Read lunyore OBUBALI 34 Bible Online

OBUBALI 34 - lunyore bible

OBUBALI 34

¹OMWAMI yahelesia Musa

²amalako kano khulwabandu ba Isiraeli okhulonda. “Olwa namwinjile musibala sia Kanaani esia muhelesianga sibe obulaame bwenywe, etsinzakho tsiasio tsibe singa mbu,

³olubeka lwenywe lwenandete lulabukulakhwo ebitonye bilala khusitsiimi sia Sini nilulonda khundulo khwa Edomu, khandi olwakho lwenywe lwenandete lulaba okhurula khusihesi siebukwe esie Inyanza Yechumbi.

⁴Ma olwakho lwenywe lulakotola ndutsia elubeka wenandete wes'sia sia Akarabimu, nilutsilil'la okhwola Sini, ne esihesi sialwo silaba elubeka lwenandete wa Kadeshi Barinea; khandi lularula ndutsia Hasari Adari, nilutsilil'la okhwola Asimoni.

⁵Ma olwakho lulakotola okhurula Asimoni okhwola khumuchelakwe Misiri, ne esihesi sialwo silaba hanyanza ya Mediterenia.

⁶“Ne olwakho lwemasaba lulaba Inyanza ya Mediterenia.

⁷“Ne olwakho lwenywe lwesinyolu ndwoluno; mbu lularula khu Nyanza ya Mediterenia okhwola khusikulu sia Hori;

⁸ne okhurula khusikulu sia Hori, mware olwakho okhwola khulung'anyi lwa Hamatsi. Lutsie okhwola Sedadi,

⁹nende okhutsia Sifironi, ne esihesi sialwo sibe Hasa Enani.

¹⁰“Ma mware olwakho lwenywe lwebukwe, lurule Hasari Enani nilwola Shefamu.

¹¹Ma lukongome okhurula Sefamu okhwola Haribeli khulubeka lwebukwe wa Aini; ma khandi lukongome nilwola khubikulu ebili ebukwe we Inyanza ya Galilaya.

¹²Okhurula yaho lukongome enandete okhwola khumuchela kwa Yorodani, ne esihesi sialwo sibe Inyanza Yechumbi. “Yitsio tsilaba tsimbeka tsine etsietsinzakho tsiesibala sienywe.”

¹³Kho Musa yalaka abandu ba Isiraeli naboola mbu: “Yisio nisio esibala esia mulalaamilwa munjila yokhukhupa imbulu; nisio esio MWAMI yalaka mbu alahelesia tsinzibulo tsirano natsine nende enusu.

¹⁴Abandu bolwibulo lwa Rubeni, nende abolwibulo lwa Gadi, nende enusu yolwibulo lwa Manase bamal'le okhunyoola obulaame bwabwe.

¹⁵Tsinzibulo yitsio tsibili nende enusu yolwibulo bamal'le okhunyoola obulaame bwabwe injelekha wa Yorodani mu Yeriko, elubeka lwebukwe, oluchomananga nende aheliuba lirul'langa.”

¹⁶Ma OMWAMI nabool'la Musa mbu,

¹⁷“Eliasa omwesaalisi nende Yoshwa omusiani wa Nuni nibo abalakabul'la abandu esibala sibe obulaame bwabwe.

¹⁸Khandi obukule buli omukhulundu mulala khubuli olwibulo, babakhonye okhukabula esibala.”

¹⁹Ne amera kabandu yabo ngakano: mbu khubolwibulo lwa Yuda, Kalebu omusiani wa Yefune.

²⁰Ne khulwibulo lwabaana ba Simioni, Shemweli omwana wa Amihudi.

²¹Khulwibulo lwa Benjameni, Elidadi omwana wa Kisiloni.

²²Ne khulwibulo lwa Dani, Buki omwana wa Yokili.

²³Khubaana ba Yosefu; khulwibulo lwa Manase, Hanieli omwana wa Efodi.

²⁴Ne khulwibulo lwa Efuraimu, Kemueli omwana wa Shifitani.

²⁵Ne khulwibulo lwa Sabuloni, Elisafani omwana wa Paranaki.

²⁶Ne khulwibulo lwa Isakari, Palitieli omwana wa Sasani.

²⁷Ne khulwibulo lwa Asheri, Ahihudi omwana wa Shelomi.

²⁸Ne khulwibulo lwa Nafutali, Pedaheli omwana wa Amihudi.

²⁹Yabo nibo abandu abo MWAMI yalaka okhukabul'la abaana ba Isiraeli obulaame musibala sia Kanaani.