Read lunyore HABAKUKU 2 Bible Online

HABAKUKU 2 - lunyore bible

HABAKUKU 2

¹Naniine khumunaara kwanje kwokhuhenga ma nanindil'le okhulola ako MWAMI nayambool'le mboole khandi aka nayangalusie khukobwekani bwanje.

²Naye OMWAMI yangalusia naboola mbu, “Handika hasi bulahi khumaseleti amang'ana aka nzia okhukhubisul'la. Okahandike bulahi mbu omundu wosi abe onyala okhukasoma mungoyingoyi.

³Okahandike sichila tsinyinga tsiamabisulo tsana okhwekhola tsisili okhwola. Nebutswa kaletsa okhwekhola bwangu ne sikalabeya tawe. Haundi kalasisil'la okhwekhola nebutswa okalindil'le; siahene kalahesikha ne sikalachweya tawe.

⁴Ne amang'ana tsana ngakano mbu: ‘Yabo abali ababi sibalahona tawe nebutswa abalunji balamenya khulwobusubili bwabwe khu Nyasaye.’ ”

⁵Emiandu chikaatanga. Abandu abawolu nabeloli abarachonyanga tawe. Singa olufu lwene sibekuranga tawe. Nisio esichilanga nibaleka lihanga nibameeta khulindi, khandi bakaleeranga halala okhuba akabwe abene.

⁶Abandu bosi abalekwa balasin'na khuyabo ababaleka nibabakhol'la inzekhelesi. Balaboola mbu “Woowe khu inywe ababunjelesinjia ebirali ebiabwe! Mulatsilil'la okhuhindihala khulwo khuhakia abamakobi kenywe okhumurunga okhwola lina?”

⁷Nebutswa inywe nimusili okhumanya, inywe abali okhuleka abasienywe, mulaba mwikobi abene ne mulahachibwa okhurunga injelesio. Abasuku nabetse nibamutechesia. Nabayaake ebindu bienywe.

⁸Inywe mwali okhuyaaka amahanga amenji, nebutswa luno yabo abali okhuhona nabamuyaake khulwo bwiri bwenywe khandi khulwo obulwani obwa mwakhol'la abandu bemusibala nende amatookho kasio.

⁹Mulitsiboolelwa inywe! Inywe mwali okhuhindihasia abeinzu yenywe okhurula khu ebia mwabukula khulwo okhulwana, khandi mwali okhuteema okhunyool'la hango henywe omulembe mbu harasalisibwa nohomba okhuba musibi tawe.

¹⁰Nebutswa amachoomo kenywe kaleera es'simba murwe khubeinzu yenywe. Khulwo khumulula amahanga amenji mwabeye okhweler'ra butswa esibi.

¹¹Kata amachina komwisisi kamulakayanga inywe, ne emikuulo tsilombanga eliyoka khwinywe.

¹²Mulitsiboolelwa, okhuba mwanyool'la litookho khububi nimuliombokha khubwiri.

¹³Amahanga kosi akamwaleka kahwelel'langa khulwe emilimo emitinyu echirali nobukhala, ne amombokho akakabeye okhwombokha kalasambwa nomul'lo. OMWAMI Wokhunyala Biosi niye okhol'le yaka.

¹⁴Nebutswa esibala siletsulamwo obumanyi bwoluyali lwo MWAMI singa amaatsi ketsulanga munyanza.

¹⁵Mulitsiboolelwa sichila muburima bwenywe mwachaaya abarende benywe nimubasimbia omurwe. Mwachila nibahutuma singa abakhol'lwe namalwa.

¹⁶Mulaba netsisoni musilenje sioluyali. Inywe abene mulanywa nimuhutuuma. OMWAMI alamunywesia esikombe sienywe abene. Esikombe siesinyasio esili m'mukhono musaatsa, ne oluyali lwenywe lulakalukhanibwa okhukwa tsisoni.

¹⁷Mwali okhurema emitsuru tsia Lebanoni; luno inywe mulakokwa hasi. Mwali okhwira etsisolo tsiayo, ne luno etsisolo tsilamurisia. Yaka nakekhole khulwobwiri bwamwakhola khandi khulwo busoolo obwamwakhol'la abandu bomusibala nende amatookho kasio.

¹⁸Esiniini sili nabukhonyi sina? Sio nesindu esiomubaatsi yali okhulomba ne siboolanga obubehi bwonyene. Sili nabulahi sina obwa sikhol'langa omulombi wasio ma kachila asisubila? Sio ni nyasaye oranyala okhul'loma.

¹⁹Mulitsiboolelwa sichila mubool'langa omusaala mbu “Buukha!” Khandi lichina mbu, “Sinjila!” Mbula esiniini siakhamuribul'lakhwo ling'ana noho? Sinyala okhureebwakhwo etsahabu nende nefeetsa, nebutswa obulamu sibulikhwo khusio tawe.

²⁰Nebutswa OMWAMI ali mu Hekaluye inzienukhu; lekha abandu bosi musibala siosi basiling'ane imbeliwe.