Read lunyore OBUBALI 36 Bible Online

OBUBALI 36 - lunyore bible

OBUBALI 36

¹Ne abemeli bebilibwa bietsinyumba tsia Gileadi omwana Makiri wa Manase, abokhunyumba tsiabaana ba Yosefu, nibesunda ahembi nibabool'la imbeli wa Musa nende imbeli wabakhulundu yabo, abali abemeli bebilibwa biabaana ba Isiraeli;

²mbu “OMWAMI yakhulaka, Ibe omwami wefwe, okhuhelesia abandu ba Isiraeli esibala khulwa obulaame munjila yokhukhupa imbulu; khandi OMWAMI yakhulaka ibe mbu ohelesie abakhaana bomusiani wefwe Selofehadi obulaamebwe.

³Ne nibaba nibakhateesibwa nabasiani betsinzibulo tsindi tsiabandu ba Isiraeli, kho obulaame bwabwe, bwakhahiinibwa mubulaame bwabakuka befwe, nibumeetwa khubulaame bwolwibulo tsana ahababa nibateesibwa nimbwo bulahinibwa mumukabwa kwobulame bwefwe.

⁴Ma olwomuhika kwamakhumi karano kwola, kho obulaame bwabwe bulameet'twa obulaame bwolwibulo tsana aha bateesibwa, ne nilwo olwobulaame bwabwe bulahiinibwa mubulaame bwolwibulo lwabakuka befwe.”

⁵Kho Musa nalaka abandu ba Isiraeli singa obweling'ana lio MWAMI liali mbu, “Abolwibulo lwa Manase babooye lili habwene.

⁶Elio MWAMI alaka khumang'ana kabakhaana ba Selofehadi ngakano; ‘Batekhele ababayanza; habula abeinzu yolwibulo lwa papa wabwe bonyene nibo ababakwanile okhutesania n'nabo.’

⁷Nikali mbwo, kho obulaame bwosi bwabandu ba Isiraeli sibulahiinibungwa khulwibulo luno butsie khulwibulo lundi tawe; okhuba obulaame bwabandu ba Isiraeli bulatsilil'la okhuba mulwibulo lwabwe.

⁸Khandi buli mukhaana oba nali nobulaame mulwibulo lwosi lwabandu ba Isiraeli ateesibwe nomundu weinzu yolwibulo lulwe. Munjila iyi, buli mundu alanyoola obulaame abe nobulaame bwabakukabe,

⁹ne obulaame bwosi sibulahiinibungwa khulwibulo l'lala butsie khulwibulo lundi tawe. Buli olwibulo lwabandu ba Isiraeli lulatsilil'la okhubukula obulaame bwalwo olwene.”

¹⁰Ne singa OMWAMI yali nalachile Musa, nimbwo abakhaana ba Selofehadi bakhola;

¹¹okhuba Mala, Tirisa, Hokila, Milika nende Noa abakhaana ba Selofehadi, bateesibwa nababotso babwe abelubeka wa papa wabwe.

¹²Batsia okhuteekha mubesilibwa sia Manase omusiani wa Yosefu, ne obulaame bwabwe bwasikala mulwibulo lweinyumba ya samwana wabwe.

¹³Kano niko amalako nende obukhalachi singa OMWAMI yalaka abandu ba Isiraeli okhubir'ra khu Musa nibali musipaapi sia Moabu ahembi na Yorodani musibala sia Yeriko.