Read lunyore OBUBALI 27 Bible Online

OBUBALI 27 - lunyore bible

OBUBALI 27

¹Mala, Noa, Hokila, Milika nende Tirisa bali abakhaana ba Selofehadi omwana wa Heferi, ne Heferi yali omusiani wa Gileadi, owali omusiani wa Makiri, owokhutsinyumba tsia Manase omusiani wa Yosefu.

²Nibasinjila imbeli wa Musa, nende imbeli wa Eliasa omwesaalisi, nende imbeli wabemeli nende imbeli womukanda kwosi, hamuliangokwe Liheema liokhubaho khwo MWAMI nibaboola mbu,

³“Papa wefwe yafwila musitsiimi naralikhwo nabaana abasiani. Siyali mulala khumukanda kwa Kora, okwali okhukhol'la OMWAMI indiri tawe. Yafwa khulwe tsimbi tsitsie omwene.

⁴Kho busina eliira lia papa wefwe lihiinibwe mu Baisiraeli, sichila siyali no mwana omusiani tawe? Mukhuhelesie emiandu mubekho banga papa wefwe.”

⁵Kho Musa naleera amang'ana kabwe imbeli wo MWAMI.

⁶Ne OMWAMI nabool'la Musa mbu,

⁷“Abakhaana ba Selofehadi bareebele ling'ana eliahabwene; obahelesie emiandu chiabwe echiobulaame mubekho banga samwana wabwe. Obahelesie obulaame bwasamwana wabwe.

⁸Khandi obool'le abandu ba Isiraeli mbu, omundu wosi naba nafwa, ne naralikhwo no mwana omusiani tawe, kho muhelesie omwanawe omukhaana obulaamebwe.

⁹Ne naba naralikhwo no mwana omukhaana tawe, kho muhelesie abaana babwe obulaame.

¹⁰Ne naba naralikhwo nabaana babwe tawe, kho muhelesie abaana banga samwana obulaame.

¹¹Ne kata samwana naba naralikhwo nabaana babwe tawe, kho muhelesie owomulwibulolwe oli ahembi n'naye munzu yabwe obulaamebwe, bube obubwe. Abandu ba Isiraeli bakhole ling'ana yili singa ling'ana eliahuchil'lwa mumalako singa OMWAMI yalaka Musa.”

¹²OMWAMI yabool'la Musa mbu, “Niina otsie khusikulu sino esia Abarimu, ahenge olole esibala esia mbelesianga abandu ba Isiraeli.

¹³Ne olwoba nosiluutsi, ibe nawe olafwa singa obwa Haruni omwana wenywe yafwa;

¹⁴sichila ibe halala n'naye mwakhol'la ling'ana lianje indiri musitsiimi sia Sini. Olwomukanda kwa Baisiraeli bamumuchil'la ibe nimuli Meriba mwasuula okhubamanyia obunyali bwanje obutsienukhu.” (Meriba nesitaho esili Kadeshi musitsiimi sia Sini.)

¹⁵Ma Musa nasaaya OMWAMI naboola mbu,

¹⁶“OMWAMI Nyasaye ohaananga obulamu bwosi, khusaayanga mbu wahule omundu onyala okhwemel'la omukanda kuno,

¹⁷khandi owokhubalakanga okhutsia mwihe kho omukanda kulekhe okhuba singa amakondi akarali nomwayi.”

¹⁸OMWAMI nabool'la Musa mbu, “Bukula Yoshwa omusiani wa Nuni, omundu owomwoyo kwanje kuli muye, omurekhwo omukhono.

¹⁹Omure imbeli wa Eliasa omwesaalisi, khandi imbeli womukanda kwosi ma omwemekhe okhuba omwemeli musilenjesio nibalolanga.

²⁰Ma olamukabul'lakhwo khubunyalibwo mbu abomukanda kwa Baisiraeli bosi bamuhulilenje.

²¹Nayeletenje khu Eliasa omwesaalisi owanomurebelenje obulalilo bwanje khulwo okhurumikhila Urimu nende Tsumimu[12]. Munjila iyo Eliasa alemel'la Yoshwa nende abandu ba Isiraeli bosi mumang'ana kabwe kosi.”

²²Kho Musa yakhola singa obwa OMWAMI yamulaka. Yabukula Yoshwa namura imbeli wa Eliasa omwesaalisi, khandi imbeli womukanda kwosi.

²³Yamurakhwo amakhono, ma namumanyia imbeli wabandu singa omwemeli okalukhile musilenjesie singa obwo MWAMI yali nalachile Musa.