Read lunyore NAHUMU 2 Bible Online

NAHUMU 2 - lunyore bible

NAHUMU 2

¹Nineve, witsanga okhuseerwa! Omusuku wokhukhusasia wol'le! Linda oluhinga olwasira litookho! Henga abasuku khumuhanda! Werechekhe okhulwana!

²(OMWAMI ali ahembi okhukabusia obukhongo bwa Isiraeli singa bwalinji abasukube nibasili okhuyaaka.)

³Abasikari bali abasuku babwe bachingile ebikhumba ebiakhanyu, khandi bebikhile tsingubo tsinzakhanyu. Berechekhelanga okhulwana! Amakaari kobulwani kakha singa omul'lo! Etsisululi tsiabwe tsisesema.

⁴Amakaari kobulwani kelukhana mumihanda, nikatsia imbeli khandi kakalukha inyuma hakari welitookho. Kakha singa etsitochi kandi singa olweni.

⁵Abasikari abakhongo balangwa betse khulwana; betuyatuyanga olwa bateemanga okhwesunda imbeli. Ababaseera bayuchila okhutsia khumasisi kelitookho, ne barechekha esikhumba khulwo khufunaka amasisi.

⁶Ebilibwa bili hamuchela biekukha, abali munyumba yomuruchi bahambwa noburi obukali.

⁷Omukhaye womuruchi afumilwa, abatiyi baabe balakaya singa amakhulwi, nibefumbel'la amakhono khulwo okhubeelela.

⁸Singa obwa amaatsi karulanga mwiyabo liafutukha, nimbwo abandu belukha okhurula Nineve! Balakaya nibaboola mbu, “Sinjile! Sinjile!” Ne abulaho owahenga inyuma.

⁹Yaake etsahabu! Yaake efetsa! Litookho liitsuyemwo obuhinda obwinji!

¹⁰Nineve limumilwe, lisikaye eliele ma lili es'soma. Emioyo chiabandu chitecheye khulwoburi; amasikamo kabwe katekelanga, tsingufu tsihweye, obweni bwabwe bufwililiye.

¹¹Litookho luno lili hena eliafwananga singa olwanga lwetsisimba tsiamenyangamwo, habundu hetsisimba tsindoro tsialisibungwa, hetsisimba tsisaatsa nende tsikhasi tsinyala okhutsia, nende habaana betsisimba banyala okhwebisa?

¹²Esimba isaatsa yeera inyama, ma nerandulania mubitonye nehelesia esimba ikhasi nende abaana bayo; esimba yetsusia olwanga neinyama ya yali netonyele mubitonye.

¹³OMWAMI Wokhunyala Biosi aboolanga mbu, “Ise ndi omusuku wenywe. Nzia okhusamba amakaari kenywe kobulwani. Abasikari benywe betsa okhwir'rwa mwihe, ma nambukule ebindu biosi ebiamwabukula okhurula khubandu bandi. Amang'ana kabarume benywe bakhenya sinakahulilwekhwo khandi tawe.”