Read lunyore OBUBALI 5 Bible Online

OBUBALI 5 - lunyore bible

OBUBALI 5

¹OMWAMI yabool'la Musa mbu,

²“Laka abandu Baisiraeli mbu bahiinie mukambi omundu wosi wobuchele, nohomba oli nokhuratsa khwosi khwomubili, nende omundu wosi owakhaba mumusilo khulwo okhutiila khumufu.

³Mubahinie bosi esioba wekambi kata babe abasaatsa nohomba abakhasi; balekhe okhubiyia ekambi yabwe eya nase menyangamwo nabandu banje.”

⁴Abaisiraeli bakhola mbwo, ma nibabahiinia bosi esioba wekambi singa OMWAMI yali nabooleye Musa.

⁵OMWAMI yahelesia Musa

⁶amalako kano khulwa Baisiraeli okhulonda. Olwomundu wosi omusaatsa nohomba omukhasi, abula okhuba omusubilwa khu OMWAMI ma akhol'le owasie obubi,

⁷okhwola yeyame tsimbi tsitsie etsia akhol'le. Ma akalusie biosi biesikhasie, nameetakhwo esitonye siamakhumi kabili khumia, ma abihaane khu owaba nakholeye obubi.

⁸Ne oba nakholeywe obubi tsana naba nafwa ne narabbakhwo nomwikho owa ahembi, owakhanyala okhurungwa khulwe esikha, kho ebiesikha tsana bilahanwa khu MWAMI, bibe ebiomwesaalisi. Omurungo yiku kumeetwekhwimiiku khulwokhusiywa khwomundu wesikha.

⁹Khandi ebihanwa ebia Baisiraeli bahaananga khu MWAMI bibetsenje ebiomwesaalisi obibukulanga okhurula khubo.

¹⁰Buli sindu siosi esiomundu wosi ahelesia omwesaalisi sibetsenje esisie.

¹¹OMWAMI yalaka Musa

¹²okhuhelesia Abaisiraeli amalako kano. Haundi omusaatsa anyala okhuba neimbalikha khumukhasiwe khulwo khupaala mbu omukhasiwe sali omusubilwa khuye tawe khandi mbu yefwabianga

¹³khulwo khukona nomusaatsa undi. Nebutswa omusaatsa uyo abule obwatooto sichila omukhasiwe akakholanga masilisi ne abokhukobokhela ling'ana yili nibaraliho, naye siyanyolel'lwa tawe.

¹⁴Nohomba haundi omusaatsa anyala okhuba neimbalikha khumukhasiwe, kata omukhasi tsana naralikhwo nesikha siobuheyi tawe.

¹⁵Kho omusaatsa uyo atsie nomukhasiwe khumwesaalisi. Yetse nende esihanwa esialakwa khulwo omukhasi, nasio nekilo ndala yobusie bweishayiri; nebutswa aratsukhakhwo amafura, kata okhurakhwo obwali tawe; sichila nomusango kwomusaatsa oli neimbalikha khumukhasiwe okuhanwanga khulwo okhumanyia obwatooto.

¹⁶Omwesaalisi yetsa okhuhila omukhasi uyo khulusambwa ma amusinjisie imbeli wolusambwa tsana.

¹⁷Omwesaalisi abukule amaatsi amatsienukhu mulutaabo, ma abukulekhwo khulukukhi olwo khubwelu bwe Liheema liokhubaho khwo MWAMI, alure mumaatsi okhukakhola amalulu.

¹⁸Omwesaalisi abohol'le liswi liokhumurwe kwomukhasi, nara omusango kwobuswache tsana mumakhono komukhasi. Omwesaalisi are olusalilo mumakhonoke olulikhwo amaatsi amalulu akaleranga esilaamo siobubi.

¹⁹Ma omwesaalisi amutsube, nabool'la omukhasi mbu “Omusaatsa wosi naba narakon'ne n'nawe tawe, kata noba norasiamile okhukhola akakhura musifwabwi tawe, noli muburuchi bwomusaatsawo obe omulakhuule musilulu sino esileeranga esilaamo siobubi.

²⁰Nebutswa noba niwasiamile, noli musifwabwi khulwo okhuba nomusaatsa undi orali omusaatsawo,

²¹OMWAMI aleere esilaamo khuliira lilio mubandu benywe. Khandi OMWAMI alakhutosia lirango nakhusimbia inda.

²²Khandi amaatsi amalulu kano akaleeranga esilaamo siobubi kenjile mundayo nikachisimbia nikakhutosia lirango.” Omukhasi naye akalusie naboole mbu, “Sangangakhwo mbu OMWAMI akhole mbwo.”

²³Ma omwesaalisi ahandike ebilaka munwa bino musitapu, nabihinia namaatsi yako nabinjisia mulutaabo lwamaatsi amalulu;

²⁴namunywesia omukhasi amaatsi amalulu tsana akaleeranga esilaamo siobubi, nako kalenjila muye, nako nikamutsuna bululu.

²⁵Ma omwesaalisi abukule omusango kwobuswache yikwo okuli mumukhono kwomukhasi tsana, nakuchela imbeli wo MWAMI, ma akuhaane khulusambwa.

²⁶Ma omwesaalisi afumbare khubusie bwomusango kwobuswache singa esifwanani siakwo, nabusambila khulusambwa. Ma olunyumakhwo anywesie omukhasi amaatsi amalulu yako.

²⁷Ne omukhasi uyo naba nakhol'le akobuheyi tooto, amaatsi yako kalenjila muye nikamutsuna bululu; alasimba inda, imbeliwe nemutsuna butinyu; ma eliiralie liliba esilaka munwa mubandu babwe.

²⁸Nebutswa omukhasi uyo naba narakhol'le obuheyi tawe, ne narali nesikha, kho salasalila tawe, ne alabelekha niyebula abaana.

²⁹Kano niko amalako kokhurumikhilwa khumukhasi owakhaba nakhol'le obuheyi ma yefwabie,

³⁰khandi olwomusaatsawe yakhahambwa neimbalikha ma apaale mbu omukhasiwe ukhol'le obuheyi. Omukhasi uyo alasinjisibwa imbeli wolusambwa ma omwesaalisi amukhol'le amalako kokhusiiywa kano kosi.

³¹Omusaatsa siali nesikha siosi tawe; nebutswa omukhasi naba nanyoolekha nesikha okhwola yetukhe esinyasio siesikha omwene.