Read lunyore OBUBALI 24 Bible Online

OBUBALI 24 - lunyore bible

OBUBALI 24

¹Ne olwa Balaamu yalola mbu OMWAMI uyanzile okhuhelesia Isiraeli ikhabi, siyatsia singa obwa yali nakhol'le amatukhu kandi okhukhaaba obulakuli tawe; nebutswa yachooma okhutsia musitsiimi.

²Ma Balaamu yachinguula tsimoni, nalola Isiraeli nibamenyanga mutsikambi okhulondokhana netsinzibulo tsiabwe. Omwoyo wa Nyasaye yenjila muye,

³ma naribula oburoobibwe, naboola mbu, “Amang'ana ka Balaamu omwana wa Beori, amang'ana komundu oweimoniye elolanga bulahi.

⁴Omundu onyala okhuhul'la aka Nyasaye aboolanga. Tsimoni tsianje nitsirangal'le, ndolanga. Ndolanga amabisulo okhurula khu Nyasaye Wokhunyala Biosi.

⁵Amaheema ka Isiraeli nakobukondo obulahi okhusila;

⁶singa tsinyaali tsiemisaala tsiamasindu, khandi singa emikunda echili khumwalo, singa ebikakha ebia OMWAMI yaraaka, singa emisaala chiomusiita echili hamaatsi.

⁷Balanyoola ifula inyinji okhukwa; ne balaraaka imwo yabwe mumikunda etsilimwo amaatsi akahela. Omuruchi wabwe alaba omukhongo okhuyomba Akaki, oburuchi bubwe bulalanda esibala siosi.

⁸Nyasaye yabahinia okhurula Emisiri, abalwan'nanga singa imboko. Balalumaka abasuku babwe, nibafunaka amakumba kabwe mubitonye, nibafunaka tsisele tsiabwe.

⁹Lihanga lifwana esimba yobunyali; olweba nekonele hasi abulaho owakhateema khuchibusia. Omundu wosi oreebela Isiraeli ikhabi naye alanyoola ikhabi. Ne uyo olaamila Isiraeli obubi naye alalaamwa.”

¹⁰Ma Balaki niyelumaka amakhono khulwoburima obukali nabool'la Balaamu, “Khulanjile mbu olache abasuku banje esilaamo siobubi; nebutswa, ubasabiye ikhabi, hali khataru khosi.

¹¹Khulwe yako luno wilukhe otsie ouwo; ndali nimbaalanga mbu ndakhakhuhelesia omurungo omukali; nebutswa OMWAMI ukhwikaliye okhunyoola omurungo tsana.”

¹²Ne Balaamu nabool'la Balaki mbu, “Ndabooleye abarumwabo abawarumila mbu,

¹³‘Kata Balaki niyakhamba efetsa yosi nende etsahabu yosi, eli hangohe, sindakhanyala okhusiila khwilako lio MWAMI, okhukhola amalahi kata amabi khubwanje tawe. Elio MWAMI yambool'la, nilio lionyene elia mboola.’ ”

¹⁴Balaamu nabool'la Balaki mbu, “Ne luno ngalukhanga khubandu banje. Nebutswa nisili okhutsia khuchetsiyianga akabandu yabo balakhol'la abandubo mumatukhu ketsanga.”

¹⁵Kho yaribula oburoobi bubwe naboola mbu, “Amang'ana ka Balaamu omusiani wa Boeri, amang'ana komundu oweimoniye elolanga bulahi.

¹⁶Omundu onyala okhuhul'la aka Nyasaye aboolanga nanyoola obumanyi oburulanga khu Nyasaye oli ikulu okhusila, tsimoni tsianje nitsirangal'le ndolanga. Ndolanga amabisulo ake Uyo Owokhunyala Biosi.

¹⁷Ise menganga khu ketsanga; ne ndolanga lihanga lia Isiraeli. Omuruchi ofwana inyininyini yobulafu obukali yakhabukhe okhurula mwihanga yilio. Singa inyininyini ekwitsanga yakharuke Isiraeli, yakhatubule abemeli ba Moabu bosi, ne nekoka abandu ba Setsi bosi hasi.

¹⁸Alaleka abasuku baabe mu Edomu, ma abukule liloba liabwe okhuba omwandu kukwe; ne abandu balatsilil'la okhuba nobulechi.

¹⁹Lihanga lia Isiraeli lilabasen'na hasi, ndimalilanga okhumulula ababa nibasikalangamwo.”

²⁰Ne mwibisulolie, Balaamu yalola Abaamaleki ma naribula amang'ana koburoobi kano: “Amaleki liali lihanga lietsingufu okhuyomba kosi. Nebutswa mukhumal'likha liakhakore inziayo.”

²¹Khandi mwibisulolie yalola Abakeni ma naribula amang'ana koburoobi kano: “Habundu ahomenyele halindwa bulahi, nahomulembe singa esitsu siarebwa khwichina lirambi.

²²Nebutswa inywe Abakeni mulamumwa. Ne Asiria elamubukula okhuba abasumba.”

²³Ma Balaamu naribula amang'ana koburoobi kano: “Nibandu sina bano abebunjikha elubeka lwesinyolu?

²⁴Abasuku bakhetsele mumaaro okhurula Kupuro, nibaleka Asiria nende Eberi, Nabo mukhumal'likha bakhatibe inziayo.”

²⁵Ma Balaamu narula, nakalukha ingowe; ne Balaki naye khandi natsia owuwe.