Read lunyore SAKARIA 14 Bible Online

SAKARIA 14 - lunyore bible

SAKARIA 14

¹Litukhu elio MWAMI yakhekhale khundebe yobukhalachi lili ahembi. Ma Yerusalemu naliyaakwe, ne ebiyaakilwe nabikabul, lwe mutsimonitsio.

²OMWAMI nabunjelesie amahanga kosi okhulwana Yerusalemu. Litookho lilabukulwa, netsinyumba tsilayaakwa ne abakhasi okhwononibwa. Enusu yabandu bamwo balahilwa mubuhambe, nebutswa abandi bosi ababa nibasikala sibalahinibwa mwitookho tawe.

³Ma nilwo olwa OMWAMI yakharule natsia okhuseera amahanga yako, singa obwa alwananga khwitukhu lielihe.

⁴Olwene yilwo yakhasinjile Khusikulu sia Miseituni esili ebukwe wa Yerusalemu. Ma esikulu yisio silatikhila hakari, okhurula ebukwe okhwola emasaba ndibaho libanda libambukhu. Enusu yesikulu silesunda esinyolu, enusu yindi silesunda enandete.

⁵Ne libanda liebikulu bianje lilekalwa sichila libanda liebikulu liloola khundulo khwabio. Inywe mulelukha singa obwabakuka benywe belukha okhutechela khwesibala mumatukhu ka Usia omuruchi wa Yuda. OMWAMI Nyasaye wanje yakhetse nali nabamalaika bosi halala n'naye.

⁶Olweinyinga tsana yakhoole obusindu kata ebarafu sibiakhabeho tawe,

⁷kata esiilima sisiakhabeho tawe. Om'basu kwonyene nikwo okwakhabetsengeho kata mubutukhu. Inyinga yakakhekhole yaamanyikha khu MWAMI yenyene.

⁸Khandi olweinyinga tsana yakhoole amaatsi kobulamu kakhasenukhe okhurula mu Yerusalemu enusu yako kalatsia munyanza ye Chumbi eli ebukwe ne enusu yindi elatsia munyanza ya Mediterenia eli emasaba. Kalaba mbwo Murotso khandi musuubwe.

⁹Ma OMWAMI yakhabe omuruchi khusibala siosi pe; abandu bosi khwitukhu yilio bakhamwekayakaye singa Nyasaye ne bakhamumanye neliiralie elala.

¹⁰Esibala siosi silahelana, okhurula khwitookho lia Geba elili esinyolu okhwola Rimoni elili enandete. Ne Yerusalemu lilasikala nilichingukhile, habundu halio; litookho lilatsia okhurula khusilibwa sia Benjameni okhwola habundu hesilibwa siomukoona ahesilibwa siokhuranga sialinji, nende okwhola khusilibwa khandi lilatsia okhurula khumunaara kwa Hananeli okhwola khubitiinyilo biewaini biomuruchi.

¹¹Abandu balamenyamwo, ne akesilaamo siobubi sikalabakhwoho khandi tawe; Yerusalemu lilamenya mumulembe.

¹²OMWAMI yakhaleere obulwaye obubi khumahanga kosi akaseeranga Yerusalemu. Inyama yemibili chiabwe elabola nibasili mwoyo; tsimoni tsiabwe tsilabol'la mubikwochi muusi, netsinimi tsilabol'la m'munwa.

¹³Olwene yilwo OMWAMI yakhaleere ingoyani ingali mubo nende oburi obukali mbu siomundu alatiila owasie oli ahembi n'naye namutiaba.

¹⁴Abandu ba Yuda balalwana khulwokhusoola Yerusalemu. Babukula obuhinda bwamahanga kosi obwayaakwa, nabwo ni efetsa, nende tsingubo tsinyinji okhusila.

¹⁵Khandi obulwaye obubi bulatiila etsisululi, tsinyumba, tsingamia, etsipunda nende ebiayo biosi ebiba nibili mutsikambi tsiabasuku.

¹⁶Ma buli mundu oba nasikaye khubamahanga yako akaseera Yerusalemu, alatsitsanga Yerusalemu buli muhika okhwekayakaya OMWAMI Wokhunyala Biosi singa omuruchi, nende okhulia lisabo lia Mahindu.

¹⁷Ne lihanga liosi eliokhusibala niliba niliratsia Yerusalemu okhwekayakaya OMWAMI Wokhunyala Biosi singa omuruchi, ifula sielabakwila tawe.

¹⁸Ne kata Abaamisiri nibaba nibasuula okhulia Lisabo lia Mahindu, kho balakhuywa nobulwaye obubi tsana obwo MWAMI yaruma khumahanga kosi akasuulanga okhutsia Yerusalemu.

¹⁹Yisi silaba esinyasio sie Misiri nende esiamahanga kandi kosi nikaba nikaralia Lisabo lia Mahindu.

²⁰Olwene yilwo amang'ana kalasarwa khunyimba tsietsisululi, mbu “Eyahaanwa khu MWAMI.” Kata tsindabu tsio Muhekalu tsilaba tsinzienukhu singa tsindaabo etsibeetsanga imbeli Wolusambwa.

²¹Kata buli indabu mu Yerusalemu nende mu Yuda elareebwa sibeka khulwokhurumikhilwa mubwekayakayi bwo MWAMI Wokhunyala Biosi. Abandu abahaananga emisango balatsirumikhila okhutekhelamwo inyama yemisango. Olweinyinga tsana yakhoole abakhala bokhukulana sibakhabekhwo mu Hekalu yo MWAMI Wokhunyala Biosi khandi tawe.