Read lunyore OBUBALI 31 Bible Online

OBUBALI 31 - lunyore bible

OBUBALI 31

²“Haana esinyasio khu Bamidiani khulwa amabi akabakhol'la abandu ba Isiraeli. Nomal'le okhukhola mbwo olafwa.”

³Kho Musa yabool'la abandu mbu, “Mwerechekhe okhulwana Abaamidiani ma mubahe esinyasio khulwamabi akabakhol'la OMWAMI.

⁴Okhurula mubuli olwibulo lwa Isiraeli mubukule abandu elefu ndala, ma mubarume mwihe.”

⁵Kho mubuli lwibulo babukula abandu elefu ndala ma bosi halala nibaba tsielefu likhumi natsibili aberechekhele okhutsia mwihe.

⁶Ma Musa nabaruma mwihe, khubuli olwibulo elefu ndala, hasi hobwemeli bwa Fenihasi omwana womwesaalisi Eliasa, owalindanga ebimanulwa ebiahabundu hatsienukhu nende etsitulumbete tsiokhukhupa.

⁷Baseera Midiani singa obwo MWAMI yalaka Musa, nibeera abasaatsa bosi pe,

⁸halala nende abaruchi ba Midiani barano! Ewi, Rekemu, Suri, Huri nende Reba, khandi beera Balaamu omwana wa Beori halala n'nabo.

⁹Abandu ba Isiraeli babukula abakhasi ba Midiani nibabara mubuhambe, halala nabaana babwe; khandi nibabukula tsing'ombe tsiabwe tsiosi, nebiayo biabwe biosi, ma nibayaaka emiandu chiabwe chiosi,

¹⁰nibasamba amataala kabwe kosi, nende amaheema kabwe kosi.

¹¹Babukula ebindu biosi ebia bali nibayaakile halala nabandu nende khumiruko,

¹²Nibaleera abasumba yabo nende emiruko yitsio nende biosi ebia bali nibayaakile yibio khu Musa nende khu Eliasa nende khumukanda kwabandu ba Isiraeli, mukambi eyomusipaapi sia Moabu, ahembi nende Yorodani mu Yeriko.

¹³Kho Musa nende Eliasa omwesaalisi nabemeli bosi abomukanda nibarula nibatsia okhubaakan'na, esioba wekambi.

¹⁴Ne Musa yatiil'la abasinjil'li bamahe netsisawoni nende abelihe bosi oburima.

¹⁵Musa nabareeba mbu, “Kho esichil'le nimuhonokosia abakhasi bosi nisina?

¹⁶Lole, abakhasi nibo abachila abandu ba Isiraeli nibarabba abasubilwa khu MWAMI olwa bali Peori khulwo okhulonda obwibaali bwa Balaamu; ne niko akachila olumbe nilubaho khubandu bo MWAMI.

¹⁷Kho luno mwire buli musiani mubaana abati, khandi mwire buli omukhasi owali omuchima,

¹⁸nebutswa abakhaana, abasili okhuheyakhwo nomusaatsa khandi abakhasi abasili nolukhaana mwebikhile abene.

¹⁹Nenywe mwesi aber'rekhwo omundu nohomba abatiil'lekhwo khumulambo, mukhome amaheema kenywe esioba wekambi khulwa amatukhu kane nakataru. Mwesiiye khwitukhu liakhataru khandi khwitukhu liakhane nakhataru, inywe abene nende abakhasi abamuhambile.

²⁰Khandi musiiye buli ingubo yosi, nebindu biosi biamaseelo, nebindu biosi ebianabwa khubwoya bwetsimbusi, nende ebialombwa khumisaala.”

²¹Eliasa omwesaalisi nabool'la abasaatsa yabo abali nibarul'le mwihe mbu, “Kano niko amalako ako OMWAMI yalaka Musa.

²²Ebindu biosi ebialombwa khutsahabu, nende khufetsa, nomukasa, nesibia, namabaati, namasaasi,

²³mbu biosi ebiranyala okhuyia mumul'lo tawe, mubisiiye khulwo khubibisisia mumul'lo. Nebutswa bisiiyilwe khandi namaatsi kokhusiiya namanyaasi kabwe ne ebiakhanyala okhuyia mumul'lo, mubibisie mumaatsi.

²⁴Khandi musaabe tsingubo tsienywe khwitukhu liakhane nakhataru, ma mube abasiiyikhu; ma olunyumakhwo mwinjile mukambi.”

²⁵Ma OMWAMI nabool'la Musa mbu,

²⁶“Ibe nende Eliasa nende abemeli mubale obwinji bwebindu ebiyaakilwe nende ebihambilwe halala nabandu nende emiruko.

