Read lunyore SEFANIA 3 Bible Online

SEFANIA 3 - lunyore bible

SEFANIA 3

¹Olitsiboolelwa ibe Yerusalemu, litookho elirali lisubilwa khandi elieindiri elikhupianga abandu balio esibi.

²Silihulilanga OMWAMI nohomba okhuhuchil'la amachetsiyio kaake tawe. Siliara obusubili bwalio mu MWAMI nohomba okhureeba obukhonyi bwosi okhurula khuye tawe.

³Abakhongo balio bemise bafwana singa etsisimba etsihumanga; abakhalachi balio bafwana singa ebibwe biomumutsuru, ebialangukha okhusila, ebiranyala okhulekha okhulia esikumba okhwola mukamba kwelitukhu lilondakhwo tawe.

⁴Abaroobi bamwo nabandu barali noluyali khandi abokhukaatilisia; abesaalisi bafwabianga ebitsienukhu ma baberula amalako ka Nyasaye khulwo khukekhonyela.

⁵Nebutswa OMWAMI asili mwitookho; akholanga akali akahabwene, tawe amasiamu. Buli mukamba tsuli oburacheleba, OMWAMI aleeranga obukhalachi bwahabwene khubandube. Ne kata mbwo abandu barali abalunji batsilil'langa okhukhola amasiamu ne sibasimbangakhwo emirwe tawe.

⁶OMWAMI aboolanga mbu, “Mal'le okhukhuya lihanga liosi; mal'le okhusasia amatookho kabwe ma ndekhele amasisi nende eminaara nikakwiye. Amatookho kasikaye kakwiye likunda, emihanda tsisikaye emiele — abulaho osikaye khutsio.

⁷Ndapaal'le mbu haundi nilwo olwa abandu banje bakhambelesia oluyali ma bahuchil'le amachetsiyio kanje, ma balekhe okhwibil'la eliekesio lianje eliandabebaal'la. Nebutswa silwali oluhono nibasili okhuchiaka okhukhola amabi singa obwa bakholanga khale tawe.”

⁸OMWAMI aboolanga mbu, “Linda mbelio. Mulindil'le litukhu lia ndakhayaale abetsimbia tsindi. Mal'le okhukhalaka mumakani mbu nambunjelesie abetsimbia nende abamahanga halala kho babe abanyala okhuhul'la obusiro bwelirima lianje lilulu. Esibala siosi siakhamumwe khulwo bululu bwelirima lianje.

⁹“Ma nangalukhanie abetsimbia tsiosi ne babe abanyala okhusaaya khu ise sienyene, tawe abanyasaye bandi. Bosi balambuchil'la.

¹⁰Kata okhurula ehale singa Etsiopia habandu banje basalana, balander'ra ebihanwa.

¹¹Olwene yilwo, inywe abandu banje, simwakhasimbe omurwe sichila mwali okhundeyambakhana tawe. Ndakhahinieho buli mulala khwinywe owelolanga khandi oli nomwekhonyo, ne sialiho owakhakhol'le indiri khandi khusikulu sianje esitsienukhu tawe.

¹²Ndakhalekheyo abandu abetutuyi nende abokhwehila kalaha, abakhetse khu ise nibareebanga obukhonyi.

¹³Abandu besibala sia Isiraeli abakhahonokokha, sibakhakhol'lekhwo omundu wosi obubi nohomba okhubool'lakhwo omundu obubehi nohomba okhuteema okhukaata tawe. Bakhanyoole emiandu nende okhwesimikha, sila okhubakhwo noburi khumundu wosi tawe.”

¹⁴Mwembe nimukhupa liyoka liobusangali, inywe abandu ba Isiraeli! Osangale nende omwoyo kukwo kwosi ibe Yerusalemu!

¹⁵OMWAMI ulekhele okhumuhelesia esinyasio sienywe, umal'le okhuhiniaho abasuku benywe bosi. OMWAMI, ouli omuruchi wa Isiraeli ali halala n'nenywe, sibulaho esiakhachila mube noburi.

¹⁶Inyinga yitsanga eya bakhabool'le Yerusalemu mbu, “Orabba noburi tawe, ibe litookho lia Sayuni! Muralekha amakhono kenywe kelele singa akabulamwo tsingufu tawe!

¹⁷OMWAMI Nyasaye wenywe ali n'nenywe, obunyali bubwe bumuhetsanga obulechi, OMWAMI alasangasibwa n'nenywe, ne mubuyanzibwe, alamuhelesia obulamu obuhia. Yakhakhwembele nasangala khulwe inywe,

¹⁸yakhasangale singa abandu abali mwisabo.” OMWAMI aboolanga mbu, “Mal'le okhuhiniaho ebirisio biokhufwa, khandi mbinisieho es'simba murwe sienywe.

¹⁹Inyinga yitsanga! Olwa ndakhahaane esinyasio khu yabo abamusandinjia; ndakhasoole abalema bosi, ninjelesia ingo abandu bosi abali mubuhambe. Ndakhakalukhanie es'simba murwe siabwe okhuba oluyali, ma abomusibala bosi bakhabetsoomie.

²⁰Munyinga tsana, ndakhaleere abandu benywe abasalaana okhuchelela ingo. Ndakhamukhole okhuba oboluyali musibala siosi nimuhindihasia nemiandu eminji khandi.” OMWAMI umal'le okhuboola.