Read lunyore OBUBALI 8 Bible Online

OBUBALI 8 - lunyore bible

OBUBALI 8

¹OMWAMI nabool'la Musa mbu,

²“Bool'la Haruni mbu olwa oba norenjekha etsitaya tsine natsitaru khusihani; atsirenjekhe khulwo khuhengia abulafu bwatsio okhwakha nibuhengele imbeli wesihani.”

³Haruni nakhola singa mbwo; yarenjekha etsitaya tsiasio okhuhaana obulafu imbeli wesihani, singa obwo MWAMI yali nalachile Musa.

⁴Esihani sietsitaya sialombwa singa mbu: Sialombwa khutsahabu eyatuywa okhurula hasi wasio okhwola ikulu. Esihani sietsitaya yisio sialombwa singa OMWAMI yamanyia Musa.

⁵OMWAMI yabool'la Musa mbu,

⁶“Hiinia Abalawi mubaana ba Isiraeli ma obasiiye.

⁷Obasiiye munjila yino mbu obanyul'lusiekhwo amaatsi akokhubasiiya, ma obabool'le babeke emibili chiabwe chiosi nolumwo khandi basaabe tsingubo tsiabwe. Ne munjila iyio betsa okhuba abasiyikhu.

⁸Ma babukule ehunwa halala nomusango kwayo kwobuswache okwobusie obunyukhe obutsokanibubwemwo amafura; nawe obukule echulukhi yindi khulwa omusango kwetsimbi.

⁹Oleere Abalawi imbeli we Liheema liokhubaho khwo MWAMI; nobunjelesia omukanda kwosi okwabandu ba Isiraeli.

¹⁰Oleere Abalawi imbeli wo MWAMI; ne abandu ba Isiraeli nabo bare amakhono kabwe khu Balawi;

¹¹Ma Haruni yetsa okhubahaana Abalawi khu ise, singa esihanwa esichomekhe okhurula khu Baisiraeli, kho babe abanyala okhukhola Omulimo kwanje.

¹²Ne Abalawi nabo bare amakhono kabwe khumirwe tsietsichulukhi tsana; ndala ebe omusango omusambe khu ise, ne eyindi ebe omusango kwetsimbi khulwo okhubasiya.

¹³“Ma ore Abalawi imbeli wa Haruni khandi obahaane khu ise singa esihanwa esichomekhe ma babe mubulindi bwa Haruni halala nabasianibe.

¹⁴Munjila yiyi witsa okhwahula Abalawi okhurula khu Baisiraeli mbu babetsenje abanje.

¹⁵Nomal'le okhusiiya nende okhubahaana khu ise, kho nilwo olwa banyala okhwinjila nende okhukhola emilimo Mwiheema.

¹⁶Ise mbabukulanga okhuba abanje musilenje siabaana ba mbeli abasiani bosi mu Baisiraeli bosi.

¹⁷Okhuba abaana ba mbeli bosi abomubandu Baisiraeli nabanje, yabo ababaana babandu nende abemiruko. Khwitukhu yilio olwa ndeera abaana ba mbeli bosi musibala sie Misiri, ndabahula babe abanje.

¹⁸Ne mal'le okhubukula Abalawi musilenje siabekulanda bosi mubaana ba Baisiraeli.

¹⁹Ndahan'ne Abalawi khu Haruni nabaanabe mbu babe esihanwa siabwe mubaana ba Baisiraeli, khulwo khukhol'la Abaisiraeli emilimo Mwiheema liokhubaho khwo MWAMI nende khulwo okhusinga Abaisiraeli khwikhupako liosi eliakhabasalisia nibakhesunda ahembi nende Habundu Hatsienukhu.”

²⁰Kho nimbwo Musa na Haruni nomukanda kwosi kwabaana Baisiraeli bakhol'la Abalawi singa OMWAMI yalaka Musa.

²¹Ne Abalawi nabo nibesiya khubwoni, nibasaaba tsingubo tsiabwe; Haruni nabahaana khu MWAMI singa esihanwa esichomekhe. Khandi yakhola omusango kwokhubasiya.

²²Ma olunyumakhwo Abalawi nibenjila okhukhola omulimo kwabwe Mwiheema nibali hasi hobulindi bwa Haruni nende abaana baabe. Ne abandu bakhol'la Abalawi singa OMWAMI yali nalachile Musa mbu bakhol'lwe.

²³OMWAMI nabool'la Musa mbu,

²⁴“Kano niko akenya kakholekhe khu Balawi; mbu buli olwo Omulawi yoola emihika amakhumi kabili nachirano, yenjilenje mukhukhola emilimo Mwiheema Liokhubaho khwo MWAMI,

²⁵ne olwa yoola emihika amakhumi karano, alekhenje okhukhola emilimo yichio, ne aratiya khandi tawe.

²⁶Nebutswa inyuma we yaho anyala khukhonyel'la abaana babwe Mwiheema, okhulinda ebia balekhelwa; ne arakhola emilimo mwo khandi tawe. Nimbwo Abalawi benyekhanga bakhole emilimo chiabwe.”