Read lunyore OBUBALI 21 Bible Online

OBUBALI 21 - lunyore bible

OBUBALI 21

¹Olwomuruchi Omukanaani owamihanga Aradi esili enandete wa Kanaani yahulila mbu Abaisiraeli bali nibetsanga khunjila ya Atsarimu, yabaseera ma nahamba abandi khubo.

²Ma Abaisiraeli nibesuha khu MWAMI mbu; “Noba niwakhakhuha obulechi khubandu bano, kho khulabahaana kupu khuibe halala namatookho kabwe ma khubamume.”

³OMWAMI yahul'la omwoyo kwa Baisiraeli ma nabakhonya okhuleka Abakanaani. Kho Abaisiraeli babamuma nibabamulula bosi halala namatookho kabwe kosi ma nibakulikha habundu tsana Horima[9].

⁴Abaisiraeli barula musikulu sia Hori nibalonda khunjila yokhutsia khumukhonokwe Nyanza Inzakhanyu okulangwanga Agaba kho babotokhane esibala sia Edomu. Nebutswa abandu bamala nibasinyikhila khunjila,

⁵ma nibamumuchil'la Nyasaye, kata nende Musa, nibaboola mbu, “Busina nimukhuhinia Emisiri, mbu khufwile musitsiimi muno ahamaatsi nende kata emikaati chibulaho? Sikhunyala okhutsilil'la okhwefwila ebiokhulia ebibi yibi tawe!”

⁶Ma OMWAMI naruma tsinzokha tsiobusungu mubandu, natsio nitsiluma abandu, ma Abaisiraeli abenji nibafwa.

⁷Kho abandu nibatsia khu Musa nibaboola mbu, “Khwon'ne, sichila khwali okhumumuchil'la OMWAMI, kata nende ibe. Luno saaya OMWAMI mbu akhuhiiniekhwo tsinzokha tsino.” Ma Musa nasaayila abandu.

⁸Ma OMWAMI nabool'la Musa alombe inzokha yomukasa ma achire khumusaala kho mbu mundu wosi owakhalumwa netsinzokha yitsio, naaba niyakhachihengakhwo alaba omulamu.

⁹Kho Musa nalomba inzokha yomukasa, nachira khumisaala. Omundu wosi owe inzokha yali neelumile ahenge khu inzokha yomukasa yiyo, ma abe omulamu.

¹⁰Abandu ba Isiraeli bachenda, ma nibakhupa ekambi yabwe habundu ahalangwa mbu Obotsi.

¹¹Nibachenda nibarula Obotsi nibakhupa ekambi yabwe mumukunda kwa Abarimu, musitsiimi esili ahembi Moabu, esiahenga ahe eliuba lirul'langa.

¹²Nibarulayo nibachenda nibakhupa ekambi mwibanda lia Seredi.

¹³Nibarulayo ma nibatsia okhukhupa ekambi injelekha wa Arinoni, omuchela okuli musitsiimi esipakananga munzakho nende esibala sia Amori (Arinoni nikwo olwakhwo lwa Moabu, hakari wa Moabu nende Amori).

¹⁴Niko akachila nikahandikwa musitapu sia Mahe ko MWAMI mbu, litaala lia Wahebu elili mu Sufu, nende amabanda nemichela chia Arinoni,

¹⁵nebikongomo biamabanda akoolanga khwitaala lia Ari, nende khulwakho lwa Moabu.

¹⁶Nibarula yaho nibatsia khwiyabo lia Beeri; ne habwene yaho OMWAMI nabool'la Musa mbu, “Bunjelesia abandu, nase nambahelesie amaatsi.”

¹⁷Ma Isiraeli nibemba olwembo luno mbu: Senukha, iwe liyabo! Nefwe khulaliembele olwembo lwomulembe.

¹⁸Liyabo elia abakhulundu bayaba khandi nende abemeli babandu, eliayabwa neindabusi yobwami. Nibarula musitsiimi nibatsia Matana.

¹⁹Ma nibarula Matana nibatsia Nahalieli; nibarula Nahalieli nibatsia Bamotsi;

²⁰nibarula Bamotsi nibatsia mwibanda elili mutsingongo tsia Moabu, ahembi khubutenje bwa Pisiga, obuhenjele hasi musiyieyie.

²¹Ma abandu ba Isiraeli nibaruma abarume khu Sihoni omuruchi wa Amori nibaboola mbu,

²²“Ohuchiil'le khubir're musibalasio. Ifwe halala nebiayo biefwe sikhulebera okhwinjila mumukunda kwosi, kata mumukunda kwemisabibu tawe, kata sikhulanywa khumaatsi akomumayabo kenywe tawe. Khulabir'ra khumuhanda kwomuruchi, okhwola olwa khulaba nikhubir're mulukongo lulwo.”

²³Nebutswa sihoni siyahuchiil'la abandu ba Isiraeli okhubir'ra musibalasie tawe. Yabunjelesia abasikaribe bosi, natsia Yahasi khulwo okhuseera Abaisiraeli.

²⁴Nebutswa Abaisiraeli beera abandu ba Sihoni abenji mwihe nibabukula esibala siabwe okhurula Arinoni okhwola Yaboku, khusibala sia Baamoni, okhuba olwakho lwa Baamoni lwali nilwalindwa butinyu.

²⁵Abandu ba Isiraeli babukula amataala ka Baamori yako kosi; halala nende Heshiboni nende mumataala akali ahembi n'nalio kosi.

²⁶Heshiboni liali litookho likali elia Sihoni omuruchi wa Amori, owali niyaseera uyo owalinji omuruchi wa Moabu, ma yali niyabukula esibalasie siosi okhwola khumuchela kwa Arinoni.

²⁷Khulwe yako abarel'lesi betsinyembo bembanga nibaboola mbu: “Mwitse Heshiboni, Litookho likali lia Sihoni khulole niliombokhwa obuhia nilisinjisibwa.

²⁸Litukhu lindi abasikari ba Sihoni barula mu Heshiboni singa omul'lo; Bamuma litookho lia Ari mu Moabu, nibalia bulia ebikulu bia Arinoni yemukulu.

²⁹Mulitsiboolelwa, inywe abandu ba Moabu! Inywe abekayakayanga Kemoshi, mumal'lwe pe! Nyasaye wenywe yalekha abandu okhuba abatiima musibala, ne abakhasi benywe nibakwa abasumba ba Sihoni omuruchi wa Amori.

³⁰Nebutswa luno abolwibulo lwabwe batibile, okhurula Heshiboni okhwola Diboni; okhurula Nashimu okhwola Nofa, ahembi Medeba.”

³¹Nimbwo abandu ba Isiraeli bamenya musibala sia Amori.

³²Musa naruma abandu okhulambuula Yaseri. Abaisiraeli nibabibukula halala namataala akali ahembi n'nalio, nibakhunga Abaamori abali nibalimwo.

³³Ma Abaisiraeli nibasuukhana nibalonda khunjila etsitsanga Bashani; ne Ogu omuruchi wa Bashani narula halala nende abasikaribe bosi, okhubaseer'ra Edirei.

³⁴OMWAMI nabool'la Musa mbu, “Oramuria tawe. Nzia okhukhuha obulechi khuye nende khubasikaribe bosi halala nesibalasie. Nawe omukhol'le singa obwa wakhol'la Sihoni omuruchi wa Amori, owamihanga Heshiboni.”

³⁵Kho Abaisiraeli nibeera Ogu halala nabaanabe, nende abandube bosi, sibalekhakhwo omundu wosi tawe. Bamala nibabukula esibalasie nibamenyamwo.