Read lunyore OBUBALI 6 Bible Online

OBUBALI 6 - lunyore bible

OBUBALI 6

¹OMWAMI yalaka Musa,

²okhuhelesia abandu Baisiraeli amalako kano. Omundu wosi omusaatsa nohomba omukhasi oba niyetsuba esiesuho siokhuba Omunasariti[1] khulwo khwehaana khu MWAMI,

³kho alekhe okhunywa ewaini namalwa kosi. Aranywa ewaini indulu kata amalwa kalul'le, nohomba kata okhunywa khumaatsi kemisabibu, kata okhuliakhwo khumisabibu emibisi nohomba emiomu tawe.

⁴Amatukhu kosi aka yakhaba naali Omunasariti alekhenje okhuliakhwo khusindu siosi esirula khumusabibu, kata tsimwo nohomba likhoba butswa tawe.

⁵Mumatukhu kosi akaaba naali musiesuho siokhuba Omunasariti, arakhabekakhwo liswi lilie nohomba tsindefu tsitsie tawe. Ali hasi wesiesuho yisio amatukhu aka yehaana khu MWAMI ne okhwola alekhe liswi nende tsindefu tsitsie bikhule.

⁶Amatukhu kosi akayehaana khu MWAMI alekhenje okhwesunda ahembi khumulambo kwosi.

⁷Arebiikha musifwabwi khulwa samwana, nohomba nyina, nohomba omusiani wabwe kata omukhaana wabwe, olwa bakhaba nibafwiye tawe; okhuba obwehaani obwa yehaana khu Nyasaye buli khumurwekwe.

⁸Mumatukhu kosi akali Omunasariti nomutsienukhu wo MWAMI.

⁹Liswi lio Munasariti niliakhafwabibwa sichila ali ahembi nende omundu ofwiye bungoyingoyi, okhwola alinde amatukhu kane nakataru kahwe ma abeke liswi khumurwekwe nende tsindefu.

¹⁰Ma khwitukhu liamunane yetse nende amakhuulwi kabili nohomba ebituka b'bili imbeli womwesaalisi, hamuliangokwe Liheema liokhubaho khwo MWAMI.

¹¹Kho omwesaalisi alahaana elala singa omusango kwetsimbi ne elindi singa omusango omusambe, khulwo khukhola omulukha kwokhumusiiya okhurula khumusilo kwokhutiila khumufu. Litukhu yilio Omunasariti yetsa okhuhaana liswi khu MWAMI

¹²niyehaana khandi khu MWAMI amatukhu akayabukula esiesuho. Ma yeetse nelikondi liomuhika mulala, kube omusango kwebirarungwa; ne amatukhu kokhuranga kala siketsa okhubalwa khandi tawe.

¹³Olwo Munasariti amalanga amatukhu kobwehaani khu MWAMI, akhole omulukha yikwo. Yeetse hamuliangokwe Liheema,

¹⁴ma ahaane emiruko chitaru singa omusangokwe, khu MWAMI: mbu likondi liomuhika mulala elirali nobulema bwosi tawe, libe omusango kwokhusambwa, nende lisibini liomuhika mulala elirali nobulema libe omusango kwetsimbi, nende limiiku elala elirali nobulema bwosi, libe omusango kwobuhambani.

¹⁵Khandi ahaane esimwelo siemikaati echiralimwo amamela, namandasi kobusie obunyukhe akachokanibubwe nende amafura komuseituni, nebibisikuti ebibakhilwekhwo amafura, ma ameetakhwo emisango chiobuswache, nende emisango chiewaini echienyekhanga.

¹⁶Naye omwesaalisi alabileera imbeli wo MWAMI, ma abihaane singa omusango kwetsimbi nende omusango kwokhusambwa.

¹⁷Alahaana limiiku libe omusango kwobuhambani khu MWAMI, halala nesimwelo siemikaati echiralimwo amamela; khandi alahaana omusango kwobuswache nende ewaini.

¹⁸Abekele liswi lilie eliahanwa khu MWAMI hamuliangokwe Liheema nabukula liswi yilio liomurwe okwahulwa, nalira mumul'lo okuli hasi womusango kwobuhambani.

¹⁹Omwesaalisi naye abukule libeka lielimiiku nilitekhelwe halala neliandasi elala eliralimwo amamela eliomusimwelo, nesibisikuti silala esiralimwo amamela, nabira khubikalo bio Munasariti olwa aba namal'le okhwebeka omurwekwe okwahanwa khu MWAMI.

²⁰Ma omwesaalisi abihaane singa omusango omuchomekhe imbeli wo MWAMI; kuno nomukabwa omutsienukhu kwOmwesaalisi, halala neinyama yokhusilifu nende esilenje sielimiiku esili esiomwesaalisi khulwe lilako. Inyuma we yako, Omunasariti uyo anyala okhunywa ewaini.

²¹Kano niko amalako ko Munasariti; nebutswa nikakhaba mbu Omunasariti yakhesuha okhuhaana omusango okuyombele akesiesuho sisie simutakhanga okhuhaana, okhwola ahesie esiesuho sisie singa obwo mwene yalaka.

²²OMWAMI nabool'la Musa

²³abool'le Haruni nende abasianibe okhurumikhila amang'ana kano khulwokhusaayila abandu ba Isiraeli ikhabi:

²⁴OMWAMI akhulaamile ikhabi khandi akhulinde;

²⁵OMWAMI akhubeela tsimbabasi nende esirendasie.

²⁶OMWAMI akhuhenge oluboni, khandi akhuhelesie omulembe.

²⁷Ma OMWAMI naboola mbu “Nibakharala eliira lianje khulwo khulaamila Abaisiraeli tsiikhabi nase nambahelesie tsikhabi.”