Read lunyore MIKA 1 Bible Online

MIKA 1 - lunyore bible

MIKA 1

¹Mumatukhu ka Yotsamu, Ahasi, nende Hesekia bali abaruchi ba Yuda, OMWAMI yahelesia Mika okhurula mwitaala lia Moreshetsi amang'ana kano. OMWAMI yabisul'la Mika amang'ana kano kosi khu Samaria nende Yerusalemu.

²Hulile kano inywe abandu bamahanga mwesi; hulile kano inywe mwesi abamenyele khusibala! OMWAMI Nyasaye alahaana obukobokheli khwinywe. Hulile! Al'lomanga okhurula mu Hekaluye yomwikulu.

³OMWAMI yetsanga okhurula habundu hahe hatsienukhu; aletsa hasi ma achende khubutenje bwebikulu.

⁴Ebikulu nabio bilakhamulukha isiwe, singa esinda esal'lukhanga mumul'lo; bilasundukha m'mwalo, singa amaatsi kasundukhanga okhurula khusikulu.

⁵Yaka kosi kakhekholekhe sichila abandu ba Isiraeli bayona khandi bakhol'la Nyasaye indiri. Niwina onyala okhutulwa khulwe indiri ya Isiraeli bakhola? Nelitookho lia Samaria liene nilio elinyala okhutulwa! Niwina oli nesikha siokhukhola tsimbi tsiokhwekayakaya ebiniini mu Yuda? Nelitookho lia Yerusalemu liene!

⁶Khulwe yako OMWAMI aboolanga mbu, “Nakhole Samaria okhuba esifuumi siamahindi musikuuri, habundu ahokhuraaka emisabibu. Naasundule amachina kelitookho mwibanda nifuunula emisinji chialio.

⁷Ebiniini bialio biosi ebilahi biakhatubulwe nibikwa mubitonye, ebindu biosi ebiahanwa khubasambale bomuhekalu biakhasambwe mumul'lo ne ebiniini bialio biosi biakhakwe esifuumi esiebil'lwa. Samaria lianyoola ebindu yibi biosi khulwemilukha chiokhunyoola olwibulo, ne luno, abasuku balio nababibukule nibabihil'la abasambale bomuhekalu habundu hosi.”

⁸Ma Mika naboola mbu, “Khulwesibi yisio nandekhuule nindakaya. Khulwokhumanyia esibeela sianje, nanjende ebilenje ebikhaya nindi esihechenye. Naakhupe etsikhwisi singa esibwe, nindekhuula singa amahuto.

⁹Amafumire ka Samaria sikanyala okhuhona tawe, ne Yuda lili ahembi okhusaalila munjila inelwa iyio. Okhumululwa khwol'le khubilibwa bia Yerusalemu liene ahabandu banje bamenyanga.”

¹⁰Murabool'lekhwo abasuku befwe abali mu Gatsi akokhulekwa khwefwe tawe. Muralekha balole okhulakaya khwenywe tawe. Inywe abandu ba Betsi Leafura, mukalakale mulukuukhi okhumanyia okhwesikoka khwenywe!

¹¹Inywe abandu ba Shafiri tsie mubuhambe, nimuli esihechenye khandi nimuli netsisoni. Yabo abamenyanga mu Saanani barateemakhwo okhurula mwitookho liabwe tawe. Olwa namuhul'le abandu ba Betseseli nibekhuulanga namumanye mbu simunyala okhwilukhilayo khulwokhunyoola omulembe tawe.

¹²Abandu abamenyanga Marotsi balindil'langa musihenda mwoyo okhunyoola obukhonyi sichila OMWAMI uleer're amakhupako ahembi khu Yerusalemu.

¹³Inywe abamenyanga Lakishi, bohe etsisululi tsienywe khumakari. Mwakhola tsimbi singa etsia Isiraeli bakhola ma nimuchila litookho lia Yerusalemu nilikhola tsimbi.

¹⁴Ne luno abandu ba Yuda Balaseebula litaala lia Moreshetsi Gatsi. Abaruchi ba Isiraeli sibalanyoolakhwo obukhonyi okhurula khwitaala lia Akishibi tawe.

¹⁵Inywe abandu ba Maresha, OMWAMI namuhaane mumakhono kabasuku abanabafumile litaala lienywe. Abemeli ba Isiraeli nabahachibwe okhwebisa mulwanga lwa Adulamu.

¹⁶Inywe abandu ba Yuda, beke olwale khulwo khwekhuula abaana benywe abamwayanza. Mwekhole okhuba nesiole singa esietsisori sichila abaana benywe nababukulwe okhurula khwinywe nibahilwa mubuhambe.