Read lunyore OBUBALI 23 Bible Online

OBUBALI 23 - lunyore bible

OBUBALI 23

¹Balaamu nabool'la Balaki mbu, “Unyombokhele hano tsisambwa tsine natsitaru ma under're etsichulukhi tsine natsitaru nende amamiiku kane nakataru.”

²Balaki nakhola singa obwa Balaamu yaboola, ma ye nende Balaamu nibahaana omusango kwechulukhi nelimiiku khubuli olusambwa.

³Balaamu nabool'la Balaki mbu, “Sinjila hamisangochio emisambe, nase nzie okhulola nikali OMWAMI aleetsa okhunzakaan'na. Liosi elia yetsa okhumanyia ndakhubool'la.” Ma natsia yenyene habutenje bwesikulu,

⁴ma Nyasaye namwakaan'na. Balaamu namubool'la mbu “Mal'le okhurechekha tsisambwa tsine natsitaru ma mban'ne omusango kwechulukhi nelimiiku khubuli olusambwa.”

⁵Ma OMWAMI nabool'la Balaamu akaboola ma namuruma akalukhe khu Balaki, namang'ana tsana.

⁶Kho yakalukha ma nanyoola Balaki nasinjiiye hamisangochie emisambe, nali halala nabemeli ba Moabu.

⁷Kho Balaamu yaribula oburoobibwe, naboola mbu; “Balaki omuruchi wa Moabu yambiinisie okhurula Siria mubikulu biebukwe; abooye mbu, ‘Witse unaamile abandu ba Isiraeli esilaamo siobubi.’

⁸Nase ndakhanyala mbwena okhumulaka esilaamo siobubi, owa Nyasaye aralachile esilaamo siobubi?

⁹Okhurula khubutenje biebikulu ndali okhumulola, ne okhurula khubikulu ebit'ti ndali okhumuhenga. Lola, nolwibuli lwabandu olumenyanga lwonyene, bamanya mbu balaamilwa tsikhabi okhuyomba amahanga kandi.

¹⁰Abolwibulo lwa Isiraeli bali singa olukhuukhi. Nabenji okhusila abarabbalikha. Lekha male amatukhu kanje singa mulala khubandu ba Nyasaye. Lekha fwe mumulembe singa abalunji.”

¹¹Ma Balaki nabool'la Balaamu mbu, “Kho nisina esia ukholeye? Khuleer're hano mbu olache abasuku banje esilaamo siobubi, ne lola, ubasabiiye butswa ikhabi.”

¹²Balaamu nakalusia naboola mbu, “Ise nyala okhuboola butswa ako MWAMI yambool'langa mboole.”

¹³Ma Balaki namubool'la mbu, “Yanza witse n'nase, khutsie habundu undi, aha wakhanyala okhubalola; olalola abali ahembi bonyene; siolabalola bosi tawe; ne okhurula yaho obandachile esilaamo siobubi.”

¹⁴Namuhila mumukunda kwa Sofimu, khubutenje bwa Pisiga. Ebwene y'yo yombokhakhwo tsisambwa tsine natsitaru, ma nahaana omusango kwechulukhi nende okwelimiiku khubuli olusambwa.

¹⁵Balaamu nabool'la Balaki mbu, “Sinjila hano hamisangochio emisambe, nisitsia okhubukaana no MWAMI hala.”

¹⁶Ne OMWAMI namwakaan'na Balaamu, namubool'la akanaboole, ma namuruma akalukhe khu Balaki namang'ana tsana.

¹⁷Balaamu nakalukha aha Balaki yali nali, nanyoola nasinjiiye hamisangochie emisambe, halala nabemeli ba Moabu. Balaki namureeba ako MWAMI yali nabooye.

¹⁸Kho Balaamu naribula oburoobi buno: “Balaki omusiani wa Sipori, yitsa ohul'le amang'ana kanje.

¹⁹Nyasaye siali singa abandu ababehanga tawe. Ye siali omundu owakhakalukha inyuma mumapaalo tawe. Olwa yesuhanga, ahesianga ebiesuhobie; kata olwa al'lomanga ne nikekhola.

²⁰Lola, mal'le okhulakwa okhusaba ikhabi; Nyasaye naba nahaan'ne ikhabi, nase sinyala okhuchisukhania tawe.

²¹Mengele ma nduutsi mbu Isiraeli, sinabanyoole amanyakhano nende amasiila tawe. OMWAMI Nyasaye wabwe ali n'nabo halala; ye nomuruchi wabwe.

²²Nyasaye wabahinisie Emisiri, ali netsingufu etsili singa etsieimboko.

²³Tooto mwene, bubulaho obufumu kata obufila, obunyala okhurumikhilwa khubandu ba Isiraeli tawe. Luno kalaboolwanga khu Isiraeli mbu, ‘Lole esia Nyasaye akhol'le.’

²⁴Olwibulo lwa Isiraeli luli singa esimba yetsingufu, siehulukhanga tawe okhwola olwa erandul'la nende okhulia inyama khandi okhwola olwa elaba nenyweeye khumatsahi keyabo abayir're.”

²⁵Ma Balaki nabool'la Balaamu; “Noba noralakakhwo Abaisiraeli esilaamo siobubi, kho orabbasabilakhwo ikhabi tawe.”

²⁶Ne Balaamu nakalusia namubool'la mbu, “Sindabeeye okhukhubool'la mbu kosi ako MWAMI aboola, khatimba ngakhole?”

²⁷Ma Balaki nabool'la Balaamu mbu, “Witse nase khuhile habundu undi. Haundi Nyasaye alayanza mbu okhurula yaho obandachile esilaka munwa.”

²⁸Kho Balaki nahila Balaamu khubutenje bwa Peori, obuli ahembi musitsiimi.

²⁹Balaamu nabool'la Balaki “Unyombokhele hano tsisambwa tsiemisango tsine natsitaru, niurechekhela etsichulukhi tsine natsitaru nende amamiiku kane nakataru.”

³⁰Balaki nakhola singa obwa Balaamu yaboola, nahaana omusango kwechulukhi nende okwelimiiku khubuli olusambwa.