Read lunyore OBUBALI 4 Bible Online

OBUBALI 4 - lunyore bible

OBUBALI 4

²babale abandu musilibwa sia Kohatsi okhurula mulwibulo lwa Lawi, okhulondokhana netsinyumba tsiabwe nende ebilibwa biabwe,

³okhurula khubemihika amakhumi kataru okhutsia ikulu, okhwola khubemihika amakhumi karano, bosi abahel'le okhukhola emilimo Mwiheema liokhubaho liokhubaho khwo MWAMI.

⁴Emilimo chiabwe nechiokhukhola nende ebindu ebitsienukhu okhusila.

⁵Olwe esaa yokhwiha Liheema yoolanga; Haruni nende abaanabe benjile Mwiheema mukari ma bahiinie ekatani eli imbeli we Lisanduku lie Indakano ma bafuunikhe Lisanduku lie Indakano n'nayo;

⁶ma bafuunikhekhwo esifuunikho siamaseelo amanyukhe, ma barekhwo ingubo yabuluu, ma babiikhe emisaala chialio mubifuuli.

⁷Ma baale ingubo yabuluu khumesa yomukaati okuhaanwangwa khu MWAMI, ma barekhwo tsinjio, netsindaabo tsiobwali, netsindaabo tsiokhuhaana omusango nende etsichupa tsiomusango kwewaini, etsiokhutsukhiil'la. Omukaati kubetsenga khumesa khasotso.

⁸Khubindu yibio baalekhwo ingubo inzakhanyu, nibafuunikhakhwo esifuunikho siamaseelo amanyukhe ma benjisiamwo emisaala tsiokhuchikinga.

⁹Babukule ingubo yabuluu, nibafuunikha esihani sietsitaya tsiobulafu, nende etsitaya tsiasio, namaana kasio, netsindelu, nebichinjilo biamafura komuseituni biosi ebiabarumikhilanga nibasikhalaban'na.

¹⁰Beetsa okhufuunikha esihani yisio nende ebilikhwo biosi musifuunikho siamaseelo amanyukhe, nibasira khumisaala chiokhusichinga.

¹¹Ma baale ingubo yabuluu khulusambwa lwetsahabu, nibafuunikhakhwo esifuunikho siamaseelo amanyukhe, ma benjisiemwo emisaala chiokhusichinga.

¹²Babukule ebindu biosi, ebia barumikhilanga Habundu Hatsienukhu, nibabifuuma mungubo yabuluu, nibafuunikhakhwo esifuunikho siamaseelo amanyukhe, nibabira mumisaala chiokhusichinga.

¹³Bahinieho likokhe okhurula khulusambwa, nibaalakhwo ingubo isembe.

¹⁴Barekhwo ebindu biosi, ebia barumikhilanga khulwo okhukhalabanila khulusambwa, mbu tsindaabo tsiomul'lo, ebikwasi ebichiko nende etsibeseni, ma beetsa okhurakhwo esifuunikho siamaseelo amanyukhe, nibenjisiamwo emisaala chiokhusichinga.

¹⁵Ma olwa Haruni nabaanabe baba nibamal'le okhufuunikha ebindu ebitsienukhu biosi ebie Liheema, nende ebimanulwa bialio biosi ekambi neli ahembi okhurula, olunyumakhwo abaana ba Kohatsi betse okhubichinga ebindu yibi; nebutswa balekhe okhutiilakhwo khubindu ebitsienukhu, khase, bakhafwa. Yibio nibio ebindu ebia abaana ba Kohatsi balachinga khubieliheema liokhubaho khwo MWAMI.

¹⁶Ne ebilekhelwa omwesaalisi Eliasa nabio nibio amafura ketsitaya, nobwali obuhunyanga obulahi, nomusango kwobuswache kwakhasotso, namafura akokhutsukhiil'lwa; nende ebibetsanga mwiheema eliatsienulwa khu MWAMI.

¹⁷OMWAMI nabool'la Musa nende Haruni mbu,

¹⁸“Muralekha abesilibwa sia Bakohatsi okhwirwa okhurula mu Balawi tawe.

¹⁹Khulwokhubalekha okhuba mwoyo nibarafwa olwabesunda ahembi khubindu yibio ebiahul'lwa elala, Haruni nabaanabe benjilemwo, nibabara buli mundu khubukhalabanibwe nomusiikokwe ma bamubool'le okwakinga.

²⁰Nebutswa Abakohatsi nibakhenjilakhwo mwiheema ma balole abesaalisi nibaloosianga ebindu ebitsienukhu ebiokhusundwa, balafwa.”

²¹OMWAMI yabool'la Musa

²²abale Abalawi besilibwa sia Gerishoni bosi, okhulondokhana nebilibwa biabwe khandi netsinyumba tsiabwe,

²³khandi ahandike amera ke yabo okhurula khubemihika amakhumi kataru okhwola khubemihika amakhumi karano, abali nibahel'le okhukhola emilimo Mwiheema liokhubaho khwo MWAMI.

