Read lunyore NAHUMU 3 Bible Online

NAHUMU 3 - lunyore bible

NAHUMU 3

¹Woowe khwitookho liobukaati nende obwiri, elietsulamwo obuhinda bwokhunuula nende okhuyaakwa.

²Hulile! Okhusandukha khwesiboko, okhusalikana khwemigurudumu chiamakaari, okhwilukha khwetsisululi, okhwetunguya khwamakaari kobulwani.

³Abanin'ne khutsisululi babalwana, tsinganga tsiabwe tsiakha, amafumo kang'inan'gina! Emilambo chibunjikhilwe esituma esikali, emibili chiabafu abaranyala okhubalwa, ne abandu besikar'ra khutsio!

⁴Nineve, omutamba ahebwanga esinyasio. Nowelikondo lilahi khandi ali nobulosi bwokhwira; yali okhuloka amahanga ma nakahambe.

⁵OMWAMI Wokhunyala Biosi aboolanga mbu, “Nakhuhelesie esinyasio ibe Nineve! Nakhuhinie tsingubo osikale esihechenye ma nandekhe amahanga kalole esiechenye sisio, kalole es'simba murwe sisio siosi.

⁶Nakhukhol'lekhwo esihenyehenye, ne nakhubakhe esifwabwi khumubili kukwo kwosi. Abandu balarangala tsimoni tsiabwe khuibe noburi obukali.

⁷Yabo bosi abakhuhengakhwo balakwilukha. Balaboola mbu, ‘Nineve lisasikha! Niwina owakhenya okhulihotselesia? Owakhenya okhulilemia omwoyo niwina?’ ”

⁸Ibe Nineve, mbula wakhabakhwo bwela okhuyomba Tsebesi, litookho likhongo elie Misiri? Kata Tsebesi nalio liali nomuchela okwalisinga khubusuku singa lisisi — omuchela kwa Naili nikwo okwali okhulisinga.

⁹Tsebesi liarukanga Etsiopia nende Misiri ne sisialiho esiekal'la obunyali bwalio tawe. Libia liahamba obulina n'nalio.

¹⁰Ne kata mbwo abandu ba Tsebesi batilwa nibahilwa mubuhambe. Abaana babwe olwa banyoolungwa habundi hosi khumihanda, batiabwanga okhwola olwa bafwa. Abandu babwe boluyali babohwa neminyol'lo ma nibahilwa mubuhambe ma nibakabul'lwa abandu ababatila singa abasumba.

¹¹Nawe khandi Nineve, alalewa nokwil'lana! Olateema okhwilukha okhurula khubasuku baabo.

¹²Oluhinga olwasira litookho lulafwana singa emisaala chiemikhuyu echilikhwo amatunde amengu, ne nosungusa emisaala tsana ne amakhuyu amengu kakwa munwa kukwo.

¹³Abasikari benywe bafwana singa abakhasi ne esibala sienywe sibula ebiesingilo khubasuku benywe. Omulilo kulasamba ebichuma ebikal'langa ebilibwa.

¹⁴Mutahe amaatsi khulwokhwerechekhela okhuseerwa nabasuku, ma mulombe oluhinga lwenywe lutinye k'ka. Musienye litohi khulwokhulomba amatifwali.

¹⁵Kata mukhole mbwena musili abanabasambwe okhwola olwa mufwa nohomba namwir'rwe mwihe. Namwirwe mwesi pe singa ebiraakwa ebilibwanga nende tsisiche ma tsimala pe. Mwebulana ma nimumetekha singa tsisiche!

¹⁶Mwali okhwenyool'la abakhala abenji okhuyomba tsinyininyini tsiokhwikulu! Nebutswa luno sibaliho tawe, mufwana tsisiche tsiabambuye amabaha, ma tsipulukhile.

¹⁷Abakhongo benywe bafwana singa omusinga kwetsisiche etsiyel'le khumasisi khwitukhu liomunyiri. Ne olweliuba libalanga, ne nitsipulukha ne sialiho omanyilisianga hatsitsiye tawe!

¹⁸Ibe Omuruchi wa Asiria, abakafuna baabo bafwiye, ne abandubo boluyali bali mundoolo tsieinziayo. Abandu baabo basalaniye mubikulu ne abulaho onyala okhubakalusia mungo mwabwe tawe.

¹⁹Indesi yokhulesa obusalili bubwo sieliho tawe, ne amafumire kenywe sikanyala okhuleswa ma kahone tawe. Yabo bosi abakhahulila akokhumumwa khwenywe basangalanga nibakhupa amakhono. Mbula alikhwoho owahonokokha okhurula khuburima bwenywe obululu obweinziayo?