Read lunyore MIKA 3 Bible Online

MIKA 3 - lunyore bible

MIKA 3

¹Ma nimboola mbu, “Hulile inywe abemeli ba Isiraeli!” Mukwananga okhuhendela obukhalachi bwahabwene,

²nebutswa musuulanga akali amalahi ne nimuyanza akali amabi. Muhinianga likhoba khubandu banje nibali mwoyo nimurandul'la inyama okhurula khumakumba kabwe.

³Yee, mulitsanga inyama yabandu banje, nimurandul'la likhoba okhurula khumibili chiabwe, ne nimufunaka amakumba kabwe nimukakhalaka mubitonye singa inyama yokhureebwa mundabu.

⁴Inyinga yitsanga olwa mwakhalakayile OMWAMI nebutswa siyakhamukalusie tawe. Siyakhahuyie khumasaayo kenywe tawe, sichila mwamala okhukhola akali amabi.

⁵Abandu banje bakaatwanga nende abaroobi abasubisianga omulembe khuyabo ababarunganga amapesa ne nibarisia yabo abarabbarunganga amapesa mbu nabanyoole obulwani. Khubaroobi bene yabo, kano niko ako MWAMI aboolanga:

⁶“Abaroobi inywe, litukhu lienywe lili ahembi okhuhwa, eliuba liitsa okhuyeela n'nenywe. Sinamube nobunyali bwokhurooba tawe, khandi sinamube abanyala okhuroobakhwo ling'ana liosi tawe sichila mwali okhukaata abandu banje.”

⁷Yabo abaroobanga akakhekhole mumatukhu ketsanga, bakhasimbe omurwe olwa kakhabule okhwekholekha. Bakhahambwe netsisoni sichila Nyasaye siyakhabakalusie tawe.

⁸Nebutswa ise, OMWAMI yanzitsusiangamwo omwoyo nende obunyali bubwe, khandi yambelesianga okhumanyilisia obukhalachi bwahabwene nende ikholo khulwokhubool'la abandu ba Isiraeli aketsimbi tsiabakholanga.

⁹Hulile akamboolanga inywe abaruchi ba Isiraeli, inywe ababihil'lwanga amalunji nimusukhania amalunji okhuba amasiamu.

¹⁰Mwiranga abandu nende okhuhaana obukhalachi obusiamu mu Yerusalemu.

¹¹Abaruchi belitookho bamihanga khulwokhubukula ebihetso, abesaalisi benoosianga Amalako khulwokhurungwa, abaroobi baroobanga khulwokhunyoola amapesa — ne bosi mbwo baboolanga mbu OMWAMI ali halala n'nabo. Baboolanga mbu “Esibi siosi sisinyala okhukhukwila tawe sichila OMWAMI ali halala n'nefwe.”

¹²Ma kho khulwenywe Sayuni nasilimwe singa omukunda, ne Yerusalemu lilakwa esifuumi siamahindi ne esikulu sie Hekalu yo MWAMI, silakwa omutsuru.