Read lunyore OBUBALI 17 Bible Online

OBUBALI 17 - lunyore bible

OBUBALI 17

¹OMWAMI yabool'la Musa mbu,

²“Bool'la abandu ba Isiraeli bakhuhe tsindabusi likhumi nachibili ndala okhurula khubuli omwemeli wabuli olwibulo. Ohandike eliira liabuli mundu khundabusiye.

³Ohandike eliira lia Haruni khundabusi ya Lawi. Indabusi ndala elabaho khulwa buli omwemeli wolwibulo.

⁴Ma otsibiikhe Mwiheema liokhubaho khwanje otsire imbeli we Lisanduku lie Indakano aha mbukan'nanga n'nawe.

⁵Ne indabusi eyomundu owa nzia okhulobola elakanikhakhwo obwamu. Munjila iyi ndalekal'la obwekani bwabandu ba Isiraeli, obwa bamumuchil'langa khuibe.”

⁶Kho Musa nal'loma nabandu ba Isiraeli, ma abemeli babwe bosi nibamuhelesia tsindabusi likhumi nachibili, ndala khubuli mulala khubo singa obwetsinzibulo tsiabwe tsiali, ne indabusi ya Haruni yabikhwa halala netsindabusi tsiabwe.

⁷Musa nabiikha tsindabusi yitsio Mwiheema liokhubaho khwo MWAMI, imbeli we Lisanduku lie Indakano.

⁸Ma mukamba olwa Musa yenjila Mwiheema, yalola indabusi ya Haruni eyali yolwibulo lwa Lawi yali niyekanikhilekhwo obwamu. Yali nemulikhile ebimuli, niyaama amalusi amengu.

⁹Ma Musa nahiinia tsindabusi yitsio tsiosi okhurula aha tsiali natsileera khubandu ba Isiraeli aha bali nabamanyia. Nabo balola akali nikekhol'le ma nibabukula buli mundu indabusiye.

¹⁰OMWAMI nabool'la Musa mbu, “Kalusia indabusi ya Haruni imbeli we Lisanduku lie Indakano. Ebiikhweho ebe singa lichetsiyio khu Baisiraeli abe indiri mbu balafwa nibaba nibaralekha okhumumuchila khwabwe.”

¹¹Musa nakhola singa obwa OMWAMI yamulaka.

¹²Ne abandu ba Isiraeli nibabool'la Musa mbu, “Kho yisio nisio esihesi siefwe fwesi!

¹³Buli mundu wosi owesunda ahembi khwiheema okhwola afwe, kho ifwe khuli butswa singa abafu!”