Read lunyore OBUBALI 20 Bible Online

OBUBALI 20 - lunyore bible

OBUBALI 20

¹Mumwesi kwokhuranga omukanda kwosi okwa Baisiraeli kwenjila musitsiimi sia Sini ma nibamenya musibala sia Kadeshi; naye Miriamu nafwilayo, nayabilwa ebwene yiyio.

²Ne habwene yaho amaatsi sikalikhwoho khulwa abomukanda tawe; nabo nibebunjikha halala okhwekaan'na Musa nende Haruni.

³Abandu bekaana nibaboola mbu, “Bwakhabeye bulahi nikhwakhafwiliye imbeli we Liheema lio MWAMI halala na Baisiraeli basiefwe.

⁴Busina nimukhuleera ifwe musitsiimi muno, mbu ifwe nende emiruko chiefwe khufwilemwo?

⁵Khandi busina nimukhuhinia okhurula Emisiri nimukhuleera habundu habi ahesindu sirakhulanga hano? Sihali habundu hokhuraaka amatuma, nohomba emikhuyu, nohomba emisabibu kata emikomoli tawe; kata amaatsi kokhunywa kabulaho.”

⁶Ma Musa nende Haruni nibarula ahabandu bali nibenjikhile nibatsia habwinjil'lo bwe Liheema liokhubaho khwo MWAMI nibeenamia obweni bwabwe hasi; oluyali lwo MWAMI nilubalolekhela.

⁷OMWAMI nabool'la Musa mbu,

⁸“Bukula indabusi eli imbeli we Lisanduku lie Indakano, ma obunjelesie abomukanda, ibe nende Haruni omwana wenywe; ma mul'lome khulwanda yilwo imbeli wabwe, mbu luhaane amaatsi kalwo; ne olwanda lulahinia amaatsi. Ibe olahinia amaatsi okhurula mulwanda khulwabandu okhunywa khandi nende emiruko chiabwe.”

⁹Kho Musa yatsia nabukula indabusi tsana singa OMWAMI yali namulachile.

¹⁰Ma Musa nende Haruni nibabunjelesia omukanda halala imbeli wolwanda, naye nababool'la mbu, “Hulile inywe abeinduli; kali ifwe khwakhamuhiniisia amaatsi mulwanda imu noho?”

¹¹Musa nachinguula omukhono kukwe, nakhupa olwanda neindabusiye khabili. Amaatsi nikarulamwo amenji, ma abomukanda nibanywa, khandi emiruko chiabwe nichinywa.

¹²OMWAMI nabool'la Musa nende Haruni mbu, “Sichila simwabeye nobusubili obuhela mu ise khulwokhuhaana oluyali khubunyali bwanje obutsienukhu imbeli wabandu ba Isiraeli tawe, sinamubemel'le okhwola musibala sia ndesuha okhubaha tawe.”

¹³Kano kekholekhela Meriba[8], aha abandu ba Isiraeli bekaan'na OMWAMI, naye namanyia obutsienukhubwe mubo.

¹⁴Ma Musa naruma abarumwa khumuruchi wa Edomu okhurula Kadeshi, naboola mbu, “Abekho benywe ba Isiraeli baboolanga mbu, mumanyile amatinyu kosi akakhukwila,

¹⁵singa obwa abakuka befwe bakongoma nibatsia Emisiri, ifwe nikhumenya Emisiri oluhono olurambi; Abaamisiri nabo nibakhukhupia khusibi, ifwe nende abakuka befwe.

¹⁶Ne olwa khwalakayila OMWAMI, yahulila omwoyo kwefwe, naruma om'malaika, nakhuhiinia Emisiri; ne lola, khuli hano Kadeshi, litaala elili khulwakho lwesiba sienywe.

¹⁷Khumusaayanga mbu mukhuhuchiil'le khubir're musibala sienywe. Sikhulabir'ra m'mukunda kwosi, kata mumukunda kwemisabibu nohomba kata okhunywa khumaatsi akomumayabo tawe. Khulabir'ra khumuhanda kwomuruchi; sikhulebera khumukhono omusaatsa kata omukhasi tawe, okhwola olwa khuba nikhubir're esibala sienywe.”

¹⁸Abaedomu nabo nibabakalusia mbu “Murakhabir'rakhwo musibala siefwe tawe; khwakharula netsinganga okhumulwana.”

¹⁹Ne abandu ba Isiraeli nibababool'la mbu, “Khulalonda khumuhanda kwonyene; ne kata ifwe nikhuba nikhunywakhwo khumaatsi kenywe nohomba emiruko chiefwe nichinywakhwo nakhurunje obukusi bwako — esiakhwenyanga butswa nokhubir'ramwo khubilenje, khubula akandi.”

²⁰Abaedomu nibakalusia nibaboola mbu, “Simulabir'ramwo tawe,” ma nibarula okhutsia okhuseera abandu ba Isiraeli nibali nabasikari abetsingufu tsinyinji.

²¹Khulwa mbu abandu ba Edomu bekal'la Abaisiraeli okhubir'ra musibala siabwe, Abaisiraeli basukhana okhurula khubo nibalonda khunjila yindi.

²²Abomukanda kwosi okwa Abaisiraeli barula Kadeshi, ma niboola hasikulu sia Hori,

²³esili khulwakho lwa Edomu. Habwene yaho, OMWAMI yal'loma na Musa nende Haruni naboola mbu,

²⁴“Haruni siyetsa okhwinjila musibala esia ndesuha okhuhelesia abandu ba Isiraeli tawe; yetsa okhufwa sichila ibe n'naye mwali okhusuula okhulonda lilako lianje nimuli hamaatsi ka Meriba.

²⁵Bukula Haruni nende Eliasa omusianiwe, witse n'nabo khusikulu sia Hori;

²⁶ma ohiinie Haruni tsingubotsie tsiobwesaalisi, otsibiikhe khu Eliasa omusianiwe ebwene iyo.”

²⁷Kho Musa nakhola singa OMWAMI yamulaka. Baniina khusikulu sia Hori imbeli womukanda kwosi.

²⁸Ma Musa nahiinia Haruni tsingubotsie tsiobwesaalisi namubiikha Eliasa omusianiwe ma Haruni nafwilayo khubutenje bwesikulu tsana. Ma Musa nende Eliasa nibeekha okhurula khusikulu,

²⁹Ne olwa abomukanda kwosi balola mbu Haruni ufwiye, bosi bamwekhuula khulwa amatukhu amakhumi kataru.