Read lunyore OBUBALI 29 Bible Online

OBUBALI 29 - lunyore bible

OBUBALI 29

¹Khwitukhu liokhuranga, mumwesi kwakhane nakhataru, mubukaane halala khulwo okhwekayakaya, ne murakholakhwo omulimo kwosi tawe. Khwitukhu yilio mukhupe tsinzika.

²Muhaane khu MWAMI omusango omusambe kube omwayo omulahi khuye; mbu ehunwa ndala nelimiiku elala, nebimeme biomuhika mulala bine nabitaru, sila obulema bwosi.

³Halala nomusango yikwo, muhaane omusango kwobuswache okwobusie obunyukhe obutsokelemwo amafura, etsikilo tsitaru tsiobusie tsihanwe halala nehunwa, ne etsikilo tsibili tsihanwe halala nelimiiku,

⁴ne ekilo ndala ehanwe halala nende buli esimeme silala.

⁵Khandi muhaane ekhole ndala khulwo omusango kwetsimbi ma munjila yiyi mukhole omulukha kwokhusiiya abandu.

⁶Muhaane yibi biosi halala nomusango omusambe kwokhulaba khwomwesi, nende omusango kwakwo kwobuswache, nende omusango omusambe okwa bulitukhu, halala nomusango kwakwo kwobuswache, nende emisango chiachio chiewaini. Ebihanwa biebiokhulia yibi nomwayo omulahi okuyanzisianga OMWAMI.

⁷Ne khwitukhu lielikhumi liomumwesi yikwo okwakhane nakhataru, mwebunjikhe khandi khulwo okhwekayakaya. Muraliakhwo ebiliibwa biosi, kata okhukholakhwo omulimo kwosi tawe.

⁸Ne muhaane khu MWAMI omusango omusambe kube omwayo omulahi okumuyanzisianga. Muhaane ehunwa ndala, nelimiiku elala, nebimeme biomuhika mulala bine nabitaru; sila obulema bwosi.

⁹Halala nomusango yikwo muhaane omusango kwobuswache, okwobusie obunyukhe obutsokelemwo amafura, etsikilo tsitaru tsihanwe halala nehunwa, etsikilo tsibili tsihanwe halala nelimiiku,

¹⁰ne ekilo ndala ehanwe halala nende buli esimeme siomuhika mulala silala.

¹¹Khandi muhaane imbusi ekhole ndala khulwo omusango kwetsimbi ma munjila yiyi mukhole omulukha kwakhusiya abandu halala nomusango omusambe kwa bulitukhu, nende omusango kwobuswache, nende omusango kwewaini.

¹²Khwitukhu lielikhumi nakharano mumwesi kwakhane nakhataru mwebunjikhe halala khulwo okhwekayakaya. Murakholakhwo omulimo kwosi tawe, nebutswa mukhol'le OMWAMI lisabo amatukhu kane nakataru.

¹³Khwitukhu liokhuranga muhaane omusango kwebiokhulia khu MWAMI okwomwayo kwakwo kumuyanzisianga. Muhaane etsihunwa likhumi natsitaru, namamiiku kabili, nebimeme biomuhika mulala likhumi nabine, sila obulema bwosi.

¹⁴Halala nomusango yikwo, muhaane omusango kwobuswache, mbu obusie obunyukhe obutsokelemwo amafura, etsikilo tsitaru tsiobusie tsihanwe halala nende buli ehunwa ndala, etsikilo tsibili etsiobusie tsihanwe halala nende buli limiiku elala.

¹⁵Ne ekilo ndala ehanwe halala nende buli esimeme siomuhika mulala silala, ne bihanwe halala nomusango kwewaini okwahuchil'lwa.

¹⁶Khandi muhaane imbusi ekhole ndala khulwo omusango kwetsimbi; halala nomusango omusambe okwa bulitukhu, halala nende omusango kwobuswache, khandi nende nomusango kwewaini.

¹⁷Ne khwitukhu liakhabili muhaane etsihunwa likhumi natsibili, namamiiku kabili nebimeme biomuhika mulala likhumi nabine sila obulema bwosi.

¹⁸Halala nomusango yikwo muhaane omusango kwobuswache, nemisango chiabio echiewaini, khulwe etsihunwa, namamiiku, khandi khulwa ebimeme okhulondokhana nobwinji bwabio, singa obwa kalakwa.

¹⁹Khandi muhaane imbusi ekhole ndala khulwo omusango kwetsimbi; halala nomusango omusambe kwabulitukhu, nende omusango kwobuswache, nomusango kwewaini.

