Read lunyore OBUBALI 22 Bible Online

OBUBALI 22 - lunyore bible

OBUBALI 22

¹Abandu ba Isiraeli batsilil'la noluchendo ma nibakhoma ekambi yabwe musipaapi sia Moabu ebukwe wa Yorodani ehengan'ne nende Yeriko.

²Ne olwa Balaki omwana wa Sipori omuruchi wa Moabu yahul'la kosi aka Baisiraeli bali nibakholeye Abaamori, khandi obwinji bwa Baisiraeli,

³ye halala nabandube bosi baria okhusila.

⁴Abandu ba Moabu nibabool'la abemeli ba Midiani mbu, “Omukanda kuno kwitsa okhukhomba ebindu biosi ebiamubotokhan'ne singa obwe echulukhi ekhombanga obunyasi bwomubwayilo.” Kho Balaki omuruchi wa Moabu,

⁵naruma abarume khu Balaamu omusiani wa Beori owali nali Petsori, ahembi nomuchela kwa Efurate musibala sia Amawu. Bamuleer'ra amang'ana kano okhurula khu Balaki: “Nyenyanga omanye mbu luliho olwibulo lwabandu olurul'le Emisiri; ne abandu balwo bamal'le okhulanda khusibala siosi, ne baboolanga nababukule esibala siefwe, ne bamenyele ahembi khuise.

⁶Bo nabenji okhuyomba ifwe, khulwe yako khusaayanga mbu witse unaamile abandu bano esilaamo siobubi. Haundi khwakhanyala okhubaleka, ma khubakhunge okhurula musibala. Manyile mbu omundu wosi owosabilanga ikhabi ahebwanga ikhabi, ne owa olaamanga esilaamo siobubi, abetsanga musilaamo siobubi singa mbwo.”

⁷Kho abemeli ba Moabu nende aba Midiani barulaho nibali nende emirungo chiokhuhaana khulwesilaamo, nibatsia khu Balaamu, nibamubool'la amang'ana ka Balaki.

⁸Balaamu naye nabakalusia mbu, “Mulakona hano obutukhu buno, ne namukalusia ling'ana singa obwo MWAMI nabe niyambooleye mukamba.” Kho abemeli ba Moabu nibakona owa Balaamu.

⁹Nyasaye yeetsa khu Balaamu namureeba mbu, “Nibandu sina bano aba oli n'nabo?”

¹⁰Balaamu namukalusia naboola mbu, “Balaki omwana wa Sipori, omuruchi wa Moabu, niye obarumile okhumbool'la

¹¹mbu, olwibulo lwabandu olurul'le Emisiri lumal'le okhulanda khusibala siosi. Ne luno yenyanbga ise nzie okhumulakila esilaamo siobubi khubandu yabo, kho abe onyala okhubaseera nende okhubakhunga?”

¹²Ma Nyasaye nabool'la Balaamu mbu, “Oratsia n'nabo tawe khandi oralaama abandu ba Isiraeli esilaamo siobubi tawe; sichila ise ndamala okhubaamila ikhabi yanje.”

¹³Kho Balaamu yahachila okhubuukha, nabool'la abarume ba Balaki mbu, “Kalukhe musibala sienywe; OMWAMI yangayile mbu ratsia n'nenywe tawe.”

¹⁴Kho barula, nibatsia khu Balaki, nibaboola; “Balaamu yali okhusuula okhwitsa n'nefwe.”

¹⁵Ma Balaki naruma abemeli bandi abayombele abokhuranga mubwinji khandi muluyali.

¹⁶Nabo batsia khu Balaamu, nibamubool'la amang'ana kano okhurula khu Balaki, “Noyanza orahuchil'la ling'ana liosi elikhukaya okhwola aha ndi tawe!

¹⁷Nakhurunge esihanwa esikhongo okhusila, kata elia umbool'la liosi nakhukhol'le. Khulwe yako yanza witse undachile abandu bano esilaamo siobubi.”

¹⁸Balaamu naye nakalusia nabool'la abemeli ba Balaki mbu, “Kata Balaki niyakhamba efetsa yosi nende etsahabu yosi eli hangohe, sindakhanyala okhusiila khwilako lio MWAMI Nyasaye wanje, okhukhola amakali nohomba amatu tawe.

¹⁹Nebutswa musaayanga mbu nimuyanza mukone hano, singa obwa bandi babeye okhukona hano, kho nase nzia okhumanyilisia nimang'ana sina ako MWAMI yeetsa okhumbool'la khandi.”

²⁰OMWAMI yeetsa khu Balaamu mubutukhu, namubool'la mbu, “Abandu yabo nibaba nibetsele okhukhulanga, rula otsie n'nabo; nebutswa ling'ana elia nakhubol'le nilio lionyene elia nokhole.”

