Read lunyore SAKARIA 13 Bible Online

SAKARIA 13 - lunyore bible

SAKARIA 13

¹OMWAMI Wokhunyala Biosi aboolanga mbu, “Olweinyinga tsana yakhoole esitaho siakhekulwe khulwokhusiiya abolwibulo lwa Daudi nende abandu ba Yerusalemu mutsimbi tsiabwe nende mubwekayakayi bwabwe bwebiniini.

²Olwene yilwo, Ise OMWAMI ndakhahinie amera kebiniini ebiekayakaywanga okhurula musibala, kata sikaletsulilwa khandi tawe. Ndakhahinieho musibala yabo abekholanga abaroobi nende obwekombi bwokhwekayakaya ebiniini.

³Kata omundu wosi naba nachaaka okhurooba, samwana nende nyina balamubool'la mbu akhoyele okhwirwa, sichila aboolanga akobubehi muliira lio MWAMI. Kho samwana nende nyina balamufumira, olwa arooba.

⁴Olwe inyinga tsana yakhoole, buli omuroobi yakhasimbibwe omurwe khulwamabisuloke kata sialeebiikha ingubo yobwoya khulwa okhukaata abandu mbu nomuroobi tawe.

⁵Nebutswa balaboola mbu, ‘Ise sindi omuroobi tawe. Ise ndi omulimi womukunda; mbetsanga omulimi okhurula mubwana bwanje.’

⁶Ma omundu alamureeba mbu, ‘Ne tsimbala tsino etsili khumubilikwo tsikhali mbwe?’ Naye alakalusia mbu ‘Ndatsinyool'la munyumba yomulina wanje.’ ”

⁷OMWAMI Wokhunyala Biosi aboolanga mbu, “Ibe olukanga, buukha olwane omwayi wanje oukhol'langa emilimo! Omwire ma amakondi kasalaanibwe. Naaseere abandu banje

⁸ne musibala siosi, ebitonye b'bili khubitaru biabandu baleerwa.

⁹Ne nandeeme esitonye siakhataru esiba nisisikaye ne nambasiiye singa obwe efetsa esiiywanga okhubir'ra mumul'lo, khandi nambasiiye singa obwe etsahabu eteemwanga. Nilwo olwa nabasaaye khu ise nase nambakalusie. Nambabool'le mbu bo nabandu banje. Nabo baleyama mbu Ise nise Nyasaye wabwe.”