Read lunyore OBUBALI 14 Bible Online

OBUBALI 14 - lunyore bible

OBUBALI 14

¹Abandu ba Isiraeli bosi nibakhupa tsikhwisi; nibalakaya obutukhu bwene yibwo.

²Abaisiraeli bosi nibamumuchil'la Musa nende Haruni; ne abandu bosi nibababool'la mbu, “Bwakhabeeye bulahi khulafwila musibala sie Misiri nohomba musitsiimi sino.

³Nisina esiachila OMWAMI nakhuleera musibala ma alekhe khwir'rwe mwihe? Abakhasi befwe nabaana befwe abati balatiilwa. Bwakhabeye bulahi okhukalukha Emisiri.”

⁴Nibabool'lana abene khubene mbu, “Chende khwele omwemeli, ma khukalukhe Emisiri.”

⁵Ma Musa nende Haruni nibasikama nibenamia obweni bwabwe imbeli womukanda kwa Baisiraeli abali nibebunjikhileho.

⁶Ne Yoshwa omusiani wa Nuni nende Kalebu omusiani wa Yefune, abali balala khubalambuuli besibala yisio nibarandula tsingubo tsiabwe musibeela,

⁷ma nibabool'la omukanda kwosi okwa Baisiraeli mbu, “Esibala esia khwalambuuye nikhubir'ramwo, nesibala esilahi okhusila.

⁸OMWAMI naba nakhuyanzila, alakhuhilamwo ma akhuhelesie esibala siobuhinda khandi esieliloba linolu.

⁹Muramukhol'la OMWAMI induli, nohomba muraria abandu abamenya musibala yisio tawe; okhuba nakhubaleche butswa mubutoro. OMWAMI ali n'nefwe, khandi ulechele abanyasaye babwe ababalindanga, kho muraria tawe.”

¹⁰Nebutswa abomukanda bosi baboola mbu balaswe namachina, ma beerwe, nebutswa bungoyingoyi obulafu bwo MWAMI bwalolekhela abandu ba Isiraeli bosi Mwiheema liokhubaho khwo MWAMI.

¹¹OMWAMI nabool'la Musa mbu, “Abandu bano balanjaaya okhwola lina? Balasuula okhuusubila okhwola lina, kata nikali ndakhola akamangalimwa amenji mubo?

¹²Naarume olumbe okhubamuma, nebutswa naakhukhole iwe okhuba samwana lihanga likhongo khandi elietsingufu okhubayomba.”

¹³Musa nabool'la OMWAMI mbu “Ibe wahiinia abandu yaba Emisiri khulwobunyali bubwo. Olwa Abaamisiri beetsa okhuhul'la akokholeye abandubo

¹⁴nababool'le abandu abamenyanga musibala sino. Abandu yaba bali okhuhul'la mbu ibe, OMWAMI, oli halala n'nefwe. Okhuba ibe khandi, ololekhanga moni namoni; lilumbesilio nalio lisinjilanga ikulu wefwe, khandi okhwemel'langa mwilumbesi elili singa esiilo mumubasu, khandi mumul'lo okuli singa esiilo mubutukhu.

¹⁵Kho noba niwira abandu baabo bosi, abetsimbia abahulila akeifumayo balaboola mbu,

¹⁶‘Sichila OMWAMI yaramilwe okhwosia abandu bano musibala esiayabasubisia okhubahelesia, nisio esichil'le nabeer'ra musitsiimi.’

¹⁷Kho luno khusaayanga okhumanyie obunyali bwo, OMWAMI, ma ohesie akawasubisia olwa waboola mbu,

¹⁸‘Ise OMWAMI sindi omwangu okhuhambwa oburima tawe; manyianga obuyanzi obwinji nende obusubilwa, ne ndekhelanga tsimbi nende indiri. Kata mbwo sinyala okhubula okhuhaana esinyasio khumundu wesikha tawe. Mbaananga esinyasio khubaana nende khubetsukhulu kata okhwola khulwibulo lwakhataru nende olwakhane khulwe tsimbi tsiabebuli babwe.’

¹⁹Khusaayanga mbu olekhele abandu bano tsimbi tsiabwe okhuhelana nobukhongo bwobuyanzibwo oburakalukhananga, singa obwa wabalekhela okhurula olwa barula Emisiri kata okhwola luno.”

²⁰OMWAMI nakalusia mbu, “Mbalekheye singa obwa usaayile.

²¹Nebutswa ndesuhanga, siahene oluhono olwasili mwoyo, khandi oluhono lwesibala siosi sisitsuyemwo oluyali lwanje,

²²abulaho khubandu yabo bosi owakhahindile okhwinjila musibala yisi. Bali okhulola obulafu obukhongo obumanyianga okhubaho khwanje nende akamangalimwa aka ndakhola mu Misiri nende musitsiimi, nebutswa bali okhuteema obwesimilisi bwanje hali akhenji khandi nibasuula okhumbulila.

