Read lunyore OBUBALI 32 Bible Online

OBUBALI 32 - lunyore bible

OBUBALI 32

¹Abolwibulo lwa Rubeni nende abolwibulo lwa Gadi bali nemiruko eminji. Balola esibala sia Yaseri, nende esibala sia Gileadi, nisili esilahi khulwo okhuruchilamwo tsing'ombe.

²Kho batsia khu Musa nende Eliasa omwesaalisi, nende khubemeli bomukanda nibaboola mbu;

³“Atarotsi, Diboni, Yaseri, Nimira, Eleale, Sebani, Nebo nende Beoni,

⁴nesibala esio MWAMI yakhonya Abaisiraeli okhuleka. Nesibala esilahi esiokhuruchila mwo emiruko; nefwe khuli nemiruko eminji.

⁵Nimuyanza mukhuhuchiil'le ifwe abasumba benywe khuhebwe esibala sino sibe esiefwe; murakhwambusia injelekha wa Yorodani tawe.”

⁶Naye Musa nabakalusia naboola mbu, “Mwenyanga mwikhale hano olwa Abaisiraeli basienywe batsia mwihe noho?

⁷Kho busina muteemanga okhwira emioyo chiabandu ba Isiraeli okhukhalania Yorodani nende okhwinjila musibala esio MWAMI yabahelesia?

⁸Nambwo abakuka benywe bakhola olwa ndabaruma okhulambuula Kadeshi Barinea khulwo khuhengelesia esibala yisio.

⁹Batsia okhwola mwibanda lia Eshikoli, ne nibalola esibala yisio, nebutswa olwa bakalukha, beera emioyo chiabandu ba Isiraeli okhwinjila musibala esio MWAMI yali niyabahelesia.

¹⁰OMWAMI yali nelirima litukhu yilio ma niyesuha mbu:

¹¹‘Sichila sibatsilil'la okhuba abahulili khu ise tawe, abulaho omundu okhuchiachila khubemihika amakhumi kabili nende abayomba yaho abarula Emisiri, owakhenjile musibala esia ndesuha okhuha Aburahamu, Isaka nende Yakobo tawe.’

¹²Yabo bali Abaisiraeli bosi narali Kalebu omwana wa Yefune Omukeni nende Yoshwa omwana wa Nuni; bo balonda OMWAMI nomwoyo kwosi.

¹³OMWAMI yatiil'la Abaisiraeli lirima nabatimatimia y'yi ney'yi musitsiimi khulwemihika amakhumi kane, okhwola olwolwibulo yilwo lwosi olwakhola obubi imbeli wo MWAMI lwali nilufwiye.

¹⁴Ne luno inywe mubukuye obukono bwabakuka benywe, olwibulo oluhia lwabandu aboni, aberechekhele okhuleeranga OMWAMI lirima lilulu khubandu ba Isiraeli.

¹⁵Nikakhaba mbu inywe abolwibulo lwa Rubeni nende Gadi mwakhasuula okhumulonda luno, alalekha abandu yaba bosi musitsiimi khandi, nenywe mulatulwa khulwo okhukhuywa khwabwe.”

¹⁶Nibesunda ahembi khu Musa nibaboola mbu, “Mbelio, okhuhuchil'le khwombokhele emiruko chiefwe liboma, khandi nende amataala akasirwa noluhinga khulwa abakhasi befwe nabaana befwe.

¹⁷Ma kho nefwe nilwo olwa khulaba nikhwerechekhele okhutsia mwihe na Baisiraeli basiefwe ma khube imbeli okhuseera abasuku okhwola olwa nakhube khubaheye esibala esianasibe esiabwe. Nabo abaana befwe nabakhasi befwe balamenya mumataala kasirwa namasisi.

¹⁸Sikhulakalukha munzu tsiefwe tawe okhwola olwa abandu ba Isiraeli balaba nibabukuye buli mundu obulaamebwe.

¹⁹Ifwe sikhulabukula obulaame halala n'nabo injelekha wa Yorodani tawe; sichila khunyooye obulaame bwefwe hano ebukwe wa Yorodani.”

²⁰Ma Musa nababool'la mbu, “Nimuba nimuboolanga akatooto, kho hano imbeli wo MWAMI mwerechekhe okhutsia mwihe.

