Read lunyore OBUBALI 15 Bible Online

OBUBALI 15 - lunyore bible

OBUBALI 15

¹OMWAMI yahelesia Musa

²amalako kano khulwa Baisiraeli okhulonda olwa nababe nibenjiye musibala esia naabe nabahelesisie.

³Munyala okhuhaana khu MWAMI echulukhi limiiku nohomba likondi liosi kata imbusi singa omusango kwokhusambwa nohomba omusango kundi kwosi khulwo okhuhesia esiesuho, nohomba esihanwa siokhwehaana nohomba mumatukhu kamasabo; okhuhunya khwebihanwa biebiokhulia yibi khuyanzisianga OMWAMI.

⁴Kho uyo ohananga likondi nohomba imbusi singa omusango kwokhusambwa khu MWAMI, okhwola aleere halala nomuruko yikwo, mbu ekilo ndala eyobusie obunyukhe obutsokanibwemwo eliita ndala yamafura,

⁵nende omusango kwobuswache halala nende eliita ndala eyewaini.

⁶Ne nikali mbu limiiku nilio elihanwa singa omusango, lihanwe halala nende etsikilo chibili echiobusie nibutsokanibwemwo eliita ndala nende enusu yamafura singa omusango kwobuswache,

⁷halala nende eliita ndala nende enusu eyewaini khulwo omusango kwokhutsukhil'lwa. Okhuhunya khwemisango yitsi khuyanzisianga OMWAMI.

⁸Ne olwe echulukhi ehanwa khu MWAMI singa omusango kwokhusambwa, nohomba singa omusango kundi okwokhuhesia esiesuho, nohomba singa omusango kwobuhambani,

⁹kho halala nechulukhi tsana, uyo ohaana aleere omusango kwobuswache okuhela etsikilo tsitaru tsiobusie obunyukhe obutsokanibwemwo etsiliita tsibili etsia amafura,

¹⁰halala netsilita tsibili etsiewaini. Okhuhunya khwomusango yiku khuyanzisianga OMWAMI.

¹¹Yibio nibio ebilahaanwa halala nende buli echulukhi nohomba buli limiiku, nohomba buli likondi, kata nende buli imbusi.

¹²Olwa ohaana okhuyomba omuruko mulala, khandi ebihanwa biokhuhanwa halala n'nabio bimeetwe mubuhelani.

¹³Bosi abali abeebule bakhole yaka olwa bahaana esihanwa siebiokhulia siomwayo omulahi khu MWAMI.

¹⁴Ne omucheni owamenyibwa mwinywe, nohomba omundu wosi obetsanga mwinywe mutsinzibulo tsienywe, naba niyenya okhuhaana esihanwa siebiokhulia esiomwayo kwasio kuyanzisianga OMWAMI, kho alonde amalako ake inywe mulondanga.

¹⁵Mumatukhu kosi aketsanga, amalako amatelwa kano kalindwenge mwinywe nende mubacheni abamenyibwa mwinywe. Inywe halala n'nabo muli abafwanani imbeli wo MWAMI.

¹⁶Amalako amatelwa kano nende amachetsiyio kano, karumikhilwe n'nenywe khandi nende abacheni abamenyibwa mwinywe.

¹⁷OMWAMI yahelesia Musa

¹⁸amalako kano khulwabandu ba Isiraeli okhulonda olwa nabenjile musibala esia nabahelesie.

¹⁹Olwa muba nimuliakhwo khubilibwa biesibala yisio, murekhwo ebindi sibeka singa esihanwa esichomekhe khu OMWAMI.

²⁰Olwa muteekha emikaati; omuhayila kwokhuranga okhutekhelwa khubuswache obuhia kuhanwe singa esihanwa esichomekhe khu MWAMI. Yiku kuhanwa singa esihanwa esichomekhe esia muhaananga khubuswache obwokhuranga okhuhulwa.

²¹Mumatukhu kosi aketsanga, esihanwa esichomekhe yisi sihanwe khu MWAMI okhurula khumikaati echiamutekhanga.

