Read lunyore OBUBALI 3 Bible Online

OBUBALI 3 - lunyore bible

OBUBALI 3

¹Tsino nitsio tsinzibulo tsia Haruni na Musa olwene yilwo olwo MWAMI yal'loma nende Musa, nali khusikulu sia Sinai.

²Kano niko amera kabaana ba Haruni; owokhuranga ni Nadabu, ma Abihu, Eliasa na Itsamari.

³Kano niko amera kabaana ba Haruni, abesaalisi abatsukhiil'lwa amafura, aba yahula okhukhalabanilanga mubwesaalisi.

⁴Nebutswa Nadabu nende Abihu bafwa olwa baleera omul'lo okurali omutsienukhu imbeli wo MWAMI, musitsiimi sia Sinai; ne Sibalikhwo nabaana tawe, nabo Eliasa na Itsamari barumikha singa abesaalisi olwa Haruni yali nasili mwoyo.

⁵OMWAMI nabool'la Musa mbu,

⁶“Sunda olwibulo lwa Lawi ahembi, ma abahule okhurumikhila omwesaalisi Haruni.

⁷Balakholanga emilimo chiokhulinda Liheema liokhubaho khwo MWAMI ma barumikhile abesaalisi nende abomukanda kwosi.

⁸Khandi balalindanga ebindu biosi bie Liheema nende akabatakhungwa okhukhol'la Abaisiraeli bosi.

⁹Omulimo kwa Abalawi bali n'nakwo, nokhurumikhila Haruni nende abasianibe.

¹⁰Khandi wahule Haruni nabasianibe okhuhesia omulimo kwobwesaalisi bwabwe; nebutswa oundi wosi niyakhakukhola aleerwa.”

¹¹OMWAMI khandi nabool'la Musa mbu,

¹²“Luno musilenje siabebulwa bokhuranga mubaana ba Baisiraeli, mbukuye Abalawi; nababetsenge abanje.

¹³Olwa ndali okhwira abaana bokhuranga aba Bamisiri, ndali okhweyahul'la abebulwa bokhuranga musieinyumba ya Baisiraeli nende ebibulwa biokhuranga mumiruko chiabwe chiosi. Ise nise OMWAMI.”

¹⁴Olwa Musa yali nali musitsiimi sia Sinai, OMWAMI yalaka Musa

¹⁵okhuhandika amera ka Balawi okhulondokhana nebilibwa biabwe khandi netsinyumba tsiabwe, buli musaatsa wosi okhurula khubomwesi mulala nende abayomba yaho.

¹⁶Kho Musa yababala singa obwo MWAMI yali namulachile.

¹⁷Lawi yali nabaana bataru, nabo bali mbu: Gerishoni. Kohatsi nende Merari.

¹⁸Ne kano niko amera kebilibwa bia Gerishoni: Libini nende Shimei.

¹⁹Ebilibwa bia Kohatsi nabio biali Amuramu, Isari, Heburoni nende Usieli.

²⁰Ne ebilibwa bia Merari nabio biali: Mahali nende Mushi. Yabo nibo abakuka babwe khumera kabwe okhulondokhana netsinyumba tsiabwe.

²¹Musilibwa sia Gerishoni, baliho abeinyumba ya Libini, nende abeinyumba ya Shemei.

²²Abes'saatsa ababalwa khubo abomwesi mulala nende abayomba yaho bali abandu etsielefu tsine natsitaru netsimia tsirano.

²³Abetsinyumba tsia Gerishoni balakwa okhukhoma ekambi yabwe indangu we Liheema khulubeka lwemasaba,

²⁴ne Elisafu omwana wa Laeli yali omwemeli wabwe.

²⁵Ne abesilibwa sia Gerishoni bahebwa okhulinda ebindu bino: Liheema nesifuunikho sialio esiomukari, nende esifuunikho esieikulu, epasia yomubwinjil'lo bwalio,

²⁶etsipasia etsie mumukitsi okwabotokhana Liheema nende olusambwa, nende epasia eyomubwinjil'lo bwokhwinjila mumukitsi tsana. Nibo abasinjil'langa emilimo chiosi echiokhukhalabana khubindu yibi biosi.

²⁷Mubesilibwa sia Kohatsi baliho abeinyumba ya Amuramu, nende abeinyumba ya Isari, nende abeinyumba ya Heburoni, nende abeinyumba ya Usieli.