²¹Abasaatsa bokhulwana lihe abali mwinywe batsie injelekha wa Yorodani khandi hasi welilako lio MWAMI baseera abasuku befwe okhwola olwo MWAMI abaleka,

²²ma babukule obulaame bwesibala. Nimumal'le okhukhola yako sichila mulaba nimuhesisie akamutakhwanga okhukhol'la Abaisiraeli basienywe nilwo olwa MWAMI alahuchil'la mbu esibala sino esili ebukwe wa Yorodani nesieywe.

²³Nebutswa nimuba nimusuula okhukhola mbwo, muchetsiyianga mbu mwakhaba nimwoneye OMWAMI. Murakholakhwo obusiamu khwing'ana yili tawe, khase mulahebwa esinyasio.

²⁴Ma kho mwombokhe amataala kabaana benywe nende abakhasi benywe namaboma ketsing'ombe namakondi kenywe, nebutswa mukhole kosi aka mubooye neminwa chienywe.”

²⁵Ma abandu ba Gadi nende Rubeni nibabool'la Musa mbu, “Omwami, ifwe khulakhola singa obwa olakanga.

²⁶Abaana befwe abatitiiti, nabakhasi befwe, nemiruko chiefwe balasikala mumataala ka Gileadi.

²⁷Nebutswa ifwe khwerechekhele okhutsia mwihe hasi hobwemeli bwo MWAMI. Khwitsa okhwambukha Yorodani ma khulwane singa obwe ibe obooye.”

²⁸Kho Musa yahaana lilako yili khumwesaalisi nende Yoshwa omusiani wa Nuni, nabemeli bebilibwa bietsimbia tsia Isiraeli naboola mbu,

²⁹“Abandu ba Gadi nende aba Rubeni, nibaba nibambukha Yorodani niberechekhele okhulwana hasi hobwemeli bwo MWAMI, ma muleke esibala khulwo bukhonyi bwabwe; kho mubahelesie esibala sia Gileadi sibe obulaame bwabwe.

³⁰Ne nibaba nibasuula okhwambukha ma nibatsia okhulwana lihe halala n'nenywe balanyoola omukabwa kwabwe musibala sia Kanaani singa inywe.”

³¹Kho abandu ba Gadi nende aba Rubeni nibakalusia nibaboola mbu, “Singa obwo MWAMI yakhubooleye ibe, nimbwo khulakhola.

³²Khulaambukha hasi hobwemeli bubwo, ne khwitsa okhwinjila musibala sia Kanaani, nebutswa obulaame obulaba obwefwe khulasikala n'nabwo khu Yorodani injelekha yino.”

³³Kho Musa yahelesia abolwibulo lwa Gadi, nende Rubeni ma nende enusu yolwibulo lwa Manase omusiani wa Yosefu, lihanga lia Sihoni omuruchi wa Amori, nende esibala sia Ogu omuruchi wa Bashani, halala namataala nende obwayilo obwalondokhana n'nasio.

³⁴Ne olwibulo lwa Gadi niboombokha Diboni, Afarotsi, Aroeri,

³⁵Atarotsishofani, Yaseri, Yokubeha,

³⁶Betsinimira, nende Betsi Harani; mbu amataala kamasisi, nende maboma kamakondi.

³⁷Abaana ba Rubeni nabo nibombokha Heshiboni, Eleale, Kiriatsaimu,

³⁸Nebo, Baali Meoni (amera kaako kali khukalukhanibwa) nende Sibima.

³⁹Ne abandu besilibwa sia Makiri omusiani wa Manase nibatsia Gileadi, nibalileka, nibakhungania Abaamori abali ebwene yiyo.

⁴⁰Kho Musa nahelesia abesilibwa sia Makiri omwana wa Manase esibala sia Gileadi; nabo nibamenyayo.

⁴¹Ne Yairi omwana wa Manase natsia okhuseera amataala kebwene iyo ma nakahamba, ma nakalanga mbu, “Amataala ka Yairi.”

⁴²Noba naye yali okhuseera Kenatsi namataala kalio, nalileka ma nalilanga mbu Noba, yalikulikha eliira lilie omwene.