Read lunyore SAKARIA 10 Bible Online

SAKARIA 10 - lunyore bible

SAKARIA 10

¹Musaaye ifula okhurula khu MWAMI, mumatukhu keifula. OMWAMI niye oleeranga amalumbesi nakwichisia abandu ifula, nachila emikunda chiabulimundu nichinera.

²Abandu bareebanga amang'ana okhurula khubiniini nende khubafumu, nebutswa amakalusio kabanyoolanga nobubehi khandi nakabutswa. Abalala bakalulanga esiamalooro kaboolanga, nebutswa bamukosianga namang'ana kabwe; okhuhotselesia khwabwe nokhwabutswa. Khulwako abandu batiimatiimanga singa amakondi akakora. Bali mumunyakhano sichila babula omwemeli.

³OMWAMI aboolanga mbu, “Ndi nilirima khubandu betsimbia tsindi abarukanga abandu banje ne okhwola mbaheelesie esinyasio. Abandu ba Yuda nabanje, ne ise omwene OMWAMI Wokhunyala Biosi nabatende. Nababe singa etsisululi tsiobunyali mwihe.

⁴Okhurula mubo balanyoolekha mwo abaruchi, abemeli, nende abakhongo bamahe abokhwamiha abandu banje.

⁵Abandu ba Yuda balanyoola obulechi singa abasikari abasen'nanga abasuku babwe mwitohi liokhunjila. Balalwana lihe sichila OMWAMI ali halala n'nabo, ne balaleka kata abasikari babasuku, abalwan'nanga khutsisululi.

⁶“Nangufuhasie abandu ba Yuda; nimbonia abandu ba Isiraeli. Nambabeele esirenda, nimbakalusia bosi ingo wabwe. Balaba singa obwabakhabeye nirabbalekha tawe. Ise nise OMWAMI Nyasaye wabwe; nangalusie amasaayo kabwe.

⁷Abandu ba Isiraeli balaba netsingufu singa abasikari, balayanza singa abandu abanyweyenje ewaini. Abetsinzibulo tsiabwe bakhetsul'le obulechi yibu, ma basangale khulwe yako ako MWAMI akhol'le.

⁸“Nanange abandu banje betse, nimbabunjelesia halala. Nambanunule nimbakhola abenji singa obwa balinji.

⁹Kata nikali ndali okhubasalania mumahanga kandi, nabanzitsul'le mubibala biehale. Bo nende abaana babwe, bakhahone nabo nibakalukha.

¹⁰Nambachelesia ingo okhurula musibala sie Misiri, nimbabunjelesia okhurula Asiria, nambahelesie liloba lio khumenya mwo mu Lebanoni; okhwola olwa balabula obweyangu obuhela.

¹¹Olwa babir'ra munyanza yabwe yeminyakhano, Ise OMWAMI nakhupake amarunda, ne tsindungu tsiosi etsiomuchela kwa Naili natsiome kar'ra. Esunga ya Asiria netutuhibwe, ne obunyalibwe Misiri nabubule tsingufu.

¹²Nambelesie abandu banje tsingufu, nabo balandekayakaya nibalonda amalako kanje.” OMWAMI umal'le okhuboola yaka.