Read lunyore OBUBALI 7 Bible Online

OBUBALI 7 - lunyore bible

OBUBALI 7

¹Ne khwitukhu elia Musa yali namal'le okhusinjisia Liheema liokhubaho khwo MWAMI, yalitsukhil'lakhwo amafura nende okhuliahula, halala nebindu biamwo biosi nende olusambwa nebimanulwa bialwo biosi.

²Ma abemeli betsinzibulo tsia Baisiraeli, abali khandi abakhongo bebilibwa biabwe, nibo khandi abali okhusinjil'la omulimo kwokhubala abandu,

³baleera ebihanwa biabwe imbeli wo MWAMI singa mbu, amakaari kasasaba akalikhwo ebifuunikho, netsing'ombe likhumi natsibili, likari elala khubuli abemeli babili, khandi echulukhi ndala khubuli omwemeli mulala. Olwa bali nibamal'le okhubihaana,

⁴OMWAMI yabool'la Musa mbu,

⁵“Obibukule okhurula khubo mbu birumikhilwe khumulimokwe Liheema; obihaane khu Balawi okhulondokhana nemilimo echia bahebwa okhukhola.”

⁶Kho Musa nabukula amakaari tsana netsing'ombe, nabihaana khu Balawi.

⁷Yahaana amakaari kabili netsing'ombe tsine, khubesilibwa sia Gerishoni,

⁸khandi nahaana amakaari kane netsing'ombe munane, khubesilibwa sia Merari. Emilimo chiabwe chiosi chiakholwa hasi hobwemeli bwa Itsamari omusiani wa Haruni omwesaalisi.

⁹Nebutswa Musa siyahaanakhwo esindu khubesilibwa sia Kohatsi tawe; sichila ebindu ebitsienukhu ebia balindanga babichinganga khumabeka kabwe.

¹⁰Khandi abemeli yabo baleera ebihanwa khulwe lisabo liokhuhaana olusambwa khu MWAMI. Olwa bali niberechekhele okhuhaana ebihanwa biabwe khulusambwa;

¹¹OMWAMI yabool'la Musa mbu, “Obabool'le mbu sielitukhu khulwa amatukhu likhumi nende kabili omwemeli mulala aleere ebihanwa bibie khulwo okhuhanwa khwolusambwa khu MWAMI.”

¹²Owaleera esihanwasie khwitukhu liokhuranga yali Nashoni omusiani wa Aminadabu, owolwibulo lwa Yuda.

¹³Esihanwa sisie siali olusalilo l'lala lwefetsa, oluhela ekilo ndala nende enusu, epeseni ndala eyefetsa yobusiro obuhela etsiguramu etsimia munane nochela khubusiro obwahuchil'lwa, biosi nibitsuyekhwo obusie obunyukhe obutsokanibwemwo amafura khulwo omusango kwobuswache.

¹⁴Khandi yahaana olusalilo l'lala lwetsahabu olwo obusiro obuhela etsiguramu emia ndala nende likhumi nilwitsuyekhwo obwali;

¹⁵neing'ombe ehunwa ndala, nelimiiku elala, nesimeme siomuhika mulala silala, khulwo omusango kwokhusambwa;

¹⁶imbusi ekhole ndala khulwo omusango kwetsimbi;

¹⁷etsichulukhi tsibili, namamiiku karano, netsikhole tsirano, nebimeme biomuhika mulala birano khulwo omusango kwobuhambani.

¹⁸Khwitukhu liakhabili Netsaneli omusiani wa Suari, omwemeli wolwibulo lwa Isakari, yaleera esihanwa sisie.

¹⁹Esihanwa sisie siali olusalilo olukali l'lala lwefetsa, oluhela ekilo ndala nende enusu, nepeseni ndala eyefetsa ehela etsiguramu etsimia munane khubusiro obwahuchil'lwa, biosi nibitsuyekhwo obusie obunyukhe obutsokanibwemwo amafura khulwo omusango kwobuswache.

