Read lunyore MIKA 6 Bible Online

MIKA 6 - lunyore bible

MIKA 6

¹Hulile amang'ana ako MWAMI ayaalanga Isiraeli. Sinjila E OMWAMI ma oboole amang'ana komusekwo. Lekha ebikulu ebirambi nende ebimbichiti bihulile khukoboolanga.

²Hulile omuse kwo MWAMI inywe ebikulu ebikhongo, nende inywe omusinji kwesibala okweinziayo. OMWAMI ali nesifune siokhuyaala abandube. Yeetsa okhuba nomuse kwokhuyaala Isiraeli.

³OMWAMI areebanga mbu, “Abandu banje, nisina esia ndamukhol'la? Ndali okhumusitohela munjila sina? Ngalusie.

⁴Ise ndali okhumuhinia musibala sie Misiri nimununula okhurula mubuhambe. Ndali okhuruma Musa nende Haruni nende Miriamu okhumwemel'la inywe.

⁵Inywe abandu banje, mwitsul'le akomuruchi Balaki wa Moabu yali naloosisie okhumukhol'la nende khandi singa obwa Balaamu omusiani wa Beori yamukalusia. Mwitsul'le amang'ana akali okhwekholekhela khunjila okhurula khukambi ya Akasia okhwola Giligali. Mwitsul'le amang'ana yaka ne mwitsa okhumanyilisia akandakhola khulwokhumuhonia.”

⁶Nisihanwa sina esiandakhaleer'ra OMWAMI, Nyasaye womwikulu olwamba ninzitsa okhumwekayakaya? Ndakhamuleer'ra ebimoosi ebikhomefu okhusila khulwokhumusambila singa omusango noho?

⁷Mbula OMWAMI yakhayanzisibwa nimba nimuleer'ra amakondi etsielefu tsinyinji nohomba amafura komuseituni akanyala okhwitsula mumichela eminji okhusila noho? Mbula ndakhomuhelesia omusiani wanje wambeli singa omusango kwokhurunga khulwe tsimbi tsianje noho?

⁸Tawe, OMWAMI wakhumanyia akali amalahi okhukhola: akenyekhanga khukhole ngakano: Khukhole akali akahabwene khumanyie obuyanzi oburalilu, nende okhumenya mubuhambani bwokhwetutuyia khu Nyasaye.

⁹Nakobuchesi okhuhelesia OMWAMI oluyali. Alanjisianga khwitookho naboola mbu, “Hulile inywe abandu abebunjikhile mwitookho!

¹⁰Obuhinda obwanyoolwa mutsinjila tsisiamu buli mutsinyumba tsiabandu babi. Barumikhilanga ebipimo ebirali ebiahabwene, ne yako niko ake ise mbihil'lwanga.

¹¹Ise ndakhanyala mbwena okhubeela tsimbabasi abandu abarumikhilanga ebipimo biobukaati nende etsiratili etsibilanga abandu.

¹²Abahinda benywe bebelanga abatakha, nenywe mwesi muli ababehi.

¹³Kho mal'le okhuchiaka okhumusaalisia nende okhumulul'la khulwe tsimbi tsienywe.

¹⁴Namulitsenje ebiokhulia nebutswa sinamwikure tawe, mukatooto namubetsenje nimusili neinzala. Namuchinje ebindu nebutswa sinamubibikhe tawe, ne siesindu esia namubiikhe nasimulul'le mwihe.

¹⁵Namuraake obuswache ne sinamubuchese tawe. Namumine amafura okhurula mumiseituni, nebutswa sinamurumikhilekhwo amafura yako tawe. Namulombe ewaini nebutswa sinamuchinywe tawe.

¹⁶Yaka nakekhole khwinywe sichila mulondanga tsinjila tsisiamu tsiomuruchi Omuri nende etsiomusiani uwe omuruchi Ahabu yalondakhwo. Mutsilil'langa okhulonda amalako kabwe, ma khulwako namuleer're esibi siokhumutibia, ne buli mundu namuchaaye inywe. Abandu bosi buli habundu hosi nabamukhol'lengekhwo inzekhelesi.”