Read lunyore SAKARIA 4 Bible Online

SAKARIA 4 - lunyore bible

SAKARIA 4

¹Om'malaika uyo owal'lomanga n'nase niyetsa khandi niyambuusia singa omundu obwabusibwanga nali mundoolo.

²Yareeba mbu, “Nisina esiololanga yisio?” Nimboola mbu “Nduutsi esihani sietsitaya esietsahabu. Olutaabo lwamafura lwali hekulu wasio. Khusihani tsana tsialikhwo etsitaya tsine natsitaru ne buli etaya ndala yali neminwa chine nachitaru.

³Chialiho emisaala chiemiseituni chibili ahembi khusihani, mbu mulala khumukhono musaatsa kwolutaabo tsana, nokundi khumukhono kwalwo omukhasi.”

⁴Kho ndamala reebe om'malaika uyo mbu, “Esifune siebindu yibi nisina omwami wanje?”

⁵Ma naye niyareeba mbu, “Siomanyile esifune siabio tawe?” Nimboola, “Simanyile tawe omwami wanje.”

⁶Ma Om'malaika, nakalusia niyambool'la mbool'le Serubabeli amang'ana kano okhurula khu MWAMI mbu: “Olanyoola obulechi ne tawe khulwobunyali bwokhulwana lihe nohomba khulwe tsingufu tsitsio omwene habula khulwo omwoyo wanje.

⁷Amang'ana amatinyu akali singa esikulu esikali, kalahwaho imbeliwo. Nawombokhe Ehekalu obuhia, ne olwa nobe nomalilanga okhwombokha lichina liokhumal'likha abandu nabahanzuukhe nibaboola mbu, ‘Neyeing'oono, neyeing'oono okhusila!’ ”

⁸Khandi ling'ana lindi okhurula khu MWAMI lianzitsila.

⁹Yambool'la mbu, “Serubabeli wombokhele omusinji kwe Hekalu, ne naamale okhuchiombokha. Olwa akene yaka nakekholekhe, abandu banje nabamanye nise OMWAMI okhurumile khubo.

¹⁰Yabo abali okhutsekhel'la olwa balola amang'ana nikaratsilil'langa bulahi olwa kachiaka, nabeekhoye olwa nabalole Serubabeli natiil'le lichina liokhumal'likha yilio.” Om'malaika yamala yambool'le mbu, “Etsitaaya yitsio tsine natsitaru nitsio tsimoni tsio MWAMI, tsine natsitaru etsihenganga khusibala siosi pe.”

¹¹Ma nase nimureeba mbu, “Emisaala chiemiseituni chibili echili khumukhono musaatsa okwesihani sietsitaya nende khumukhono omukhasi, esifune siachio nisina?

¹²Ne tsisaka tsino tsibili tsiemiseituni etsilondokhana nemifelechi chibili echietsahabu echia amafura karul'langamwo, esifune siatsio nisina?”

¹³Niyangalusia niyareeba mbu, “Siomanyile esifune siatsio tawe?” Nimboola mbu, “Simanyile tawe omwami wanje.”

¹⁴Ma naboola mbu, “Bano nabandu babili abatsukhil'lwakhwo amafura abo MWAMI yahula mbu bamurumikhilenje ye, OMWAMI wesibala siosi pe.”