²⁰Khandi yahaana olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

²¹neing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

²²imbusi ekhole ndala khulwo omusango kwetsimbi;

²³etsichulukhi tsibili, namamiiku karano, netsikhole tsirano, nebimeme biomuhika mulala birano khulwo musango kwobuhambani.

²⁴Khwitukhu liakhataru Eliabu omusiani wa Heloni, omwemeli wolwibulo lwa Sabuloni yaleera esihanwa sisie.

²⁵Esihanwa sisie siali olusalilo olukali l'lala lwefetsa, oluhela ekilo ndala nende enusu, epeseni ndala ehela etsiguramu tsimia munane nochela khubusiro obwahuchil'lwa, biosi nibiitsuyekhwo obusie obunyukhe obutsokanibwemwo amafura khulwo omusango kwobuswache;

²⁶olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

²⁷ing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

²⁸imbusi ekhole ndala khulwo omusango kwetsimbi;

²⁹etsichulukhi tsibili, namamiiku karano, netsikhole tsirano, nebimeme biomuhika mulala birano khulwo musango kwobuhambani.

³⁰Khwitukhu liakhane Elisuri omusiani wa Shedeuri omwemeli wolwibulo lwa Rubeni yaleera esihanwa sisie.

³¹Esihanwa sisie siali olusalilo olukali l'lala ekilo ndala nende enusu; epeseni ndala eyefetsa ehela etsiguramu etsimia munane noluchela khubusiro obwahuchil'lwa; biosi nibiitsuyekhwo obusie obunyukhe obutsokanibwemwo amafura khulwo omusango kwobuswache;

³²olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

³³neing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

³⁴imbusi ekhole ndala khulwo omusango kwetsimbi;

³⁵etsichulukhi tsibili, namamiiku karano, netsikhole tsirano nebimeme biomuhika mulala birano khulwo musango kwobuhambani.

³⁶Khwitukhu liakharano Shelumieli omusiani wa Surishadai, omwemeli wolwibulo lwa Simioni yaleera esihanwa sisie.

³⁷Esihanwa sisie siali olusalilo l'lala lwefetsa, oluhela ekilo ndala nende enusu, epeseni ndala eyefetsa ehela etsiguramu etsimia munane nochela khubusiro obwahuchil'lwa biosi nibitsuyekhwo obusie obunyukhe obutsokanibwemwo amafura khulwo omusango kwobuswache;

³⁸olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

³⁹ing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

⁴⁰imbusi ekhole ndala khulwo omusango kwetsimbi;

⁴¹etsichulukhi tsibili, namamiiku karano, netsikhole tsirano khulwomusango kwobuhambani.

⁴²Khwitukhu liakhasasaba Eliasafu omusiani wa Deweli, omwemeli wolwibulo lwa Gadi yaleera esihanwa sisie.

⁴³Esihanwa sisie siali olukali l'lala lwefetsa, oluhela ekilo ndala nende enusu, epeseni ndala eyefetsa ehela etsiguramu etsimia munane nochela khubusiro obwahuchil'lwa; biosi nibiitsuyekhwo obusie obunyukhe obutsokanibwemwo amafura khulwo omusango kwobuswache;

⁴⁴olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

⁴⁵ing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

⁴⁶imbusi ekhole ndala khulwo omusango kwetsimbi;

⁴⁷etsichulukhi tsibili, namamiiku karano, netsikhole tsirano, nebimeme biomuhika mulala birano khulwo omusango kwobuhambani.

⁴⁸Khwitukhu liakhane nakhataru Elishama omusiani wa Amihudi, omwemeli wolwibulo lwa Efuraimu yaleera esihanwa sisie.

