremayo.

²⁵Inyuma wokhulambuula esibala khulwa amatukhu amakhumi kane, abalambuuli yabo bakalukha

²⁶khu Musa, nende Haruni nokhumukanda kwosi kwa Isiraeli musitsiimi sia Parani, nibali Kadeshi. Bababool'la kosi aka bali nibaluutsiyo khandi nibabamanyia ebiamo biesibala tsana.

²⁷Nibabool'la Musa, “Khwalambuuye esibala esia wakhurumamwo, ne silimwo nobuhinda obwinji nende ebiamo ebinji; ebiamo biasio mbiebino.

²⁸Nebutswa abandu abamenyanga musibala tsana nabetsingufu, ne amatookho kabwe kaasirwa namasisi khandi namakali okhusila. Khandi khwalola abaana ba Anaki emindu emikali nichiliho.

²⁹Abaamaleki bamenyanga musibala sienandete, ne Abahiti nende Abayebusi nende Abaamori bamenyanga musibala siomubikulu, Abakanaani bamenyanga hanyanza, khundulo khwa Yorodani.”

³⁰Naye Kalebu yahotselesia abandu abali nibamumuchil'langa naboola mbu, “Khutsie khuseere esibala luno ma khusibukule; sichila khuli netsingufu etsihela okhusileka.”

³¹Nebutswa abasaatsa abali nibatsiyeyo nende Kalebu baboola mbu, “Sikhwakhanyala okhuseera abandu yabo tawe; abandu yabo nabakufu okhukhuyomba.”

³²Nibaleer'ra abandu ba Isiraeli amang'ana amabi khusibala esia bali nibalambuuye, nibaboola mbu, “Esibala esiakhwalambuula sisihaananga ebiakhulia ebihela abandu abamenyangamwo tawe. Abandu bosi aba khwaluutsiyo nabarambi okhusila.

³³Khandi khwaluutsiyo emindu emikali echiolwibulo lwa Anaki. Khwelola abene nikhuli singa amatete butswa khubo.”