Read lunyore OBUBALI 25 Bible Online

OBUBALI 25 - lunyore bible

OBUBALI 25

¹Olwa Baisiraeli batsia okhumenya mwibanda lia Akasia, abandu bachiaka okhuheya nende abakhasi Abamoabu abalinjiho.

²Abakhasi yabo balanga abandu mumasabo akokhukhol'la abanyasaye babwe emisango. Kho Abaisiraeli balia halala n'nabo khandi nibekayakaya

³Baali wa Peori. Kho OMWAMI yabahambila oburima

⁴ma nabool'la Musa mbu, “Bukula abemeli ba Baisiraeli bosi obeer're habulafu om'basu nikubalanga, ma nase sindahambwa noburima khubandu khandi tawe.”

⁵Musa nabool'la abakhongo ba Isiraeli mbu, “Simulala khwinywe yeere abandu bomulwibulo lulwe abekayakayanga Baali wa Peori.”

⁶Ne lola, mulala khu Baisiraeli yabukula omukhasi Omumidiani, Musa halala nomukanda kwosi nibareyekhwo imoni olwa bali nibalakayilanga hamuliangokwe Liheema liokhubaho khwo MWAMI.

⁷Ne olwa Fenihasi omwana wa Eliasa omwitsukhulu wa Haruni omwesaalisi yakalola, yabuukha narula hakari womukanda natsia. Yabukula lifumo m'mukhono,

⁸nalonda inyuma womusaatsa wa Isiraeli tsana, niyenjila mwiheema mukari, nabafumira bombi putu. Nilwo olwo olumbe olwali nilumalanga Abaisiraeli lwalekha.

⁹Nebutswa abali nibafwiye khulwolumbe yilwo bali etsielefu amakhumi kane natsine.

¹⁰Ma OMWAMI nabool'la Musa mbu,

¹¹“Khulwe yako aka Fenihasi omwana wa Eliasa omwitsukhulu wa Haruni omwesaalisi akhol'le, sinzia okhuba noburima khubandu Baisiraeli khandi tawe. Ye siyali okhuhuchil'la obwekayakayi bwabanyasaye bandi abarali ise tawe, ma niko akachil'le nirabbamala mwileko lianje.”

¹²Khulwe yako omubool'le mbu, nombanga indakano n'naye, nayo elabetsangaho khasotso.

¹³Ye halala nabolwibulolwe balabetsanga abasaalisi sila esiakamo sichila yali okhuhambwa neimbalikha khuyabo abafukulanga ise ma nachila abandu nibalekhelwa tsimbi.

¹⁴Ne omusaatsa owerwa halala nomukhasi Omumidiani, yalangwanga Simiri, omwana wa Salu, omwemeli wesilibwa silala mubandu ba Simioni.

¹⁵Ne eliira liomukhasi Omumidiani owerwa liali Kosibi, omukhaana wa Suri. Suri yali omwemeli wabandu besilibwa silala mu Midiani.

¹⁶Ma OMWAMI nabool'la Musa mbu,

¹⁷“Oseere Abaamidiani ma obamume,

¹⁸khulwamabi aka bamukhol'la inywe olwa bamukaata nimuli Peori, khandi khulwa Kosibi omukhaana womukhulundu wa Midiani, omukhaana wabwe, oweerwa khwitukhu liolumbe, nimuli Peori.”