Read lunyore OBUBALI 33 Bible Online

OBUBALI 33 - lunyore bible

OBUBALI 33

¹Kano namera aka buli habundu aha Abaisiraeli bakhomanga ekambi olwa bali nibarul'le musibala sie Misiri okhulondokhana netsimbia tsiabwe hasi hobwemeli bwa Musa nende Haruni.

²Ne Musa yahandikanga hasi eliira elia buli habundu buli lwosi olwa bakhomanga ekambi singa obwo MWAMI yali namulachile.

³Abandu ba Isiraeli barula Emisiri khwitukhu lielikhumi nakharano khumwesi kwokhuranga khumuhika, khwitukhu elialonda litukhu lie Epasaka yokhuranga. Hasi hobulindi bwo MWAMI barula neinjinia, Abaamisiri bosi nibabalolanga

⁴olwa Abaamisiri bali nibayabilanga abekulanda babwe bosi, abo MWAMI yali niyeer're mubo. Mukhukhola yaka, OMWAMI yamanyia mbu ali nobunyali obukali okhuyomba abanyasaye ba Bamisiri.

⁵Abandu ba Isiraeli bachenda okhurula Ramase, nibakhoma ekambi yabwe Sukotsi.

⁶Barula Sukotsi ma nibakhoma ekambi yabwe Etsamu, litaala elili khundulo khwesitsiimi.

⁷Barula Etamu, nibakalukha inyuma okhwola Pi Hahirotsi, elili ebukwe wa Baali Sefoni, ma nibakhoma ekambi ahembi Mikidoli.

⁸Barula Pi Hahirotsi, nibabir'ra Munyanza Inzakhanyu, nibenjila musitsiimi sia Shuru; nibatsia oluchendo lwamatukhu kataru musitsiimi sia Etsamu, ma nikhoma ekambi yabwe Mara.

⁹Barula Mara niboola Elimu ma nibakhomayo ekambi yabwe sichila ebwene y'yo ebitaho biamaatsi bialiho likhumi nabibili halala nemisaala chiamasindu amakhumi kane nakataru.

¹⁰Barula Elimu, nibakhoma ekambi ahembi ne Inyanza Inzakhanyu.

¹¹Barula khu Nyanza Inzakhanyu, nibakhoma ekambi musitsiimi sia Sini.

¹²Barula musitsiimi sia Sini, nibakhoma ekambi Tofuka.

¹³Barula Tofuka nibakhoma ekambi Alushi.

¹⁴Barula Alushi, nibakhoma ekambi Refidimu, ahamaatsi karaliho akabandu okhunywa.

¹⁵Barula Refidimu, nibakhoma ekambi musitsiimi sia Sinai.

¹⁶Barula musitsiimi sia Sinai, nibakhoma ekambi Kiburotsi Hatawa.

¹⁷Barula Kiburotsi Hatawa, nibakhoma ekambi Haserotsi.

¹⁸Barula Haserotsi, nibakhoma ekambi Ritsima.

¹⁹Barula Ritsima, nibakhoma ekambi Rimoni Peresi.

²⁰Barula Rimoni Peresi, nibakhoma ekambi Libina.

²¹Barula Libina, nibakhoma ekambi Risa.

²²Barula Risa, nibakhoma ekambi Kehelatsa.

²³Barula Kehelatsa, nibakhoma ekambi musikulu sia Seferi.

²⁴Barula Sheferi, nibakhoma ekambi Harada.

²⁵Barula Harada, nibakhoma ekambi Makelotsi.

²⁶Barula Makelotsi, nibakhoma ekambi Tahatsi.

²⁷Barula Tahatsi, nibakhoma ekambi Tera.

²⁸Barula Tera, nibakhoma ekambi Mitsika.

²⁹Nibarula Mitsika, nibakhoma ekambi Hashimona.

³⁰Barula Hashimona, nibakhoma ekambi Moserotsi.

³¹Barula Moserotsi, nibakhoma ekambi Bene Yakani.

³²Barula Bene Yakani, nibakhoma ekambi Hori Hakidikadi.

³³Barula Hori Hakidikadi, nibakhoma ekambi Yotibatsa.

³⁴Barula Yotibatsa, nibakhoma ekambi Abirona,

³⁵Barula Abirona, nibakhoma ekambi Esioni Keberi,

³⁶Barula Esioni Keberi, nibakhoma ekambi musitsiimi sia Sini, nisio Kadeshi.

³⁷Barula Kadeshi, nibakhoma ekambi musikulu sia Hori, khundulo khwesibala sia Edomu.

³⁸Ne Haruni omwesaalisi yaniina natsia khusikulu sia Hori singa OMWAMI yali niyalaka, ma nafwilayo, mumuhika kwamakhumi kane olunyuma olwabandu ba Isiraeli bali nibarul'le musibala sie Misiri, khwitukhu liokhuranga khumwesi kwakharano.

³⁹Ne Haruni yali owemihika emia ndala namakhumi kabili nachitaru olwa yafwila khusikulu sia Hori.

⁴⁰Omuruchi wa Aradi, owamenya enandete wesibala sia Kanaani yahul'la mbu Abaisiraeli bali khuluchendo betsanga.

⁴¹Nabo nibarula hasikulu sia Hori, nibakhoma ekambi yabwe Salamona.

⁴²Barula Salamona, nibakhoma ekambi Punoni.

⁴³Barula Punoni, nibakhoma ekambi Obotsi.

⁴⁴Barula Obotsi, nibakhoma ekambi Iye Abarimu, musibala sia Moabu,

⁴⁵Nibarula Iyimu Abarimu, nibakhoma ekambi Diboni Kadi.

⁴⁶Barula Diboni Kadi, nibakhoma ekambi Alumoni Dibulatsaimu.

⁴⁷Barula Alumoni Dibulatsaimu, nibakhoma ekambi mubikulu bia Abarimu, ebili ahembi nende esikulu sia Nebo.

⁴⁸Barula mubikulu bia Abarimu, nibakhoma ekambi musipaapi sia Moabu, ahembi Yorodani injelekha wa Yeriko.

⁴⁹Bakhupa ekambi yabwe ahembi Yorodani, okhurula Betai Yesimotsi okhwola Abeli Shitimu musipaapi sia Moabu.

⁵⁰Olwa bali nibasili musipaapi sia Moabu ahembi injelekha wa Yeriko, OMWAMI yahelesia Musa

⁵¹amalako kano khulwa Baisiraeli okhulonda. “Olwa mwitsa okhwambukha Yorodani nimwinjila musibala sia Kanaani,

⁵²okhwola mukhunge abandu abamenyanga musibala yisio bosi. Mwononie abanyasaye babwe ababaatswa khumachina nende khubibia nimulikul'la habundu wabwe hokhwekayakayila.

⁵³Ne mubukule esibala siabwe nimumenyamwo; okhuba ninywe abambetsanga esibala yisio sibe esienywe.

⁵⁴Mwarane esibala okhulondokhana netsimbia nende ebilibwa munjila yokhukhupa imbulu. Khubali abenji, mubahelesie obulaame obwinji; ne khubali abati mubahelesie obulaame buti; ahe imbulu emukwila omundu, yaho habe habunduwe.

⁵⁵Ne nimuba nimulekha okhukhunga abandu abamenyanga musibala yisio kho yabo aba mulalekha basikale balaba singa lihwa musilenje sienywe, khandi singa esimemu mumoni mwenywe; ne balamulwananga musibala esia namumenyemwo.

⁵⁶Nimurabbakhunga, kho ndakhamumume inywe singa obwa ndaloosia okhubakhol'labo.”