Read lunyore HABAKUKU 3 Bible Online

HABAKUKU 3 - lunyore bible

HABAKUKU 3

¹Khuno nokhusaaya khwomuroobi Habakuku, okhulondokhana nende Shikinotsi;

²E OMWAMI, ndahuliiye aka wakhola, nase nzitsuye nokhuchenya. Kho luno meeta okhukhola munyinga tsiefwe, ebikhole ebikali ebia wakholanga khale. Obetsenje netsimbabasi kata olwoli noburima.

³Nyasaye yetsanga khandi narula Edomu; Nyasaye omutsienukhu yetsanga narula musikulu sia Parani. Oluyalilwe lwafuunikha likulu; esibala nasio nisitsulamwo okhwitsoomibwakhwe.

⁴Okhwakhakhwe khufwana obulafu bwolweni, obulafu bwakha niburula mumukhonokwe, yaho niho ahobunyalibwe bwebisanga.

⁵Arumanga olumbe okhumuranjil'la imbeli, ne alakanga okhufwa okhumulondakhwo emukongo.

⁶Olwa asinjila, nesibala nisirenga olwa ahenganga, ne amahanga nikatechela. Ma ebikulu ebikali ebia khase nibieyina, ebikulu ebimbichiti ebirahwaho nibieyinikha hasi, injilaye neyakhale.

⁷Ndalola abandu ba Kushani nibariiye, ne abandu ba Midiani nibarenga.

⁸OMWAMI, emichela nichio echiachila nosinyikha noho? Inyanza nayo niyo eyachila nolula p'pa noho? Welukhila khumalumbesi, amalumbesi keifula niko akali likarilio olwa waleer'ra abandubo obulechi.

⁹Otsomol'langa obuyingobwo elala, nora khulutsaha ebisele. Ibe wabukhania esibala nemichela.

¹⁰Olwebikulu ebikhongo biakhulola, biatechela; emikhula chiamaatsi nitsiyilana esibala, Amaatsi akali isi wesibala kahuuma, ebikubuli biako nibienuya ikulu.

¹¹Eliuba nomwesi biasinjila nibitinya k'ka, khulwo bulafu bwetsiseletsio olwatsiahenukha nitsilukhanga, khandi khulwo okhwakha khwelifumolio eling'inang'inu.

¹²Ibe wachenda musibala noli nelileko, nosen'na amahanga hasi muburimabwo.

¹³Watsia okhuhonia abandubo, okhuhonia omuruchiwo owa wahula. Watubula omwemeli wababi, nomulula abalondibe bosi pe.

¹⁴Wafumira etswoni yabasikaribe netsiseletsio, owetsa singa imbumbuyeka okhukhusalania, niyekhonya singa otsia okhusandia abamanani mambiswi.

¹⁵Wasenel'la inyanza hasi netsisululitsio, ma amaatsi amenji nikerunda.

¹⁶Mbul'langa yaka kosi, ma omubili kwanje kutechela, omunwa kwanje kutechela khulwoburi, omubili kwanje kwefwola khulwa okhuboola, ebilenje bianje nabio nibiesikar'ra hasi wanje. Nindil'langa masilisi litukhu liamasiila, elia Nyasaye nahan'nemwo esinyasio khu yabo abakhuseeranga.

¹⁷Okhuba kata omukhuyu nikuraama amatunde, kata emisabibu nitsirabbaakhwo ebiamo tawe, nohomba kata emiseituni nitsiraama emikunda nachio nichiraama obuswache tawe, ne ebiayo nabio nibifwa, kata tsing'ombe nitsirabba musitioli tawe,

¹⁸kata mbwo, nanzilil'le okhwekhoya nisangala, sichila Nyasaye niye omuhonia bwanje.

¹⁹Nyasaye, OMWAMI wa bosi niye tsingufu tsianje, akholanga ebilenje bianje okhuba ebiangu singa ebiesitsusu, niyanjesia khubikulu sila obutinyu bwosi.