²⁰Ne khwitukhu liakhataru muhaane etsihunwa likhumi nandala, namamiiku kabili nebimeme biomuhika mulala likhumi nabine sila obulema bwosi.

²¹Halala nomusango yikwo, muhaane omusango kwobuswache, nomusango kwewaini khulwe etsihunwa, namamiiku, khandi khulwe bimeme okhulondokhana nende obwinji bwabio, singa kalakwa.

²²Khandi muhaane ekhole ndala khulwo omusango kwetsimbi; halala nomusango omusambe kwa bulitukhu, nende omusango kwobuswache, nomusango kwewaini.

²³Ne khwitukhu liakhane, muhaane etsihunwa likhumi, namamiiku kabili, nebimeme biomuhika mulala likhumi nabine sila obulema bwosi.

²⁴Halala nomusango yikwo muhaane omusango kwobuswache, nomusango kwewaini khulwe etsihunwa, namamiiku, khandi khulwe bimeme okhulondokhana nobwinji bwabio, singa obwa kalakwa.

²⁵Khandi muhaane imbusi ekhole ndala khulwo omusango kwetsimbi, halala nomusango omusambe kwa bulitukhu, nende omusango kwobuswache, nomusango kwewaini.

²⁶Ne khwitukhu liakharano muhaane etsihunwa tsirano nachine namamiiku kabili, nebimeme biomuhika mulala likhumi nabine sila obulema bwosi.

²⁷Halala nomusango yikwo muhaane omusango kwobuswache, nomusango kwewaini khulwe etsihunwa namamiiku, khandi khulwe ebimeme okhulondokhana nende obwinji bwabio, singa obwa kalakwa.

²⁸Khandi muhaane imbusi ekhole ndala khulwo omusango kwetsimbi, halala nomusango omusambe kwa bulitukhu, nende omusango kwobuswache, nomusango kwewaini.

²⁹Ne khwitukhu liakhasasaba muhaane etsihunwa munane, namamiiku kabili nebimeme biomuhika mulala likhumi nabine sila obulema bwosi.

³⁰Halala nomusango yikwo muhaane omusango kwobuswache, nende omusango kwewaini khulwe etsihunwa, namamiiku, khandi khulwebimeme okhulondokhana nende obwinji bwabio, singa obwa kalakwa.

³¹Khandi muhaane imbusi ekhole ndala khulwo omusango kwetsimbi; halala nomusango omusambe kwa bulitukhu nende omusango kwobuswache; nomusango kwewaini.

³²Ne khwitukhu liakhane nakhataru muhaane etsihunwa tsine natsitaru, namamiiku kabili nebimeme biomuhika mulala likhumi nabine sila obutema bwosi.

³³Halala nomusango yikwo muhaane omusango kwobuswache, nomusango kwewaini khulwe etsihunwa, namamiiku, khandi khulwebimeme okhulondokhana nende obwinji bwabio, singa obwa kalakwa.

³⁴Khandi muhaane imbusi ekhole ndala khulwo omusango kwetsimbi; halala nomusango omusambe kwa bulitukhu, nende omusango kwobuswache, nomusango kwewaini.

³⁵Khwitukhu liamunane mwebunjikhe halala khulwo okhwekayakaya ne murakholakhwo omulimo kwosi tawe.

³⁶Muhaane omusango omusambe singa esihanwa siebiokhulia ebiomwayo omulahi khu MWAMI. Muhaane ehunwa ndala, nelimiiku elala, nebimeme biomuhika mulala bine nabitaru sila obulema bwosi.

³⁷Halala nomusango yikwo, muhaane omusango kwobuswache, nomusango kwewaini khulwe ehunwa, nelimiiku, khandi khulwebimeme okhulondokhana nende obwinji bwabio, singa obwa kalakwa.

³⁸Khandi muhaane ikhole ndala khulwa omusango kwetsimbi; halala nomusango omusambe kwa bulitukhu, nende omusango kwobuswache, nomusango kwewaini.

³⁹Muhan'nenje OMWAMI yibio biosi mumasabo kenywe, halala nende ebiesuho bienywe, nebihanwa bienywe ebiokhwehaana, khulwe emisango chienywe chiokhusambwa, nemisango chienywe chiobuswache, nemisango chienywe chiewaini khandi khulwe emisango chienywe chiobuhambani.

⁴⁰Musa nabool'la abandu ba Isiraeli amang'ana kosi ako MWAMI yamulaka aboole.