Read lunyore OBUBALI 19 Bible Online

OBUBALI 19 - lunyore bible

OBUBALI 19

¹OMWAMI yalaka Musa nende Haruni

²okhuhaana amalako kano khu Baisiraeli. Muler're Musa nende Haruni ing'ombe inando[7] eralikhwo nobulema bwosi, khandi esili okhureebwakhwo likokolo tawe,

³ma muhelesie omwesaalisi Eliasa. Naye atsihiinie esioba wekambi, omundu achisinze naye nalola.

⁴Ma Eliasa omwesaalisi abukule khumatsahi kayo khusiteresie, nakamiitsa hali khane nakhataru nachoomisie ahe Liheema liokhubaho khwo MWAMI.

⁵Ma omundu asambe ing'ombe tsana halala neliseelo liayo neinyama, namatsahi, nobuse imbeli womwesaalisi.

⁶Ne omwesaalisi abukule olusaala lwomusiita, namabinu, nomukoye omwakhanyu, abifuube mumul'lo.

⁷Ma olunyuma, omwesaalisi asaabe tsingubotsie, niyesinga omubili mumaatsi, ne olunyumakhwo yenjile mukambi; nebutswa omwesaalisi uyo alaba mumusilo okhwola khumukolooba kwelitukhu yilio.

⁸Owokhuchisamba khandi naye asaabe tsingubotsie, niyesinga omubili; naye khandi alaba mumusilo okhwola khumukolooba okwelitukhu yilio.

⁹Ne omundu oli omusiiyikhu ayoye likokhe lieing'ombe tsana, nalibiikha esioba wekambi habundu ahasiyikhu. Libiikhilwe abandu ba Isiraeli okhulomba amaatsi kokhuhinia omusilo. Omulukha yikwo kukholwe khulwo khuhinia.

¹⁰Owokhuyoya likokhe tsana naye asaabe tsingubotsie, naye khandi alaba mumusilo okhwola khumukolooba. Lilako yili lirumikhilwenje amatukhu kosi aketsanga ne okhwola lihesibwe na Baisiraeli nende abacheni abamenyibwa mubo.

¹¹Omundu wosi owakhatiila khumulambo kwomufu wosi abe mumusilo khulwamatukhu kane nakataru.

¹²Omwene uyo yesiiye mumaatsi kokhusiiya khwitukhu liakhataru, nende khwitukhu liakhane nakhataru, ma alaba omusiiyikhu. Ne naba nareesiiya khwitukhu liakhataru nende khwitukhu liakhane nakhataru, sialaba nali omusiiyikhu tawe.

¹³Omundu wosi owakhatiilakhwo khumulambo kwomundu wosi ofwiye, ne naresiiya tawe, amenyanga nali mumusilo, sichila amaatsi kokhusiiya sikamwohwakhwo tawe.

¹⁴Omundu naba nafwila mwiheema, omundu wosi oba naali mwiheema yimwo, olwene yilwo nende omundu wosi oba niyenjila mwo, alaba owomusili amatukhu kane nakataru.

¹⁵Khandi esindu siosi esiba nisiikuukhile, nisirafuunikhilwekhwo esifuunikho tawe, silaba esiomusilo.

¹⁶Kata omundu wosi oba natiilakhwo khumundu owiriywe esioba nolukanga, nohomba khumulambo kwosi, nohomba khwikumba liomundu kata khusilindwa, alaba mumusilo amatukhu kane nakataru.

¹⁷Okhuhiiniaho omusilo yikwo, abandu babukulekhwo khwikokhe lieing'ombe inando eyali okhusambwa khulwokhuhinia tsimbi ma balire mundabu nibatsokanisiamwo amaatsi amalengelu.

¹⁸Ma olwokhuranga, omundu omusiiyikhu abukule amabinu, yene mumaatsi tsana, namiitsa khwiheema, nokhubimanulwa biosi, nokhubandu abaali nibaliho. Olwakhabili, omundu omusiiyikhu amiitse amaatsi tsana khumundu mwene otiil'lekhwo khwikumba, nohomba khu uyo owir'rwe nohomba khusilindwa.

¹⁹Khandi khwitukhu liakhataru nende khuliakhane nakhataru, omundu omusiiyikhu amiitse amaatsi khumundu womusilo uyo. Ne khwitukhu liakhane nakhataru amusiiye, ne omundu wosi asaabe tsingubotsie, niyesinga omubili mumaatsi, ma khumukolooba alaba nali omusiiyikhu.

²⁰Nebutswa omundu wosi oba nali mumusilo ne naresiiya omwene tawe, omundu uyo alatsilil'la okhuba mumusilo sichila amaatsi kokhusiiya sikaali okhwohwa khuye tawe. Afwabianga Liheema lio MWAMI ne salabalwakhwo singa mulala khubandu ba Nyasaye tawe.

²¹Okhwola muhesie lilako lino amatukhu kosi aketsanga. Omundu omiitsanga amaatsi kokhusiiya okhwola asaabe tsingubotsie; omundu wosi otiilakhwo khumaatsi alaba mumusilo okhwola khumukolooba.

²²Ne siosi siosi esiomundu oli mumusilo atiilakhwo, nasio silikwa esiomusilo; ne omundu ositiilakhwo alaba owomusilo okhwola khumukolooba.