Read lunyore MIKA 5 Bible Online

MIKA 5 - lunyore bible

MIKA 5

¹Inywe abandu ba Yerusalemu, ifwe khufumbiywe nabasikari! Baseeranga omwemeli wa Isiraeli!

²Kano niko ako MWAMI aboolanga, “Ibe Betselehemu elili Efuratsa, oli mulala khumataala matititi akali mu Yuda nebutswa okhurula mwiwe nambiniemwo omuruchi owanoruke Isiraeli owolwibulolwe lwachiaka okhurula mumatukhu kakhale.”

³Kho OMWAMI nalekhe abandube mumakhono kabasuku babwe okhwola olwomukhasi olumwanga nabe niyebuye omusiani. Ma nilwo lwa Baisiraeli abali mubuhambe nabahambane nende abandu babwe bene.

⁴Olwa yakhetse, yakhamihe abandube narumikhilanga tsingufu etsirulanga khu MWAMI halala nende obunyali bwo MWAMI Nyasaye mwene. Abandube bakhamenye mumulembe sichila abandu bali khusibala siosi bakhamanye obukhongo bubwe,

⁵naye yakhaleere omulembe. Olwa Abaasiria bakhaseere lihanga liefwe ne nibafunaka amasisi kefwe akakhusinganga, khwakharume abemeli befwe betsingufu tsinyinji okhulwana n'nabo.

⁶Nibarumikhilanga tsingufu tsiamakhono kabwe, bakhaleke esibala sia Asiria, esili liloba lia Nimurodi ne bakhakhusoole okhurula khubunyali bwa Baasiria olwa baseera esibala siefwe.

⁷Abandu ba Isiraeli abalisikala bakhabe singa eliime elirulanga khu MWAMI nilisangasia amahanga amenji khandi singa ifula esamanga ebiraakwa. Abandu bako bakheleete khu MWAMI ne tawe khubandu.

⁸Yabo abakhabe nibasikaye mumahanga bakhabe singa esimba ehimanga ebiokhulia mumutsuru nohomba mubwayilo: Olwa yinjilanga mumakondi, eketsumbanga nekafunaka mubitonye — ne obunaayi bwosi bwokhukasoola sibulikhwoho tawe.

⁹Abaisiraeli nabaleke abasuku babwe nibabamuma bosi pe.

¹⁰OMWAMI aboolanga mbu, “Munyinga y'yo ndakhamunuule etsisululi tsienywe nimulula amakaari kenywe.

¹¹Ndakhamulule amatookho akali musibala sienywe nisambula tsiminga tsienywe tsiosi.

¹²Naasambe ebindu biamurumikhilanga okhukhola obufumu ne namulekhe sila omulakuli wosi.

¹³Nanduye ebiniini bienywe nende amachina ketsisiilo tsinzienukhu; sinamutsilil'le okhwekayakaya ebiniini biabene mwalomba tawe.

¹⁴Nanumbe hasi ebiniini biomunyasaye omukhasi Ashera ebili musibala sienywe ma namume amatookho kenywe.

¹⁵Muburima bwanje obukali ndakhabanze es'sialia khumahanga kosi akaralondanga amalako kanje.”