²⁸Abes'saatsa ababalwa khubo okhurula khubomwesi mulala nende abayomba yaho, bali etsielefu munane netsimia tsisasaba.

²⁹Abetsinyumba tsia Kohatsi balakwa okhukhoma ekambi yabwe khulubeka lwenandete lwe Liheema,

³⁰ne Elisafani omusiani wa Usieli yali omwemeli wesilibwa siabwe.

³¹Ne ebia bahebwa okhulinda biali: Lisanduku lie Indakano, esihani sietsitaya, netsisambwa, nebibanulwa biabesaalisi barumikhilanga Hatsienukhu, nende epasia yomubwinjil'lo bwa Habundu Hatsienukhu Okhusila. Nibo abasinjil'la emilimo chiosi chiokhukhalabana khubindu yibio biosi.

³²Omwemeli wa Balawi yali Eliasa omusiani womwesaalisi Haruni. Niye owali omusinjil'li we yabo abahebwa obulindi bwa Habundu Hatsienukhu.

³³Musilibwa sia Merari, baliho abeinyumba ya Mahali, nende abeinyumba ya Mushi.

³⁴Abes'saatsa ababalwa khubo, okhurula khubomwesi mulala nende abayomba yaho inamba abandu etsielefu tsisasaba netsimia tsibili.

³⁵Omwemeli wesilibwa siabetsinyumba tsia Merari yali Surichi omwana wa Abihaili. Nabo balakwa okhukhoma ekambi yabwe khulubeka lwesinyolu lwe Liheema.

³⁶Bahebwa okhulinda ebitiili bie Liheema netsisimbo tsialio netsisiilo tsiabio nebikuru bialio nende ebimanulwa bialio biosi. Nibo abasinjil'la emilimo chiosi echiokhukhalabana khubindu yibi biosi.

³⁷Khandi basinjil'langa etsisiilo tsiesioba womuchitsi nende ebikuru biatsia, nebibambo biatsio, nende emikoye tsiatsio.

³⁸Musa nende Haruni nabasianibe balakwa okhukhoma ekambi yabwe imbeli we Liheema khulubeka lwebukwe. Nabo bahebwa okhulinda emilimo echia Habundu Hatsienukhu khulwa abandu ba Isiraeli. Omundu wosi owakhateema okhukhola mbwo yakherwa.

³⁹Bosi ababalwa khu Balawi, abali abes'saatsa abomwesi mulala nende abayomba yaho aba Musa yahandika amera okhulondokhana nebilibwa biabwe bali etsielefu amakhumi kabili natsibili.

⁴⁰OMWAMI yabool'la Musa mbu “Obale abasiani abekulanda bosi aba Baisiraeli nabanje ma nahandika amera kabwe okhuchiakila khubomwesi mulala nende abayomba yaho.

⁴¹Abasiani abekulanda bosi ba Baisiraeli nabanje. Nebutswa musilenje siabwe mbukuye Abalawi okhuba abanje! Ise nise OMWAMI! Khandi mbukuye emiruko chia Balawi musilenje siemiruko echieimbeli okhwibulwa okhuba echianje.”

⁴²Musa yakhola mbwo ma nahandika amera kabekulanda

⁴³abomwesi mulala nende abayomba yaho. Bosi halala bali abandu etsielefu amakhumi kabili natsibili, etsimia tsibili namakhumi kane nakataru nende bataru.

⁴⁴OMWAMI nabool'la Musa mbu,

⁴⁵“Bukula Abalawi musilenje siabekulanda bosi ba Baisiraeli, obahaane khu ise, khandi obukule emiruko chia Balawi echieimbeli okhwibulwa ochihaane khu ise.

⁴⁶Ne khulwa mbu abekulanda ba Baisiraeli bayombelanga Abalawi abandu etsimia tsibili namakhumi kane nakataru nende bataru, okhwola onunule abasiani abametekhanga okhuyomba obwinji bwa Balawi.

⁴⁷Khu buli mulala khubo omurunjile ebitonye birano biefetsa okhuhelana nesichelo esiahuchil'lwa.

⁴⁸Ma ohelesie Haruni nabasianibe amapesa yako.”

⁴⁹Kho Musa yakhola mbwo ma nabukula

⁵⁰ebitonye biefetsa ebihela elefu ndala tsimia tsitaru namakhumi kasasaba nabirano

⁵¹nabihaana khu Haruni nende khubasianibe.