Read lunyore HABAKUKU 1 Bible Online

HABAKUKU 1 - lunyore bible

HABAKUKU 1

¹Yaka niko amang'ana ako MWAMI yabisul'la omuroobi Habakuku.

²Nakhureebe obukhonyi okhwola lina E OMWAMI nawe nosili okhumbul'la, khandi nosili okhukhusoola khubusoolo?

³Busina undekhanga okhulola amanyakhano singa yaka? Busina otsilil'langa okhuhenga butswa khububi yibu? Okhumululwa nende obusoolo bifumbiye khandi obulwani nende obulembani buli habundu hosi.

⁴Amalako namatofu khandi kabula esiakakholanga ne obukhalachi obulunji nabwo sibukholwanga tawe. Ababi balilil'langa abalunji; ma kho obukhalachi bukholwanga mubusiamu.

⁵Kho OMWAMI yamala abool'le abandu baabe mbu, “Hengelesie mumahanga akali ahembi n'nenywe ne mulachenya khu akamulolanga. Nziitsanga okhukhola esindu esibi mumatukhu kenywe nenywe sinamusubile olwa namubool'lwe tawe.

⁶Nandeere Abababulonia abandu abalulu khandi abarachonyanga tawe. Bachendanga musibala siosi okhuleka amahanga kosi.

⁷Bo nabandu abokhurisia nokhutechesia, ne musunga yabwe bebukul'langa amalako mumakhono kabwe.

⁸“Etsisululi tsiabwe netsinyangu okhuyomba etsingwe, khandi netsindulu p'pa okhuyomba ebibwe biabutukhu. Abachendela khutsio batsiyila neinjinia tooto, abachendela khutsio betsanga nibarula ehale. Bapulukhanga singa inditsu eyeyangile okhwira.

⁹“Betsanga okhuseera, ne abandu bosi ababalola olwa betsanga barimukhwa ikholo okhusila. Abahambe babwe nabenji singa omuyekhe.

¹⁰Bachaayanga abaruchi khandi batsekhel'langa abakhongo. Lubulaho oluhinga olunyala okhubekal'la okhuba babunjikhanga olukhuukhi khulwo nibaluleka.

¹¹Kho balutubul'langa singa obusindu nibatsilil'la imbeli. Bo nabandu besikha, nyasaye wabwe netsingufu tsiabwe abene.”

¹²E, OMWAMI Nyasaye wanje, ibe obetsangaho Nyasaye khasotso. Ibe ni Nyasaye wanje omutsienukhu khandi oweinziayo; oli Nyasaye wanje khandi omulindi wanje. Ibe wali okhuha Abababulonia tsingufu mbu bakhuhe esinyasio.

¹³Nebutswa ibe wakhahuchil'la mbwena abandu ababi abeinduli yaba. Tsimonitsio netsisiyikhu khandi sionyala okhuba ahabandu ababi bali tawe. Kho nisina esichilanga nosiling'ana olwabandu abalulu bamululanga yabo abali abalunji okhubayomba?

¹⁴Nisina esichilanga ibe nolola abandu singa tsisuche tsiom'maatsi nohomba singa ebimoolanga ebirali nomuruchi wokhubiemel'la?

¹⁵Abababulonia balubanga abandu neindowano singa tsisuche. Babatiila nende amakoko kabwe, nibakhupa liyoka liobusangali khulwokhubahamba.

¹⁶Kata khandi bekayakayanga amakoko kabwe nibakahan'na emisango sichila kabahetsanga biosi ebia barunanga ebilahi.

¹⁷Mbula balatsilil'la okhurumikhila tsinganga tsiabwe khasotso mbu batsilil'le okhumulula amahanga sila okhukabeela tsimbabasi?