Read lunyore SAKARIA 11 Bible Online

SAKARIA 11 - lunyore bible

SAKARIA 11

¹Ibe Lebanoni, yikula emiliangochio, kho omulilo kusambe emisiitachio!

²Inywe emitarakwa, khupe etsikhwisi nimulakaya, sichila emisiita chikwiye; emisaala chioluyali chimumilwe! Inywe emiriba chia Bashani, khupe etsikhwisi, sichila omutsuru kwemisaala eminji kuremuliiywe hasi!

³Abaruchi balakayanga musibeela, oluyali lwabwe lukor're! Hulile okhuhuuma khwetsisimba. Ebitsakha bia Yorodani ebia tsimenyangamwo bikhuyilwe pe!

⁴OMWAMI Nyasaye wanje yambool'la mbu, “Wekhole omwayi webiayo biamakondi akatsitsanga okhusinzwa.

⁵Beneko bakeeranga nibarahebwakhwo esinyasio tawe. Bakusianga inyama yako nibaboola mbu, ‘OMWAMI yeetsomibwe! Khuli abahinda!’ Ne kata abaayi bako sibakabeelel'langakhwo tawe.”

⁶(OMWAMI yaboola mbu, “Sinambelel'lekhwo omundu wosi omenyanga musibala sino khandi tawe. Ise omwene; naare abandu bosi mumakhono kabaruchi babwe. Abaruchi yabo baloononia esibala, nase sinasihonie okhurula mumakhono kabwe akobunyali tawe.”)

⁷Kho yabo abakulaninjia amakondi bamandika emilimo nase nimba omwayi wamakondi akali nikatsitsanga okhusinzwa. Nimbukula tsindabusi tsibili, ndala ndachilanga mbu “Esirenda” ne eyindi “Obulala.” Ma ninzaya esiayo.

⁸Mumwesi mulala nekala abaayi bataru abali nibaliho. Ne bachonyia omwoyo kwanje, nase ndasinya emioyo chiabwe.

⁹Ma nimbool'la esiayo mbu, “Sinazilil'le okhuba omwayi wenywe khandi tawe. Lekha yabo abenyanga okhufwa bafwe ne yabo abenyanga okhumumwa bamumwe. Yabo abanabasikale nabamalane abene khubene.”

¹⁰Nimbukula indabusi yanje elangwanga “Esirenda” na ninjifunaka, khulwokhufunaka indakano eya ndalomba namahanga kosi.

¹¹Kho indakano yafunakwa litukhu yilio. Yabo abakulanga nende okhukusia amakondi bali nibamenyanga ne bamanya mbu OMWAMI yali nal'lomelanga mu akandali okhukhola.

¹²Nimbabool'la mbu, “Nimuba nimuluutsi mbu nobulahi, mumbelesie omurungo kwanje. Nebutswa nimuraluutsi mbwo tawe, lekhe kabe.” Kho nibaarunga ebitonye amakhumi kataru biefetsa singa omurungo kwanje.

¹³OMWAMI niyambool'la mbu, “Tsifuube mwibiikhilo lie Hekalu.” Kho ndabukula etsiobukusi yibwo ebitonye amakhumi kataru biefetsa ebitonye biosi ebiobukusi ebia bapaala mbu nibio ebimbel'le ma nimbibiikha mwibiikhilo, lie Hekalu.

¹⁴Ma nifunaka indabusi yanje eyakhabili elangwanga “Obulala”, ne obulala bwa Yuda nende Isiraeli nibufunikha.

¹⁵OMWAMI niyambool'la mbu, “Khandi wekhole singa omwayi obula obukhonyi.

¹⁶Mal'le okhuraho omwayi wokhwaya esiayo sianje nebutswa sakakhonyanga amakondi akarisibubwe nokhumumwa tawe. Kata sakhaabanga yako akakor're nohomba okhuhonia akafunikhile, tawe, kata siyayanga akali amachima tawe. Musilenje yisio omwene aliitsanga inyama ye yako akali amakhomefu, nakhuula kata tsimbakayu tsiako.

¹⁷Woowe khumwayi uyo orali nende okwa anyala, owilukhanga nalekha amakondi! Lihe nalimulule obunyalibwe. Omukhonokwe nakuniale ne imoniye yomukhono musaatsa nebofule.”