Read lunyore MIKA 4 Bible Online

MIKA 4 - lunyore bible

MIKA 4

¹Mumatukhu aketsanga, esikulu esili aha Ehekalu yombokhwa, siakhabe ikulu okhusila okhuyomba ebindi, siakhachinguukhe ikulu khubikulu biosi. Amahanga amenji kakhetse aha sili,

²ne abandu bako bakhaboole mbu, “Chende khwanichile khusikulu sio MWAMI, khu Hekalu ya Nyasaye wa Isiraeli. Nakhwibaal'le aka yenyanga khukhole; nefwe nakhuchende mutsinjila etsia yahula. Okhuba obwibaali bwo MWAMI burulanga Yerusalemu, al'lomanga nabandu baabe naali Sayuni.”

³Yakhaleere omulembe hakari wamahanga, mumahanga ketsingufu akali ahembi nende ehale. Balatuya tsinganga tsiabwe nibatsikhola amachembe, ne amafumo kabwe balakatuya okhukakhola tsinjeso. Amahanga sikalatsia mwihe khandi tawe, kata okhwerechekhela obulwani khandi tawe.

⁴Buli mundu alamenya mumulembe naali mumukundakwe kwemisabibu nende okwemikhuyu, ne siyakhabeho owokhumurisia tawe. OMWAMI Wokhunyala Biosi umal'le okhusubisia akene yaka.

⁵Buli lihanga liekayakayanga nende okhulonda amalako komunyasaye walio, nebutswa ifwe khulekayakaya nende okhulonda amalako ko MWAMI Nyasaye wefwe inziayo.

⁶OMWAMI aboolanga mbu, “Inyinga yitsanga olwa ndakhabunjelesie abandu ba ndali okhuhelesia esinyasio, yabo abali okhukhupila esibi mubuhambe.

⁷Nabatiecheli khandi bali ehale okhurula ingo wabwe, nebutswa nanjiake okhukhola amang'ana amayia nende yabo abasikala, ne nababe lihanga likhongo. Nambetsenje omuruchi wabwe khusikulu sia Sayuni okhurula khunyinga y'yo okhwola khusihesi.”

⁸Nawe Yerusalemu, aha Nyasaye ahengelanga abandube singa obwa omwayi ahenganga amakondike, noobe litookho likali lielihanga elialinji lihanga lienywe khale.

⁹Nisina esichilanga nimulakaya butinyu? Nisina esichilanga nimukhupa esibi singa omukhasi oli neinumwa? Kakhali khulwa mbu mubula omuruchi, ma abachetsihi benywe bafwiye noho?

¹⁰Mwekolole nimubinda, inywe abandu ba Yerusalemu singa omukhasi oli neinumwa, okhuba luno namurule mwitookho nimumenya esioba. Nakamuhakie okhutsia Babulonia, nebutswa ebwene y'yio, OMWAMI namusoola okhurula khubasuku benywe.

¹¹Amahanga amenji kamal'le okhwebunjikha khulwo khumuseera. Abandu bako baboolanga mbu, “Okhwola Yerusalemu limumwe! Nakhulole litookho yili nilili mubusasikhi!”

¹²Nebutswa sibamanyile ako MWAMI apaalanga tawe. Sibamanyile mbu, baleer'rwe halala khulwo khuhebwa esinyasio singa obwobuswache bureebwanga halala khulwokhukhuywa tawe.

¹³OMWAMI aboolanga mbu, “Inywe abandu ba Yerusalemu, tsie muhelesie abasuku benywe esinyasio! Namukhole okhuba abetsingufu singa echulukhi eli netsinzika tsiesibia nende tsimbakayu tsiomukasa. Namuhuule amahanga amenji, ne namuhaane khuise OMWAMI wesibala siosi emiandu chiabanyoola khulwokhurumikhila tsingufu.”