Read lunyore OBUBALI 28 Bible Online

OBUBALI 28 - lunyore bible

OBUBALI 28

¹OMWAMI yalaka Musa

²yebaal'le abandu ba Isiraeli okhuhaana khu MWAMI munyinga yahuchil'lwa omusango kwebiokhulia okumuyanzisianga.

³Chino nichio emisango chiebiokhulia ebia mulahaananga khu MWAMI: ebimeme biamakondi b'bili ebiomuhika mulala ebiralikhwo nobulema bwosi khulwo omusango omusambe kwa bulitukhu.

⁴Muhaane esimeme sielikondi silala mukamba tsuli, ne esimeme sindi mukolooba,

⁵buli silala sihanwe halala nomusango kwobuswache okwobusie obunyukhe obuhela ekilo ndala obutsokanibubwemwo eliita ndala yamafura amalahi komuseituni.

⁶Yiku nomusango kwabulitukhu okusambwanga kwosi, okwahanwa olwokhuranga khusikulu sia Sinai, singa omusango kwebiokhulia okwo omwayo omulahi okuyanzisianga OMWAMI.

⁷Singa omusango kwewaini okuhanwanga halala nesimeme sielikondi siokhuranga, osundule halusambwa eliita ndala yewaini.

⁸Khumukolooba ohaane esimeme sielikondi liakhabili singa omusango kwamukamba tsuli halala nomusango kwewaini. Yikwo nomusango kwebiakhulia, omwayo kwabio kuyanzisianga OMWAMI.

⁹Khwitukhu liesabato ohaane ebimeme biamakondi b'bili ebiomuhika mulala ebiralikhwo obulema, halala nobusie obunyukhe etsikilo tsibili nibutsokanibwemwo amafura singa omusango kwobuswache; nende omusango kwewaini.

¹⁰Omusango omusambe yiku kuhanwe buli litukhu liesabato okhumeeta khumusango omusambe kwa bulitukhu, nende omusango kwakwo kwewaini.

¹¹Ne mukhuchaaka khwa buli mwesi mulombele OMWAMI omusango omusambe, mbu etsihunwa tsibili, nelimiiku elala, nebimeme ebisaatsa ebiomuhika mulala bine nabitaru ebiralikhwo obulema bwosi.

¹²Singa omusango kwobuswache, muhaane obusie obunyukhe obutsokan'nibwemwo amafura komuseituni: khubuli echulukhi ndala muhaane etsikilo tsitaru tsiobusie: ne khubuli likondi muhaane etsikilo tsibili tsiobusie:

¹³ne khubuli esimeme sielikondi, muhaane ekilo ndala yobusie. Emisango emisambe yichi nemisango chiebiokhulia ne omwayo kwachio kuyanzisianga OMWAMI.

¹⁴Ne emisango chiokhutsukhil'lwa chiabio chibe etsiliita tsibili khu buli echulukhi, eliita ndala nende enusu khubuli limiiku ne eliita ndala khubuli esimeme sielikondi. Lino nelilako khulwo omusango kwokhusambwa okuhanwanga khwitukhu liokhuranga khumwesi khumuhika kwosi.

¹⁵Okhumeeta khumisango chiabulitukhu nende omusango kwatsio kwewaini muhaane imbusi ekhole singa omusango kwetsimbi.

¹⁶Mumwesi kwokhuranga, nikuli likhumi nakhane, nelitukhu lie Lisabo lie Pasaka khulwokhuhaana oluyali khu MWAMI.

¹⁷Ma omwesi yikwo nikuli likhumi nakharano, lisabo likholwe; olwomukaati okuralimwo amamela okulalibwa khulwamatukhu kane nakataru.

¹⁸Khwitukhu liokhuranga lie Lisabo mubukaanenje halala khulwokhwekayakaya ne murakholakhwo omulimo kwosi tawe.

¹⁹Muhaane omusango omusambe singa omusango kwebiokhulia khu MWAMI mbu etsihunwa tsibili, nelimiiku elala, nende ebimeme bielikondi biomuhika mulala bine nabitaru ebisaatsa ebibula obulema bwosi tawe.

²⁰Muhaane emisango chiobuswache, echiahuchil'lwa, echiobusie obunyukhe obutsokelemwo amafura: etsikilo tsitaru tsiobusie khubuli ehunwa, etsikilo tsibili khulwe limiiku;

²¹khandi ekilo ndala khulwa buli esimeme khubimeme bine nabitaru.

²²Khandi muhaane ekhole ndala khulwomusango kwetsimbi, ne munjila iyi mukhole omulukha kwokhusiiya abandu.

²³Muhaane yibio halala nende omusango omusambe okwamukamba tsuli, okubetsanga omusango kwakhasotso.

²⁴Munjila indelwa iyo khulwamatukhu kane nakataru muhan'ne OMWAMI omusango kwebiokhulia okwomwayo kwabio kuyanzisianga OMWAMI. Muhaane yibi, halala nende omusango omusambe kwabulitukhu, nende omusango kweiwaini.

²⁵Ma khwitukhu liakhane nakhataru mubukaane halala khulwo khwekayakaya, ne murakholakhwo omulimo kwosi tawe.

²⁶Khwitukhu liokhuranga Khwisabo lie Lichesa olwa muleer'ra OMWAMI omusango kwobuswache obuhia, okhwola mubukaane khulwo khwekayakaya OMWAMI ne murakholakhwo omulimo kwosi tawe.

²⁷Muhaane omusango omusambe kube omwayo omulahi okhuyanzisianga MWAMI. Muhaane etsihunwa tsibili, nelimiiku elala, nende ebimeme biomuhika mulala bine nabitaru ebisaatsa sila obulema bwosi.

²⁸Muhaane emisango echiahuchil'lwa chiobuswache, mbu obusie obunyukhe obutsokelemwo amafura, etsikilo tsitaru khubuli ehunwa, etsikilo tsibili khu buli limiiku elala,

²⁹ne ekilo ndala khubuli esimeme silala.

³⁰Khandi muhaane imbusi ekhole ndala khulwomusango kwetsimbi ne munjila iyo mukhole omulukha kwokhusiiya abandu.

³¹Muhaane yibi nende omusango kwewaini okhumeeta khumusango omusambe okwa bulitukhu nende omusango kwobuswache. Mulole mbu emiruko yitsio tsibulakhwo obulema bwosi.