Read lunyore SAKARIA 5 Bible Online

SAKARIA 5 - lunyore bible

SAKARIA 5

¹Olwa ndahenga khandi, ndalola esitapu nisipulukha mumiiya.

²Om'malaika niyareeba nisina esianduutsi. Ningalusia nimboola mbu “Ndolanga esitapu nisipulukhanga mumiiya; oburambi bwasio buhela etsimiita tsirano natsine ne obuchiikha bwasio buhela etsimiita tsine nende enusu.”

³Ma niyambool'la mbu, “Siahandikwakhwo esilaamo siobubi esirula nisitsia musibala siosi pe. Khulubeka l'lala lwesitapu yisio kalikhwo amang'ana akaboolanga mbu omundu wosi omwibi alahinibwa musibala; ne khulubeka lundi kaboolanga mbu omundu wosi oboolanga obubehi khulwokhwesuha naye khandi alahinibwamwo.

⁴OMWAMI Wokhunyala Biosi aboolanga mbu naleere esioba esilaamo siobubi nasio silenjila munyumba yomwibi wosi nende munyumbaye uyo oboolanga obubehi khulwokhwesuha muliira lianje siakhamenye munyumba tsiabwe ne siakhatsilekhe nitsili mubusasikhi.”

⁵Ma om'malaika owali nal'lomanga n'nase yalolekha khandi, niyambool'la mbu, “Lola! Esindu sindi siitsanga!”

⁶Nireeba mbu, “Sikhali sina?” Naye naboola mbu “Nesikapo, ne sisinjilanga musilenje sietsimbi tsiesibala siosi.”

⁷Esikapo tsana sialikhwo esifunikho siomukasa. Olwa ndali nisihenga, esifunikho siekulwa ne musikapo tsana yalimwo omukhasi owali niyekhayemwo.

⁸Om'malaika niyambool'la mbu, “Omukhasi uno akobokhelanga obusiamu.” Ma namuminil'la musikapo ma niyekala esifuunikho butinyu.

⁹Ndahenga ma nindola abakhasi babili nibapulukhanga okhwitsa ahandali ne bali netsimbaha singa etsiekhonye. Babukula esikapo yisio ma nibapulukha nibatsia n'nasio.

¹⁰Ma nireeba om'malaika owali nal'lomanga n'nase mbu, “Kho nihena aha basihilanga?”

¹¹Naye niyangalusia mbu, “Basihilanga Babulonia okhusiombokhelaho ehekalu. Olwe hekalu tsana nebe nemal'le okhwombokhwa, esikapo yisio nasireebwemwo khulwo khwekayakaywa.”