Read lunyore OBUBALI 2 Bible Online

OBUBALI 2 - lunyore bible

OBUBALI 2

¹OMWAMI yahelesia Musa nende Haruni amalako kano.

²“Olwa Abaisiraeli bakhoma ekambi yabwe, buli mundu yombokhe liheema lilie hasimanyilo siomukanda kwabwe nende ependela yolwibulo lwabwe. Amahema kombokhwe okhubotokhana Liheema liokhubaho khwanje.

³“Yabo abakhoma ekambi yabwe khulubeka lwebukwe ahe eliuba lirul'langa, nababe abomukanda kwabandu bali hasi hependera ya Yuda, ne Nashoni omwana wa Aminadabu nali niye omwemeli wabwe.

⁴Omukandakwe, yabo ababalwa khubo, bali etsielefu amakhumi kane nakataru natsine nende tsimia tsisasaba.

⁵Yabo abalakhoma ekambi yabwe okhulondokhana n'naye niyabo abolwibulo lwa Isakari, Netsaneli omusiani wa Suari nali niye omwemeli wabwe.

⁶Omukandakwe, yabo ababalwa khubo, bali etsielefu amakhumi karano natsine, netsimia tsine.

⁷Ma olwibulo lwa Sabuloni, Eliabu omusiani wa Heloni nali niye omwemeli wabwe.

⁸Omukandakwe, yabo ababalwa khubo bali etsielefu amakhumi karano natsine natsitaru netsimia tsine.

⁹Yabo bosi ababalwa abokhukambi ya Yuda bali etsielefu emia ndala namakhumi munane natsisasaba, nende tsimia tsine, mumikanda chiabwe. Nibo abanabaranjil'lenje okhurula.

¹⁰“Khulubeka lwenandete, abesimanyilo siomukanda kwa Rubeni nabakhomeho ekambi yabwe. Elisuri omusiani wa Shedeuri nali niye omwemeli weinzu ya Rubeni.

¹¹Omukandakwe, yabo ababalwa khubo, bali etsielefu amakhumi kane natsisasaba, netsimia tsirano.

¹²Yabo abalakhoma ekambi yabwe okhulondokhana n'naye, niyabo abolwibulo lwa Simioni, Selumieli omusiani wa Surishadai nali niye omwemeli wabwe.

¹³Omukandakwe, yabo ababalwa khubo, bali etsielefu amakhumi karano natsirano natsine netsimia tsitaru.

¹⁴Ma olwibulo lwa Gadi, Eliasafu omusiani wa Reneli nali niye omwemeli wabwe.

¹⁵Omukandakwe yabo ababalwa khubo, bali etsielefu amakhumi kane natsirano, tsimia tsisasaba namakhumi karano.

¹⁶Yabo bosi ababalwa abokhukambi ya Rubeni, bali etsielefu emia ndala namakhumi karano nandala, tsimia tsine namakhumi karano. Nabo nababetsenje abakhabili okhurula.

¹⁷“Ma nilwo olweliheema liokhubaho khwo MWAMI nalirulenje okhulondokhwo, halala nekambi ya Balawi hakari wetsikambi tsindi. Singa obwa bakhomanga amaheema kabwe, nimbwo nabarulenje khandi, buli mundu habunduwe khubilolelo biabwe.

¹⁸“Khulubeka lwemasaba, esilolelo siekambi ya Efuraimu silabaho mumikanda chiabwe; Elishama omusiani wa Amihudi nali niye omwemeli wabwe.

¹⁹Omukandakwe, yabo ababalwa khubo, bali etsielefu amakhumi kane netsimia tsirano.

²⁰Yabo abalakhoma ekambi yabwe okhulondokhana n'naye, niyabo abolwibulo lwa Manase, Gamalieli omusiani wa Pedasuri nali niye omwemeli wabwe.

²¹Omukandakwe, yabo ababalwa khubo, bali etsielefu amakhumi kataru natsibili netsimia tsitaru.

²²Ma olwibulo lwa Benjameni, Abidani omusiani wa Gideoni nali niye omwemeli wabwe.

²³Omukandakwe, yabo ababalwa khubo, bali etsielefu amakhumi kataru natsirano, netsimia tsine.

²⁴Yabo bosi ababalwa abokhukambi ya Efuraimu, emikanda chiabwe, bali etsielefu emia ndala namunane, nende emia ndala. Nabo nababetsenje abakhataru okhurula.

²⁵“Khulubeka lwesinyolu, abesimanyilo siomukanda kwa Dani balakhomayo ekambi yabwe. Abieseri omusiani wa Amishadai nali niye omwemeli wabwe.

²⁶Omukandakwe, yabo ababalwa khubo, bali etsielefu amakhumi kasasaba natsibili netsimia tsine natsitaru.

²⁷Yabo abalakhoma ekambi yabwe okhulondokhana n'naye balaba abolwibulo lwa Asheri; Pagieli omusiani wa Okirani nali niye omwemeli wabwe.

²⁸Omukandakwe, yabo ababalwa khubo, bali etsielefu amakhumi kane nandala netsimia tsirano.

²⁹Ma olwibulo lwa Nafutali; Ahira omusiani wa Enani nali niye omwemeli wabwe.

³⁰Omukandakwe, yabo ababalwa khubo, bali etsielefu amakhumi karano natsitaru netsimia tsine.

³¹Yabo bosi ababalwa abokhukambi ya Dani bali etsielefu tsimia amakhumi karano natsine natsitaru netsimia tsisasaba. Nibo abalamal'likha okhurula, khubilolelo biabwe.”

³²Yabo nibo abandu ba Isiraeli ababalwa bosi mubilibwa biabwe; mutsikambi tsiabwe, nende mumikanda chiabwe, bali etsielefu tsimia tsisasaba natsitaru netsimia tsirano namakhumi karano.

³³Nebutswa Abalawi sibabal'lwa mubandu ba Isiraeli tawe, singa butswa obwa OMWAMI yalaka Musa.

³⁴Kho abandu ba Isiraeli bakhola amang'ana kosi ako MWAMI yalaka Musa. Bakhoma etsikambi, buli mundu hasilolelo siabwe, khandi olwa bachaaka okhuchenda, buli mundu yalinji mubeinyumba yabwe, mubilibwa biabwe.