Read lunyore SAKARIA 12 Bible Online

SAKARIA 12 - lunyore bible

SAKARIA 12

¹Kano namang'ana akal'lomanga khu Isiraeli, akarula khu MWAMI, OMWAMI owali okhubambula likulu, nalonga esibala ma nahelesia omundu obulamu. Aboolanga mbu,

²“Naakhole Yerusalemu okhuba singa esikombe siewaini; amahanga akali ahembi n'nalio nakachinywe nikahutuma singa abandu abakhol'lwe. Ne olwa baseera Yerusalemu, amatookho ka Yuda kandi kosi nako khandi kalaseerwa.

³Nebutswa olwe inyinga tsana yakhoole, ndakhakhole Yerusalemu okhuba singa lichina lisiro; lihanga liosi eliakhateema okhusikula lichina yilio lilasalisibwa. Amahanga kosi komusibala kakhahambanie tsingufu halala okhuliseera.

⁴Olwene yilwo ndakhariisie etsisululi tsiabwe tsiosi, nindalusia abachendelanga khutsio bosi. Naninde abandu ba Yuda, nebutswa nambofusie etsisululi tsiabasuku babwe.

⁵Ma nilwo olwa abebilibwa bia Yuda bakhaboole mumioyo chiabwe mbu, ‘OMWAMI Nyasaye Wokhunyala Biosi ahaananga tsingufu khubandube abamenyanga mu Yerusalemu.’

⁶“Khunyinga iyo ndakhakhole ebilibwa bia Yuda okhuba singa omul'lo okwatukhanga mumutsuru, nohomba okuli m'mukunda kwobuswache obwamala okhwenga; biakhamume amahanga akabibotokhana kosi. Abandu ba Yerusalemu bakhasikale mumulembe mwitookho.

⁷“Ise OMWAMI ndakhahaane obulechi khubasikari ba Yuda mbelio kho oluyali lwabolwibulo lwa Daudi nende olwabandu abamenyanga mu Yerusalemu lulekhe okhukalihibwa okhuyomba olwa Yuda yosi.

⁸Olwene yilwo OMWAMI yakhasoole yabo abamenyanga mu Yerusalemu ne kata omutekhele okhusila mubo alaba netsingufu singa Daudi. Abolwibulo lwa Daudi bakhabe singa Nyasaye, nibabemel'la singa malaika wo MWAMI.

⁹Khandi olwene yilio ndakharekhwo omwoyo okhumuma amahanga kosi akakhateema okhuseera Yerusalemu.

¹⁰“Ndakhatsukhil'le khubolwibulo lwa Daudi, nokhubamenyanga mu Yerusalemu, omwoyo kwetsimbabasi nende okwokhusaya. Bakhahenge khu uyo owa bafumir're nibamwira ne nabamwekhuule, singa yabo abekhuula omwana omutelwa. Balamwekhuula obululu, singa yabo abekhuulanga omwana omwikulanda.

¹¹Olwene yilwo okhwekhuula khulaba mu Yerusalemu, singa okhwekhuula khwa Hadadirimoni musipaapi sia Mekito.

¹²Abandu bosi musibala balekhuula, buli silibwa khubwasio. Abesilibwa siabolwibulo lwa Daudi balekhuula khubwabwe, kata nende abakhasi babwe khubwabwe. Abesilibwa siabolwibulo lwa Natsani balekhuula khubwabwe, kata nende abakhasi babwe khubwabwe.

¹³Abesilibwa siabolwibulo lwa Lawi balekhuula khubwabwe, kata nende abakhasi babwe khubwabwe. Abesilibwa siabolwibulo lwa Shimei balekhuula khubwabwe, kata nende abakhasi babwe khubwabwe;

¹⁴nende abebilibwa bindi biosi ebisikaye, buli abesilibwa balekhuula khubwabwe kata nende abakhasi babwe khubwabwe.”