Read lunyore SEFANIA 2 Bible Online

SEFANIA 2 - lunyore bible

SEFANIA 2

¹Inywe abelihanga libula es'simba murwe paalekhwo esinyala okhukholwa

²nimusili okhuhilwa singa omukhuutsi okuhilwanga nobusindu, khandi lirima liibi lio MWAMI ndisili okhumusaalisia, khandi litukhu lio MWAMI okhumanyia oburimabwe ndisili okhwola.

³Mukalukhe khu MWAMI, inywe abandu abetutuyi bomusibala muno, abalondanga amalako kaake. Mukhole akali amalunji ma mwetutuyie imbeli wo MWAMI. Haundi OMWAMI yakhamubeela esirenda khwitukhu elia yakhabe nelirima.

⁴Abulakhwoho kata mulala owanosikale mwitookho lia Gasa. Kata Ashikeloni lilaba likunda. Abandu ba Ashitoti balakhungwa musibala siabwe muluhono oluhela enusu yelitukhu ne abandu ba Ekironi balakhungwa okhurula mwitookho liabwe.

⁵Inywe abandu ba Filisiti, abamenyanga khundulo weinyanza, mwakhalachilwa okhufwa. OMWAMI wamala okhumukhalachila. Namwire mwesi pe ne abulakhwoho owanosikale tawe.

⁶Emikunda chienywe echili khundulo weinyanza tsiakhabe ebikuuri biokhwombokhelamwo abaayi nende amakondi tsinyumba.

⁷Abandu bolwibulo lwa Yuda abakhahonokokhe bakhabukule liloba lienywe. Bakhaaye ebiayo biabwe mwiloba yilio ne nibeyalisia mutsinyumba etsili mu Ashikeloni. OMWAMI Nyasaye wabwe yakhabe halala n'nabo ma abahelesia emiandu khandi.

⁸Nyasaye Wokhunyala Biosi aboolanga mbu, “Ndahuliye abandu ba Moabu nende Amoni nibanyekanga nende okhuchaaya abandu banje khandi nibekhonyanga mbu nababanuule emikunda chiabwe.

⁹Mubwatooto singa ndi Nyasaye oli mwoyo, Nyasaye wa Baisiraeli, ndesuhanga mbu amahanga ka Moabu nende Amoni kalamumwa singa obwa Sodoma nende Komora kali okhusambwa. Kalaba singa amayabo kechumbi nende okhusasibwa khweinziayo, ahobulimo bwayumba. Abandu banje abakhahonokokhe bakhayaake ebindu biabwe nende okhubukula emikunda chiabwe.”

¹⁰Nimbwo abandu ba Moabu nende Amoni bakhahebwe esinyasio khulwokhwelola nende okhwekhonya khandi khulwokhunyeka abandu bo MWAMI Wokhunyala Biosi.

¹¹OMWAMI yakhabarisie okhusila. Yakhabamanyie mbu abanyasaye bomusibala sibali esindu tawe ma nakachile buli lihanga nalimwekayakayenje musibala sialio.

¹²OMWAMI khandi nayeere abandu ba Etsiopia.

¹³OMWAMI narumikhile obunyali bubwe khulwokhumuma Asiria. Yakhakhole litookho lia Nineve okhuba likunda eliasasikha; khandi esitsiimi siralimwo amaatsi.

¹⁴Hakhabe habundu hebiayo nende tsinyama tsietsimbila tsiosi okhuhuluukhila. Amakhuule kakhamenye mwitookho eliasasikha yilio nikayel'le khumadilisha nikalakayanga. Amakhokho kakhalombe liyoka nikasinjiye khumiliango. Emisaala chiemisiita echiombokhelwa inyumba chiakhasambulwe.

¹⁵Yako niko akaakhekhole khwitookho liekhonyanga mbu lili netsingufu nende okhupaala mbu siliakhanyoola amanyakhano tawe. Abandu balio bapaalanga mbu litookho liabwe nilwo likhongo musibala okhuyomba amatookho kandi kosi. Litookho yilio nalikwe likunda, habundu hetsinyama nabulimo okhuhuluukhila! Omundu wosi owanobir'renjeho yakhekose ma arie okhusila.