Read lunyore SAKARIA 2 Bible Online

SAKARIA 2 - lunyore bible

SAKARIA 2

¹Mwibisulo lindi ndali okhulola omundu nali nomukoye kwokhuchela mumukhonokwe.

²Nimureeba mbu, “Okhatsiahe?” Niyangalusia mbu, “Nzia okhuchela Yerusalemu, okhulola obuchiikha bwalio noburambi bwalio singa obwa buli.”

³Ndalola Om'malaika owali nal'lomanga n'nase yarula nachaaka okhutsia ne om'malaika undi niyetsa okhumwakan'na,

⁴namubool'la mbu, “Tsia tsimbilo, obool'le omubuukha oli nomukoye kwokhuchela uyo mbu Yerusalemu lilabamwo abandu abenji nende emiruko eminji ma lilaba likali okhusila eliranyala okhuba namasisi tawe.

⁵OMWAMI umal'le okhusubisia mbu ye omwene alaba lisisi liomul'lo okhufumbila litookho khulwokhulisoola khandi mbu ye alamenya mulio mubukhongobwe bwosi.”

⁶OMWAMI abool'langa abandube mbu, “Woowe! Yilukhe! Rule musibala siesinyolu aha ndali okhumusalania okhutsia mumbeka tsiosi.

⁷Mwilukhe murule Babulonia mukalukhe Yerusalemu:

⁸Omundu wosi omukhuyanga inywe abetsanga nakhuyanga esindu siobukusi obukali khu ise singa obweindol'lo yeimoni ebetsanga khumundu.” Kho OMWAMI Wokhunyala Biosi yairumile namang'ana kano okhubool'la amahanga akali okhuyaaka abandube mbu:

⁹“OMWAMI mwene nalwane n'nenywe, ne namuyaakwe nabandu abalinjikhwo abarumikhili benywe.” Olwe yaka nakekhole abandu bosi bakhamanye mbu OMWAMI Wokhunyala Biosi niye owaaruma.

¹⁰OMWAMI aboolanga mbu, “Mwembe khulwobusangali inywe abandu ba Yerusalemu! Nzitsanga okhumenya halala n'nenywe!”

¹¹Olwene yilwo, amahanga amenji kakhetse khu MWAMI ne abandu bako bakhabe abandube. Yakhamenye mwinywe ne mwakhamanye mbu niye owaaruma khwinywe.

¹²Yuda khandi lilaba omwandu kwo MWAMI omuchomekhe musibala esitsienukhu, ne Yerusalemu lilaba litookho elio MWAMI yayanza okhusila okhuyomba akandi kosi.

¹³Inywe abandu mwesi, musiling'ane imbeli wo MWAMI, okhuba yeetsanga narula mubumenyobwe obutsienukhu.