²⁴Yibu nibwo obukhalabani bwebilibwa bia Gerishoni, mubukhalabani nende mukhuchinga ebindu

²⁵mbu balachinga etsikatani tsiokhulusambwa, nende Liheema liokhubaho khwo MWAMI nesifuunikho sialio, nende esifuunikho siamaseelo amanyukhe esili ikulu wasio, nemikoye tsiomumuliango kweliheema liokhubaho khwo MWAMI, netsipasia etsiokhulusimbo,

²⁶nolwichi lwomubwinjil'lo bwomusilibwa siesioba esiabotokhana olusambwa lwemisango, nemikoye chiatsio, nebindu biosi ebitiyilwangakhwo. Balakhalabana nibakhola kosi akatakhungwa okhutsikhol'lwa.

²⁷Obukhalabani bwosi bwabaana ba Gerishoni bube singa obwa Haruni nabaanabe baba nibalaka, mubiosi ebiabachinga nende mukosi akabakhola, mubalache okhukhola ebiabahebwa okhuchinga.

²⁸Buno nibwo obukhalabani bwabetsinyumba tsiabaana ba Gerishoni mukeliheema liokhubaho khwo MWAMI. Balakhola kosi hasi hobwemeli bwa Itsamari omwana womwesaalisi Haruni.

²⁹OMWAMI yabool'la Musa abale abeinyumba ya Merari, munyumba tsiabwe khandi mubilibwa biabwe,

³⁰okhurula khubemihika amakhumi kataru okhwola khubemihika amakhumi karano; yabo abali nibahel'le okhukhola emilimo chio Mwiheema liokhubaho khwo MWAMI.

³¹Bino nibio ebia balekhelwa okhuchinga, mbu etsifuremu, tsisimbo, ebikhongo, emial'lo;

³²netsisiilo, ebitil'lo biatsio, nebibambo biatsio, nemikoye chiolusimbo olwabotokhana liheema, nebindu biosi ebitiyilwangakhwo. Buli mundu khubo alekhelwe okhuchinga ebindu nalebe.

³³Buno nibwo obukhalabani bwabetsinyumba tsiabaana ba Merari, mubukhalabani bwabwe Mwiheema. Balahesia obukhalabani yibwo hasi hobwemeli bwa Itsamari omwana womwesaalisi Haruni.

³⁴Kho Musa na Haruni nabemeli bomukanda nibabala abaana ba Bakohatsi, mutsinyumba tsiabwe khandi mubilibwa biabwe,

³⁵okhurula khubemihika amakhumi kataru, okhwola khubemihika amakhumi karano. Yabo abali nibahel'le okhukhola emilimo Mwiheema liokhubaho khwo MWAMI.

³⁶Ababalwa khubomutsinyumba tsiabwe bali etsielefu tsibili, tsimia tsine natsitaru namakhumi karano.

³⁷Bano nibo ababalwa khubetsinyumba tsia Bakohatsi, bosi abanyala okhukhola emilimo Mwiheema liokhubaho khwo MWAMI aba Musa na Haruni babala singa obwo MWAMI yali nalachile Musa.

³⁸Abaana ba Gerishoni mutsinyumba tsiabwe khandi mubilibwa biabwe babalwa,

³⁹okhurula khubemihika amakhumi kataru, okhwola khubemihika amakhumi karano. Yabo abali nibahel'le okhukhola emilimo Mwiheema liokhubaho khwo MWAMI,

⁴⁰bali etsielefu tsibili, tsimia tsisasaba namakhumi kataru.

⁴¹Bano nibo ababalwa khubetsinyumba tsiabaana ba Gerishoni, bosi abakhalabananga Mwiheema aba Musa na Haruni babala singa obwo MWAMI yali nalachile.

⁴²Yabo abokhutsinyumba tsiabaana ba Merari, babalwa okhulondokhana nebilibwa biabwe,

⁴³okhurula khubemihika amakhumi kataru, okhwola khubemihika amakhumi karano. Yabo abali nibahele'le okhukhola emilimo Mwiheema liokhubaho khwo MWAMI,

⁴⁴bali etsielefu tsitaru netsimia tsibili.

⁴⁵Bano nibo ababalwa khubetsinyumba tsiabaana ba Merari, aba Musa na Haruni babala singa obwo MWAMI yali nalachile.

⁴⁶Musa nende Haruni nabemeli ba Isiraeli babala Abalawi okhulondokhana netsinyumba tsiabwe nende ebilibwa biabwe.

⁴⁷Yabo abali abemihika amakhumi kataru okhwola khubemihika amakhumi karano, abali nibahel'le okhukhola emilimo Mwiheema liokhubaho khwo MWAMI,

⁴⁸ababalwa khubo bali etsielefu munane, tsimia tsirano, namakhumi munane.

⁴⁹Singa obwo MWAMI yali nalachile okhubir'ra mu Musa nimbwo barebwa buli mundu khubukhalabanibwe nokhubuchinji bwebindubie. Bababala singa obwo MWAMI yali nalachile Musa.