⁴⁹Esihanwa sisie siali olusalilo l'lala lwefetsa oluhela ekilo ndala nende enusu; epeseni ndala eyefetsa ehela etsiguramu etsimia munane nochela khubusiro obwahuchil'lwa; biosi nibiitsuyekhwo obusie obunyukhe obutsokanibwemwo amafura khulwo omusango kwobuswache;

⁵⁰Olutaabo l'lala lwetsahabu oluhela etsiguramu emia ndala nende likhumi nilwitsuyekhwo obwali;

⁵¹ing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

⁵²imbusi ekhole ndala, khulwo omusango kwetsimbi;

⁵³etsichulukhi tsibili, namamiiku karano, netsikhole tsirano, nebimeme biomwesi mulala birano khulwo musango kwobuhambani.

⁵⁴Khwitukhu liamunane Gamalieli omusiani wa Pedasuri, omwemeli wolwibulo lwa Manase yaleera esihanwa sisie.

⁵⁵Esihanwa sisie siali olusalilo l'lala lwefetsa, oluhela ekilo ndala nende enusu; epeseni ndala yefetsa ehela etsiguramu etsimia munane, nochela khubusiro obwahuchil'lwa; biosi nibitsuyekhwo obusie obunyukhe obutsokanibwemwo amafura khulwo omusango kwobuswache;

⁵⁶olusalilo lwetsahabu oluhela etsiguramu emia ndala nende likhumi, nilwitsuyekhwo obwali;

⁵⁷ing'ombe ehunwa ndala, nelimiiku elala, nesimeme siomuhika mulala silala, khulwo omusango kwokhusambwa;

⁵⁸imbusi ekhole ndala khulwa omusango kwetsimbi;

⁵⁹etsichulukhi tsibili, namamiiku karano, netsikhole tsirano, nebimeme biomuhika mulala birano khulwomusango kwobuhambani.

⁶⁰Khwitukhu liakharano nakhane Abidani omusiani wa Gideoni omwemeli wolwibulo lwa Benjameni yaleera esihanwa sisie.

⁶¹Esihanwa sisie siali olusalilo l'lala lwefetsa oluhela ekilo ndala nende enusu; epeseni ndala yefetsa ehela etsiguramu etsimia munane nochela khubusiro obwahuchil'lwa; biosi nibitsuyekhwo obusie obunyukhe obutsokanibwemwo amafura khulwo omusango kwobuswache;

⁶²olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

⁶³ing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

⁶⁴imbusi ekhole ndala khulwo omusango kwetsimbi;

⁶⁵etsichulukhi tsibili, amamiiku karano, netsikhole tsirano, nebimeme biomuhika mulala birano khulwo omusango kwobuhambani.

⁶⁶Khwitukhu lielikhumi Abieseri omusiani wa Amishadai, omwemeli wolwibulo lwa Dani yaleera esihanwa sisie.

⁶⁷Esihanwa sisie siali olusalilo l'lala lwefetsa oluhela ekilo ndala nende enusu; epeseni ndala eyefetsa ehela etsiguramu etsimia munane nochela khubusiro obwahuchil'lwa; biosi nibitsuyekhwo obusie obunyukhe obutsokanibwemwo amafura khulwo omusango kwobuswache,

⁶⁸olusalilo l'lala lwetsahabu oluhela etsiguramu emia ndala nende likhumi, nilwitsuyekhwo obwali;

⁶⁹ing'ombe ehunwa ndala, nelimiiku elala, nesimeme siomuhika mulala silala khulwa omusango kwokhusambwa;

⁷⁰imbusi ekhole ndala khulwo omusango kwetsimbi;

⁷¹etsichulukhi tsibili, namamiiku karano, netsikhole tsirano, nebimeme biomuhika mulala birano khulwo omusango kwobuhambani.

⁷²Khwitukhu lielikhumi nal'lala, Pagieli omusiani wa Okirani, omwemeli wolwibulo lwa Asheri yaleera esihanwa sisie.

