Read lunyore HAGAI 2 Bible Online

HAGAI 2 - lunyore bible

HAGAI 2

¹Mumuhika kwa khabili muburuchi bwa Dario, mumwesi kwakhane nakhataru nikuli amakhumi kabili nende l'lala, OMWAMI yal'loma khandi nabir'ranga mumuroobi Hagai.

²Yabool'la Hagai al'lome khu Serubabeli omukafuna wa Yuda, nende khu Yoshwa, Omwesaalisi Omukhongo, nende khubandu bosi ma abareebe mbu,

³“Alikhwoho mwinywe onyala okhwitsul'la singa obwe Ehekalu yokhuranga yali neing'oono indahi? Luno ino muchilolanga ehenganga mbwena? Okhwola ebe nelolekhanga erali esindu.

⁴Nebutswa luno mwesi murafwakhwo amakani tawe. Mutsilil'le okhutiya, sichila ndi n'nenywe.

⁵Olwa mwarula Emisiri ndali okhumusubisia mbu nambetsenje n'nenywe khasotso. Ise sili n'nenywe, kho muraria tawe.

⁶“Sinalube luhono nisili okhutechesia likulu nende esibala nende liloba nende inyanza tawe.

⁷Nangwisie amahanga kosi, ne obuhinda bwabwe bulaleerwa hano ma Ehekalu eletsulamwo obuhinda.

⁸Efetsa yosi nende etsahabu yosi elimusibala, neyanje.

⁹Ehekalu imbia yakhabe neing'oono okhuyomba eyali ikhulu, khulwe yako ndakhahelesie abandu banje obuhinda nende omulembe.” OMWAMI Wokhunyala Biosi umal'le okhuboola.

¹⁰Mumwesi kwakharano nakhane nikuli amakhumi kabili nakhane, mumuhika kwakhabili kwoburuchi bwa Dario, OMWAMI yal'loma khandi khumuroobi Hagai.

¹¹Yaboola mbu, “Reeba abesaalisi bahaane obukhalachi khu kano:

¹²Mupaalanga mbwena omundu naba nachingila inyama yomusango mungubo yayebiikhile irambi. Ingubo tsana neba niyetisie khumukaati, nohomba khubusuma, nohomba khuwaini, nohomba khumafura, nohomba khusiakhulia sindi siosi, kho esindu sieingubo yetil'lekhwo siakhaba esitsienukhu?” Olwe lireebo yilio liali okhureebwa, Abesaalisi bakabusia “Tawe.”

¹³Kho Hagai nareeba mbu, “Nikakhaba omundu util'le khusindu siomusilo, singa okhutiila khumundu ofwiye, ma niyakhatila khusiakhulia siosi, esiakhulia isio siakhaba esiesifwabwi noho?” Abesaalisi bamukalusia mbu, “Yee esitil'lwekhwo siakhaba esiesifwabwi.”

¹⁴Kho Hagai nabakalusia mbu, “OMWAMI aboolanga nimbwo kabetsanga khubandu, khandi nimbwo kali khumahanga kosi imbeli wanje, kata nende emilimo chiosi echiamutiyanga namakhono, nende biosi ebiamuhaananga khulusambwa sibihuchil'lwanga khu Nyasaye tawe.”

¹⁵OMWAMI aboolanga mbu, “Simulolanga akamal'le okhwekholekha khwinywe tawe? Olwa mwali nimusili okhuchiaka okhunyombokhela Ehekalu,

¹⁶mwatsitsanga khusibunjikhi siamatuma nimupaalanga mulanyoola etsikilo etsimia tsibili, nebutswa mwanyoolanga etsikilo emia ndala tsionyene. Mwatsitsanga okhutaha etsiliita tsiewaini emia ndala ne nimunyoola netsilita amakhumi kane.

¹⁷Ndaleera obusindu bwokhusamba ebiraakwa nende amachina kokhukhupa biosi ebia mwateemanga okhuraaka, nebutswa simwarula mutsimbi tsienywe tawe.

¹⁸Luno nelitukhu liamakhumi kabili nende khane eliomwesi kwakharano nakhane olwa mumal'le okhwombokha omusinji kwe Hekalu. Mulole, esitsitsanga okhwekholekha okhuchiaka luno.

¹⁹Kata nikali amatuma sikasili mumikunda tawe, ne ebiraakwa singa emisabibu noho amakhuyu, noho emikomamango nende emiseituni tsiosi sitsiayama tawe nebutswa, okhuchiaka luno namuhelesie tsikhabi.”

²⁰Ling'ana lio OMWAMI lietsa khu Hagai olwakhabili mwitukhu liteelwa yilio, litukhu liamakhumi kabili nakhane mumwesi kwakharano nakhane ndiboola mbu,

²¹“Bool'la Serubabeli Omukafuna wa Yuda mbu ise ndi ahembi okhutechesia likulu nende esibala

²²nende okhukwisia obwami bwamahanga nokhuhiniaho obunyali bwabwe. Nafung'amie amakaari nende abakelusianga. Etsisululi natsifwe ne abatsilusianga naberane abene khubene.

²³Mwitukhu liene yilio nakhubukule ibe Serubabeli, omurumikhi wanje, Omwana wa Shelitieli, ma nakhwahula ibe okhuba omuruchi muliira lianje. Niwe owandahula okhuba omuruchi.” Ise OMWAMI mal'le okhuboola.