²²Nebutswa haundi omundu anyala okhwitsukhan'na narahesisie amalako kosi ako MWAMI yabool'la Musa tawe.

²³Khandi haundi mumatukhu aketsanga abandu nababule okhuhesia ako MWAMI alakanga okhubir'ra mu Musa.

²⁴Nikakhaba mbu kabula okhuhesibwa nabandu khulwa okhukorwa khwabwe, kho baleere echulukhi ndala eyomusango kwokhusambwa, khulwo omwayo okuhunyanga obulahi khu MWAMI, halala nomusango kwobuswache kwayo okwahuchil'lwa nende omusango kwewaini kwayo. Okhumeetakhwo baleere ekhole ndala singa omusango kwetsimbi.

²⁵Omwesaalisi naye akhole omulukha kwokhutsienula abandu ba Isiraeli, nabo balalekhelwa sichila betsukhaniye nibakhol'le amasiamu, ma baleer're omusango kwabwe kwetsimbi singa esihanwa siebiokhulia khu MWAMI.

²⁶Kho omukanda kwosi kwabandu ba Isiraeli balekhelwe, halala nabacheni abamenyibwa mubo, sichila abandu bosi bakhola amasiamu yako.

²⁷Ne omundu mulala niyetsukhan'na nakhol'le tsimbi, kho oleere imbusi isibini eyomuhika mulala singa omusango kwetsimbi.

²⁸Omwesaalisi naye akhole omulukha kwokhusiiya omundu uyo okhurula mutsimbi tsitsie; naye alalekhelwa.

²⁹Amalako amatelwa yako karumikhilwe khulwe uyo okhola ling'ana liosi metsukhan'na kata abe omwibule mubandu ba Isiraeli, nohomba omucheni owamenyibwa mubo.

³⁰Nebutswa ochoomanga okhukhola tsimbi neinjinia, kata nali omwibule nohomba omucheni owamenyibwa, omwene uyo ali nesikha siokhuchaaya OMWAMI, ne okhwola yerwe,

³¹sichila yachaaya ling'ana lia Nyasaye yaboola, nafunaka lilakolie. Okhufwakhwe nokhwa yeleer'ra omwene.

³²Litukhu elala olwa abandu ba Isiraeli bali nibali musitsiimi, banyoola omundu narenyanga tsikhwi khwitukhu lie Sabato.

³³Ne yabo abamunyoola narenyanga bamuleera khu Musa nende Haruni, nende khumukanda kwosi;

³⁴ma nibamura mubulindi, sichila sikali nikaribuuywe aka yali nakhoyele okhukhol'lwa tawe.

³⁵Ma OMWAMI nabool'la Musa mbu; “Omundu uyo yerwe bwirwa; abomukanda kwosi bamulase namachina esioba wekambi.”

³⁶Abomukanda kwosi nibamuhila esioba wekambi, nibamulasa namachina ma nafwa, singa OMWAMI yali nalachile Musa.

³⁷OMWAMI yalaka Musa

³⁸abool'le abandu ba Isiraeli mbu: “Mulombe amayebeyo khumikhanda chietsingubo tsienywe ma murekhwo olutsaha lwabuluu khubuli liyebeyo. Mukholenje mbwo amatukhu kosi aketsanga.

³⁹Nako kalaba khwinywe amayebeyo akokhuhenga nimwitsul'la amalako kosi nimukakhola; ma mulekhenje okhukhupa ise omukongo nimukhola akobwekombi benywe abene nende okhwenya khwemioyo chienywe.

⁴⁰Kho amayebeyo nakamwitsusienje amalako kanje kosi, nimukakhola, nimuba abatsienukhu khu ise Nyasaye wenywe.

⁴¹Nise OMWAMI Nyasaye wenywe, owamuhinia musibala sie Misiri, mbu mbe Nyasaye wenywe. Nise OMWAMI Nyasaye wenywe.”