²⁷Mubikabule mubitonye bibili ebihelani; mbu esitonye silala sihebwa abandu abatsia mwihe ne esindi sihebwe abomukanda kwosi.

²⁸Muhiinisie OMWAMI omurungo khubahambe belihe yabo, mbu mulala khubahambe tsimia tsirano, khandi khutsing'ombe, nokhutsipunda nokhubiayo mbwo.

²⁹Obihaane khu Eliasa omwesaalisi, khulwe sihanwa esichomekhe khu MWAMI.

³⁰Ne khusitonye esihan'nwe khubandu bandi bosi obukule silala khubuli amakhumi karano khubandu abasumba, khandi khutsing'ombe, nokhutsipunde, nende khumakondi mbwo. Obihaane khu Balawi abalindanga Liheema lio MWAMI eliabalekhelwa okhulinda.”

³¹Musa nende Eliasa omwesaalisi bakhola singa OMWAMI yali nalachile.

³²Ne ebindu ebiabasikari bayaaka nibabibukula biali amakondi halala netsimbusi etsielefu tsimia tsisasaba namakhumi kane nakataru natsirano,

³³tsing'ombe etsielefu amakhumi kane nakataru natsibili,

³⁴netsipunda etsielefu amakhumi kasasaba nandala,

³⁵nende abakhaana abasili nolukhaana etsielefu amakhumi kataru natsibili.

³⁶Ne esitonye siabio, esiali omukabwa kweyabo abatsia mwihe, biali amakondi halala netsimbusi etsielefu etsimia.

³⁷Ne omurungo kwo MWAMI khumakondi halala netsimbusi yitsio kwali etsimia tsisasaba namakhumi kane nakataru nakarano.

³⁸Netsing'ombe natsio tsiali etsielefu amakhumi kataru natsisasaba ne omurungo kwo MWAMI khutsio kwali amakhumi kane nakataru natsibili.

³⁹Etsipunda natsio tsiali etsielefu amakhumi kataru netsimia tsirano. Ne khutsio omurungo kwo MWAMI kwali amakhumi kasasaba nandala.

⁴⁰Ne abandu nabo bali etsielefu likhumi natsisasaba; ne khubo omurungo kwo MWAMI kwali abandu amakhumi kataru nababili.

⁴¹Kho omurungo yikwo kwosi, nikwo okwali esihanwa esichomekhe khu MWAMI, ne Musa yakuhaana khu Eliasa omwesaalisi, singa OMWAMI yali namulachile.

⁴²Ne esitonye siabio esiali siabandu ba Isiraeli bandi bosi esia Musa yara sibeka nahiinia khubandu yabo abatsia mwihe,

⁴³siali amakondi etsielefu tsimia tsitaru namakhumi kataru natsine natsitaru netsimia tsirano.

⁴⁴Tsing'ombe tsiali etsielefu amakhumi kataru natsisasaba,

⁴⁵etsipunda etsielefu amakhumi kataru netsimia tsirano,

⁴⁶nende abandu etsielefu likhumi natsisasaba.

⁴⁷Musitonye yisio esiali siabandu ba Isiraeli, Musa yabukula esitonye silala mubuli amakhumi karano khubandu nende khumiruko, nasihaana khu Balawi abalindanga Liheema lio MWAMI eliabalekhelwa okhulinda, singa OMWAMI nalachile Musa.

⁴⁸Ne etsisawoni etsiali ikulu wetsielefu tsielihe, mbu abakhongo betsielefu nende abakhongo betsimia, batsia khu Musa,

⁴⁹nibamubool'la mbu, “Ifwe abarumikhilibo khubal'le obwinji bwabasaatsa belihe abali mubulindi bwefwe, ne sibalemelekhwo omundu kata mulala tawe.

⁵⁰Kho khuleer're esihanwa khu MWAMI, khubindu ebia buli mundu anyooye, mbu ebimili bietsahabu, nemikotse, nemikasa, netsingaka tsiom'makosi, netsingaka etsiomubirwi.” Khubihaananga khu MWAMI singa omurungo kwobulamu bwefwe mbu ye alakhusoola.

⁵¹Musa nende Eliasa omwesaalisi nibabukula etsahabu yosi eya baleera, neeli ebimili ebiaranywa.

⁵²Ne ebihanwa biosi ebie tsitswoni tsiahan'na OMWAMI, biali nobusiro obuhela etsikilo tsimia tsibili.

⁵³Yabo abarali abakhongo belihe bali nibebikhila ebindu ebia bali nibayaakile.

⁵⁴Ne Musa nende Eliasa omwesaalisi bahila etsahabu Mwiheema liokhubaho khwo MWAMI, kho OMWAMI abe onyala okhulindanga Abaisiraeli.