²³Sibalinjilakhwo musibala esiandasubisia okhuhelesia abakuka babwe tawe. Yabo bosi abali okhuusuula sibalenjilamwo tawe.

²⁴Ne sichila omurumikhili wanje Kalebu yali nende omwoyo kundi okwabukhan'ne, khandi yanondanga nomwoyokwe kwosi ndakhamwinjisie musibala esia yali okhulambuula, ne abetsukhulube bakhamenye musibala yisio

²⁵esia Abaamaleki nende Abakanaani bamenyanga mumabanda kasio. Kho mukamba musuukhane mutsie musitsiimi nimulonda khunjila etsitsanga khumukhonokwe Inyanza Inzakhanyu okulangwanga Akaba.”

²⁶OMWAMI nabool'la Musa nende Haruni mbu,

²⁷“Abandu ababi yaba nabatsilil'le okhundekaana okhwola lina? Mal'le okhuchonya khulwo khuhul'la okhwekaana khwabwe!

²⁸Luno bahelesie likalusio lino: ‘Ndesuhanga mbu oluhono lwandi mwoyo, naamukhol'le kosi akamureebanga. Ise OMWAMI mal'le okhuboola.

²⁹Namufwe ne emibili chienywe nachisalanibwe musitsiimi sino. Sichila mwali okhundekaana, yabo bosi ababalwa khwinywe, okhurula khubemihika amakhumi kabili okhutsia ikulu sibakhenjila musibala yisio tawe.

³⁰Ndamusubisia mbu mwakhamenye musibala yisio, nebutswa abulaho kata mulala khwinywe owakhamenyemwo, narali Kalebu omwana wa Yefune nende Yoshwa omwana wa Nuni.

³¹Nebutswa abaana benywe abati abamwaboola mbu bakhayaakwe singa emiandu, nibo abandinjisiamwo bonyene, ne balimenya musibala tsana esia mwali okhusuula, ne siakhabe ingo wabwe.

³²Habula inywe, mwakhafwile musitsiimi sino.

³³Abaana benywe nabo balabetsanga abatimatiimi musitsiimi khulwemihika amakhumi kane, nibasaalilanga khulwe inywe okhubula okhuba abasubilwa khu ise, okhwola olwa muliba nimufwiliye musitsiimi mwesi.

³⁴Mulanyoola esinyasio sietsimbi tsienywe khulwemihika amakhumi kane, buli omuhika mulala khulwe litukhu elala khumatukhu amakhumi kane aka mwalambuul'lamwo esibala. Ne mulamanya esifune sie ise okhumusuula inywe!

³⁵Ndesuhanga mbu naamukhol'le kano, abandu babi inywe abebunjikhanga halala okhuufukula. Inywe mwesi mulafwila musitsiimi muno. Ise OMWAMI mal'le okhuboola.’ ”

³⁶Abandu aba Musa yaruma okhulambuula esibala, bakalusia amang'ana kobubehi ma nibachila abomukanda kwosi nimumumuchil'la OMWAMI.

³⁷Khulwako, OMWAMI yaruma olumbe khubandu abaleera amang'ana kobubehi yako, ma bamala nibafwa.

³⁸Yoshwa omwana wa Nuni nende Kalebu omwana wa Yefune bonyene nibo abasikala mwoyo khubandu yabo abatsia okhulambuula esibala.

³⁹Olwa Musa yabool'la abandu ba Isiraeli amang'ana ako MWAMI yali nabooye, bekhuula okhusila.

⁴⁰Babuukha mukamba tsuli ma nibachaaka okhuseera esibala siebikulu, nibaboola mbu, “Luno khwerechekhele okhutsia habundu aho MWAMI yakhusubisia. Khweyamanga mbu khwakhola tsimbi.”

⁴¹Musa naye naboola mbu, “Kho busina mukhol'langa OMWAMI esikala marwi luno? Simulaba nobulechi tawe.

⁴²Muratikulukha tawe; OMWAMI siali n'nenywe tawe, ne abasuku benywe balamuleka.

⁴³Olwa namwakaane nende Abaamaleki nende Abakanaani namufwile mwihe; OMWAMI salaba n'nenywe tawe sichila simumulondanga tawe.”

⁴⁴Nabo bekhulumamia nibatsia musibala siebikulu nebutswa Lisanduku lie Indakano yo MWAMI nende Musa sibarula mukambi tawe.

⁴⁵Ma Abaamaleki nende Abakanaani abamenyanga mubikulu yibio nibabaseera ma nibabaleka, ne babalondel'la okhwola Horima.