⁷³Esihanwa sisie siali olusalilo l'lala lwefetsa oluhela ekilo ndala nende enusu, epeseni ndala yefetsa ehele etsiguramu etsimia munane nochela khubusiro obwahuchil'lwa; biosi nibitsuyekhwo obusie obunyukhe obutsokanibwemwo amafura khulwa omusango kwobuswache;

⁷⁴olusalilo l'lala lwetsahabu oluhela etsiguramu emia ndala nende likhumi nilwitsuyekhwo obwali;

⁷⁵ing'ombe ehunwa ndala, nelimiiku elala, nesimeme siomuhika mulala silala khulwo omusango kwokhusambwa;

⁷⁶imbusi ekhole ndala khulwo omusango kwetsimbi;

⁷⁷etsichulukhi tsibili, namamiiku karano, netsikhole tsirano, nebimeme biomuhika mulala birano khulwo omusango kwobuhambani.

⁷⁸Khwitukhu lielikhumi nakhabili Ahira omusiani wa Enani, omwemeli wolwibulo lwa Nafutali yaleera esihanwa sisie.

⁷⁹Esihanwa sisie siali olusalilo l'lulala lwefetsa oluhela ekilo ndala nende enusu, epeseni ndala yefetsa ehela etsiguramu etsimia munane, nochela khubusiro obwahuchil'lwa, biosi nibitsuyekhwo obusie obunyukhe obutsokanibwemwo amafura khulwo omusango kwobuswache;

⁸⁰olusalilo l'lala lwetsahabu oluhela etsiguramu emia ndala nende likhumi nilwitsuyekhwo amalesi obwali;

⁸¹ing'ombe ehunwa ndala, nelimiiku elala, nesimeme siomuhika mulala silala, khulwo omusango kwokhusambwa;

⁸²imbusi ekhole ndala khulwo omusango kwetsimbi;

⁸³etsichulukhi tsibili, namamiiku karano, netsikhole tsirano, nebimeme biomuhika mulala birano khulwo omusango kwobuhambani.

⁸⁴Bino nibio ebihanwa ebiabemeli likhumi nababili ba Baisiraeli biobwahuli bwolusambwa, ebia baleera khulwomukho kwokhuhaana olusambwa khu MWAMI: etsisahani likhumi natsibili tsiefetsa, etsipeseni likhumi natsibili tsiefetsa, nende tsindaabo likhumi nachibili chietsahabu.

⁸⁵Buli olusalilo lwefetsa lwachelwa ekilo ndala nende enusu khandi buli epeseni yachelwa etsiguramu etsimia munane. Efetsa yosi yebimanulwa yibio yachelwa etsikilo amakhumi kabili natsine natsitaru nende etsiguramu tsimia tsisasaba nochela khubusiro obwahuchil'lwa obwo Muhekalu.

⁸⁶Tsindaabo tsietsahabu likhumi natsibili nachio chiali ekilo ndala netsiguramu tsimia tsitaru namakhumi kabili ne tsiali nitsitsuyekhwo obwali nochela khubusiro obwahuchil'lwa obwo Muhekalu.

⁸⁷Emiruko chiosi chiomusango kwokhusambwa chiali etsichulukhi likhumi nachibili, namamiiku likhumi nakabili, nebimeme biomuhika mulala likhumi nabibili, halala nende emisango chiobuswache echihanwanga halala n'natsio; netsikhole etsiomusango kwetsimbi likhumi natsibili.

⁸⁸Emiruko chiosi chiomusango kwebihanwa biobuhambani chiali etsichulukhi amakhumi kabili natsine, namamiiku amakhumi kasasaba, netsikhole amakhumi kasasaba nebimeme biomuhika mulala amakhumi kasasaba. Bino biali ebihanwa biomukho kwokhuhaana olusambwa khu MWAMI olwa lwali nilumal'le okhutsukhiil'lwakhwo amafura.

⁸⁹Ne olwa Musa yenjila Mwiheema okhubool'lana no MWAMI, yahulila OMWAMI nal'lomanga n'naye okhurula hekulu wesifuunikho sie Lisanduku lie Indakano, okhurula hakari wabakerubi babili.