²¹Kho nibusieye litukhu elialondakhwo Balaamu yabuukha, niyekhala khupundaye natsia nabemeli ba Moabu.

²²Nyasaye yali okhuhambwa noburima khulwo okhutsia khwa Balaamu, ne olwa Balaamu yali niyelusianga epundaye nali halala nabarumikhilibe babili, Om'malaika wo MWAMI yasinjila hakari weinjila okhumwikal'la okhubira.

²³Olwe epunda yalola om'malaika wo MWAMI nasinjiiye khunjila narechekhele olukangalwe nalutiil'le mumukhono; yeebera okhurula khunjila niyinjila mumukunda. Balaamu yakhupa epunda iyo ma nachikalusia khunjila.

²⁴Ma om'malaika wo MWAMI nasinjila aheinjila yali inyelele hakari wemikunda chibili chiemisabibu, echili namasisi kamachina elubeka nende elubeka.

²⁵Ne olwe epunda yalola om'malaika wo MWAMI yanin'na khwisisi, nekhuluul'la esilenje sia Balaamu khwisisi. Balaamu nachikhupa khandi.

²⁶Khandi om'malaika wo MWAMI niyesunda hambeli, nasinjila habundu weinjila yali inyelele, ahobweyangu bwabula obwokhusukhana okhutsia khumukhono musaatsa nohomba khumukhono mukhasi tawe.

²⁷Luno olwe epunda yalola om'malaika wo MWAMI, yakona hasi, Balaamu nali khuyo. Balaamu yamala asinyikhe khandi ma nakhupa epunda nomutiichilokwe.

²⁸Ma OMWAMI yakhola epunda okhul'loma, nayo nebool'la Balaamu mbu, “Nisina esia khukholeye esichilanga niukhupa hali khataru khosi?”

²⁹Balaamu nakalusia nabool'la epunda mbu, “Sichila ukhol'langakhwo omusino; ndaba nindi nolukaka mumukhono kwanje luno, khane ndakhakhwira.”

³⁰Epunda nebool'la Balaamu mbu, “Ise sindi nise epundayo, eya wachendelangakhwo amatukhu kosi akobulamubwo? Mbula ndakhukhol'lakhwo singa mbu litukhu liosi?” Naye naboola “Tawe.”

³¹Ma OMWAMI niyekula tsimoni tsia Balaamu, naye nalola om'malaika wo MWAMI nasinjiiye khunjila niyerechekhele nolukangalwe nalutiil'le mumukhono; ma Balaamu nakwa hasi mafungama.

³²Om'malaika wo MWAMI namureeba; “Nisina esichil'le nokhupa epundayo hali khataru khosi? Nzitsile okhukhwikal'la, sichila sinyenyele otsie oluchendo yilu tawe.

³³Nebutswa epundayo yali okhundola, niyebera imbeli wanje hali khataru khosi. Elaba neereber're okhurulakhwo, khane ndakhakhwir're, nayo ndakhachihonokosisie ebe mwoyo.”

³⁴Kho Balaamu nabool'la om'malaika wo MWAMI mbu, “Khol'le obwoni, simanyilenje mbu usinjiye khunjila okhunzikal'la tawe. Ne luno noba nololanga nobubi okhutsilil'la noluchendo yilu, ndakalukha aharul'le.”

³⁵Nebutswa om'malaika wo MWAMI nabool'la Balaamu mbu, “Otsie nabandu bano; nebutswa ling'ana elia nakhubool'le, nilio elia noboole lionyene.” Kho Balaamu natsilil'la halala nabemeli ba Balaki.

³⁶Ne olwa Balaki yahul'la mbu Balaamu yetsanga, yarula natsia okhumwakan'na mwitookho elilangwanga Ari, litookho eliombokhwa khuluchinga lwomuchela kwa Arinoni, khundulo khwesibala sia Moabu.

³⁷Balaki nabool'la Balaamu mbu, “Busina orayitsa olwa ndarumania amang'ana olwokhuranga mbu witse? Wapaalanga sindi onyala okhukhurunga bulahi tawe?”

³⁸Balaamu nakalusia, namubool'la mbu, “Lola nzitsile. Ne luno ndi nabunyali sina? Nyala okhuboola yako aka Nyasaye yambool'la mboole.”

³⁹Ma Balaamu natsia nende Balaki, mwitookho lia Kiriatsi Husotsi.

⁴⁰Ma Balaki nakhola emisango chetsing'ombe, namakondi, ne nahaana etsindi khu Balaamu nende khubemeli aba yali n'nabo.

⁴¹Ma mukamba tsuli kwelitukhu elialondakhwo Balaki nabukula Balaamu, ma namuhila Bamotsi Baali; ne habwene yaho Balaamu yalola abandu ba Isiraeli abali ahembikhwo.