Read lunyore OBUBALI 35 Bible Online

OBUBALI 35 - lunyore bible

OBUBALI 35

¹Ma OMWAMI nal'loma nende Musa musipaapi sia Moabu ahembi na Yorodani mu Yeriko namubool'la mbu,

²“Laka abandu ba Isiraeli mbu khubulaame obuli obwabwe bahelesie Abalawi amatookho akokhumenyamwo, khandi babahelesie obwayilo ahembi namatookho tsana.

³Amatookho yako kabe akabwe okhumenyamwo. Ne obwayilo bube obwemiruko chiabwe, nende ebiayo biabwe bindi biosi.

⁴Ne obwayilo bwamatookho yako, obwa bahelesia Abalawi, burule khumasisi kamatookho nibutsilil'la khuburambi obuhela etsimiita tsimia tsine namakhumi karano tsimbeka tsiosi.

⁵Muchele esioba welitookho, khulubeka lwebukwe etsimiita tsimia tsirano natsine, khulubeka lwenandete etsimiita tsimia tsirano natsine, khulubeka lwemasaba etsimiita tsimia tsirano natsine, khandi khulubeka lwesinyolu etsimiita tsimia tsirano natsine ma litookho liene libe hakari. Yibwo bulaba obwayilo bwamatookho yako.

⁶Ne amatookho aka bahelesia Abalawi kabe amatookho kasasaba kobwilukhilo, akomundu anyala okhwilukhilamwo olwaba niyetsukhila niyeer're owasie. Okhumeeta khu yako, babahelesie amatookho kandi amakhumi kane nakabili.

⁷Amatookho yako kosi aka balahelesia Abalawi kalaba amatookho amakhumi kane namunane, halala nende akobwayilo bwako.

⁸Obwinji bwamatookho ka Balawi mubuli lwibulo lwa Baisiraeli kalahanwa aha kali okhulondokhana nende obwinji bwamatookho kosi mulwibulo tsana; nikali amenji bahaane amenji ne nikali mati bahaane mati.”

⁹OMWAMI yabool'la Musa

¹⁰abool'le abandu ba Isiraeli mbu, “Olwa namwambukhe Yorodani nimwinjila musibala sia Kanaani,

¹¹muleela amatookho kobwilukhilo; mbu omundu wosi oba niyetsukhan'na okhwira omundu yelukhileyo.

¹²Omundu uyo alaba mumulembe ebwene iyo sila okhurunjibwa es'salia nabekho bomundu owir'rwe. Omwiri uyo alekhe okhwirwa okhwola olwa asinjila imbeli wesiina okhuyaalwa.

¹³Mwahule amatookho kasasaba kobwilukhilo,

¹⁴kataru kabe injelekha wa Yorodani khulubeka lwebukwe, ne kataru kabe musibala sia Kanaani.

¹⁵Amatookho yako kalaba akobwilukhilo khu Baisiraeli nende khubacheni abamenyibwa mubo bosi. Omundu wosi oba niyetsukhila niyeera owasie yelukhilemwo.

¹⁶“Nebutswa naba namukhupa nesindu esialombwa khusibia siosi, ma omundu tsana nafwa, kho nomwiri. Ne okhwola omundu omwire yerwe.

¹⁷Nohomba naba namukhupa nelichina elia yaali n'nalio mumukhono, eliakhanyala okhuchila omundu uyo afwe, kho nomwiri. Ne okhwola omundu omwiri yerwe.

¹⁸Nohomba naba namukhupa neindabusi nohomba olusaala lwosi olwa yaali n'nalwo mumukhono, ma omundu tsana afwe, kho nomwiri. Ne okhwola omundu omwiri yerwe.

¹⁹Omwikho owahembi womundu owir'rwe uyo niye okwana okhwira omwiri uyo. Naba namunyoola okhwola amwire.

²⁰“Omundu naba niyahamba owasie obusuku, ma amwire khulwa okhumulumba hasi nohomba okhumulasa nesindu siosi namukonekheye,

²¹nohomba naba namukhupa nomukhono ma afwe, kho omundu uyo ali nesikha siobwiri, ne okhwola yerwe. Omwikho wahembi womundu owir'rwe niye okwana okhwira omundu omwiri uyo. Naba namunyoola amwire.

²²“Nebutswa omundu anyala okhwitsukhan'na niyeera owasie sila obusuku bwosi tawe, khulwo okhumulumba hasi nohomba okhumulasa nesindu siosi, ne naramukonekheye tawe.

²³Nohomba anyala okhulasa lichina ne naralolanga omundu wosi tawe ma liire omundu owa ye arachomelenge okhwira khandi orali omusukuwe tawe.

²⁴Mumang'ana singa yako omukanda kwa Baisiraeli bakhalake esiina nisimufwilanga omwikho womundu owir'rwe ne omwiri siramufwila tawe.

²⁵Omukanda kwa Baisiraeli kusoole omwiri uyo okhurula khumwikho womundu owir'rwe orunanga okhurunjia es'sialia, ma bamukalusie mwitookho elia yali niyelukhilamwo. Okhwola amenyeyo okhwola olwa Omwesaalisi Omukhongo oba naliho olwene yilwo aba nafwiye.

²⁶Nebutswa omwiri uyo naba narula mwitookho liobwilukhilobwe, aha yelukhila,

²⁷ma omwikho womundu wafwa orunanga okhumala es'sialia uyo amunyoole, ma amwire, kho okhurunjia es'sialia singa yikhwo sikhubalwanga singa obwiri tawe.

²⁸Omwiri yali nakwanile okhumenya mwitookho liobwilukhilobwe okhwola olwo Mwesaalisi Omukhongo oba naliho olwene yilwo aba nafwiye; nebutswa olunyuma lwo Mwesaalisi Omukhongo aba nafwiye, omwiri uyo akalukhe musibala esia yarulamwo.

²⁹Ne amang'ana kano kalondwe nende inywe nende abetsinzibulo tsienywe tsiosi hosi aha muba nimwamenya.

³⁰“Omundu oba nasitakwa khulwobwiri, esiina sinyala okhumufwila nikali baliho abakobokheli babili nohomba bataru. Obukobokheli bwomundu mulala sibunyala okhuchila omundu wosi abe nesikha siobwiri tawe.

³¹Omwiri okhwola yerwe. Sanyala okhubula okhwirwa khulwo khurunga amapesa tawe.

³²Omundu naba niyelukha ma atsie mwitookho liobwilukhilo, muramuhuchil'la arunge amapesa ma akalukhe okhumenya musibala esiayarulamwo olwo Mwesaalisi Omukhongo aba nasili okhufwa tawe.

³³Nimwakhakhola mbwo, mwakhafwabia esibala esiamumenyelemwo. Obwiri bwononinjia esibala; ne omwiri naranyala okhwirwa, ebulakhwoho injila yosi eyokhukhola omulukha kwokhusiiya esibala esiomundu yer'rwamwo.

³⁴Kata murafwabia esibala esia mumenyangamwo tawe, sichila Ise nise OMWAMI ne menyanga hakari wabandu ba Isiraeli.”